كل ما بدنا نزعل راح نحط حاططنا على الحكومة – مثل هي ما بتعمل وحاطه حاطهها على مياتنا واكلاتنا ومش مخلية اللقمة تصل للثم تا نتهنى بعيشتنا مثل بقية شعوب الأرض والله الصحيح في مثلنا مثايل , والصحيح بالغرب تسخر الحكومات من اجل الشعب أما عندما فنسخر الشعب من أجل الحكومات ولذلك قررت بناء على توصيات الصناديق المحلية ما يلي ...

(( جــــكر بالحكومة )) – قررت التوقف عن استخدام اي نوع من المواصلات والعودة للمواصلات الأصلية التي تحملت – قرف الاباء والأجداد(( حماركو )) – في المعاملة الغير انسانية التي كان يتعرض لها وسأعامله معاملة انسانية تفوق كل ما تنادي به منظمات الرفق بالدواب – ولكن الآن عرفنا قيمتها الحقيقة التي تساعدنا في الاستغناء عن المواصلات والبنزين ليبقى بترولها في محطات الوقود ويصيبه الركود كما هي الأمور راكدة ,, بحيث لا تصل الضرائب الى جيوبها وتجفيف كل منابعها كما هو الارهاب ,,,

(( جكر بالحكومة )) بدي ابطل اشم الهوى لأنه الحكومة بتتقصدنا كثير من عمل مطبات هوائية وارضية بوجهونا ومصدات حتى ما نتنفس مثل العالم والناس ونشم الهوى بالدول المجاورة لما تنفس شوي المواطن وكان – متداين تا يروح على سوريا بدل - قرشين الضرايب وحطت الحل وسكرتها بوجوهنا بعودة ضريبة المغادرة حتى توقف بوجهنا عائق أمام أي انفتاح على الشعوب وما يتنفس مثل العالم والناس وحتى تبقى الكشرة بوجهنا صباح ومساء وما يعرف ينام متهني مع مرته علشان تقل الخلفة وتقل الخدمات المقدمة من التأمين الصحي الى التعليم المجاني الجامعي الذي سيكون مجانا حينما تخف (( خلفة البشر )) وتصبح المقاعد فاضية بالجامعات لاتاحة اكبر فرص ممكنة بسبب قلة النسل والخوف على انقراضه في المستقبل لأن ذلك يمس أمن الوطن واصحاب الكراسي خوفا من هروبها من تحت – قفاياتهم وقفايات ابناءهم – وعذرا للكلمة فهي موجودة في قاموس اللغة ,,,,!!

(( جكر بالحكومة )) بدي رجع احرث الأرض وازرعها وارزع كل شبر وفتر وأرجع (( للوح الدراس )) أدرس وبلاش وجع هالراس وأزرع – حوالين الدار حتى اجد – زر البندورة خليها تصدر بندورتها زي ما بدها وانا مش بحاجة لبندورتهم ولا حتى التجار يتحكموا بينا على خاطرهم بدي ارزرع – ضمة البقدونس – وراس البصل - وراس الفجل وحبة الخس – والزعتر والميرمية مثل ما هو الزيتون – وبدي ارجع اربي الحلال والجاج والحمام وكل شىء رغم مخالفته لقوانين الصحة العامة والصحة الشخصية مش مزبوطة اصلا معلعلة وكل العلات والجلطات موجودة بروسنا وبابدانا ,,,
((جكر بالحكومة )) بدي ابطل الخلفة حتى لا تتحكم بينا وبدي ىخذ ابرة (( العقم )) علشان اولادي ما يجيوا شحادين ودايرين بالشوارع يتسولوا ومش ملاقيين لقمة الخبز واحسن ما يطلبوا مني قوائم طويلة من الوسائل العصرية وانا مش قادر البي طلباتهم ففضلت أحل المشكلة من اصلها واعيش انا والمرة عيشة على خاطرنا بدون نكد الأولاد وأقضي على كل ضرايب الحكومة الي ممكن تلاحقني بالمستقبل وتستغل أولادي و كل شىء يخطر ببالهم من شركات الاتصالات والانترنت ومحلات الملابس والموبايلات وكل الدكاكين الي (( بتنبش )) عن قرش حتى تستفيد من المواطن بكل الوسائل المتاحة سواء كانت شرعية او بنت حرام ,,لأنه بطل حدا يحط مخافة الله بين عيونه وبطلت تفرق معاه ,,

(( جكر بالحكومة )) ...بدي ارجع احرث وادرس وأعمل لبن ولبنة واستغل فصل الشتاء والربيع بخيراته من – العكوب –واللبقيلة والخبيزة- وادور على الفطر – وكل ما تجود به الأرض وبلاش من اللحم والجاج الي اصبحنا (( نصوصو منه )) وقرفنا عيشتنا وصار يطلعنا ريش من كثر ما اكلنا بس ايام ما كان رخيص ولما غلي صارت – ممعوط الذنب – يتطلع علينا بنص عين لأنه صرنا مش طايلنه وما ضل علينا الا – ممعوط الذنب – وانشاء الله بصيبة (( الانفلونزا )) علشان يرخص ونصير نتعجرف عليه ,,, حتى العدس الي ما كنا نعبره صرنا ما نقدر نشتريه ونمر عليه ونتحسر والحال معسر ,,, وشو هالعين الي طرقتنا ,,,!!

((جكر بالحكومة )) بدي اطفي الكهربا على البدري وبدي انام بدون ضو ولا اولع ولا مصباح ولا غيره عدا عن انه راح اوفر – تدفئة – والنومة فيها دفا وعفا وتوفير كاز وغاز – واحسن ما نشرب شاي بالسهرة بعد غلا السكر او نوكل – حلويات – عوامه ولا هريسه لأنه راح نصير نحلم بيها ونتفرج عليها بعيوننا ونتذكر ايام __(( الجعجبان )) والقمبز والذي منه وبطلنا نلاقيه لما طلع بخلقنا – السنكرز – والمارس اعداء الحضارة واعداء سلب جيوبنا ,, او حتى نظل نلطع عليه (( ونتشهون )),,
((جكر بالحكومة )) راح اسكر باب الدار وأبطل استقبل الزوار ولا اضيف شىء ولا مناسبات زواج ولا ولادة ولا بدع من المناسبات الي بدها ميزانيات مش راتب حتى الواحد يسدها وكلها ضحك على الذقون ومناكفات اجتماعية ليس اكثر وبعدها الكل بيحكي على بعضه حتى نصل الى مرحلة (( الشرشحة )) ومن اقرب الناس اليك ,,
((بس جكر بالحكومة )) بدي ابيع الدار واسكن بخيمة وما بدي سكن كريم ما بلاقي ادفع ثمن قسطه الشهري كنا نتوقع قسط شهري – اربعين او خمسين نيره – تاريه – الحيتان – باقيين يستنوا بهيك سكن وعلشان يملو كروشهم وجيوبهم من جيوبنا بدنا نبطل نشتري من هيك سكن ما راح نشوف فيه كرامتنا وبده رواتب عاليه يا حسرة منين راح نجيب ونسدد واذا القينا ... احسن النا ننصب خربوش على طريق المطار حتى الي رايح برا الوطن والي جاي يتفرج علينا وممكن يحن علينا ويعطينا شقة خمس نجوم يعني بنتحمل شتوية او شتويتين وبعدين ممكن ولي الأمر يحل مشكلتنا العمر كله ,, وبنكون وفرنا (( بلاوي )),,بدل ما نظل مديونينن عشرين وثلاثين سنة للبنوك ودينة فوق دينه ,,,

)) بس جكر (( بالحكومة وغيرها ما راح اسكر ثمي وراح اخليه مفتوح للهوى ويدخله زي ما بده واذا الذبان بلاقي فيه اشى خليه يدخله الا اذا مستغني عن حياته واكيد عزيزة عليه واحكي زي ما بدي واضل احمل وجع وهم الناس حتى اشوفهم مرتاحين ومش مهمومين وبلاش يطبقوا علينا المثل البريطاني الي بتعرفوه ((( ..... )))) وما بدي احكيه احسن من تفسيرات شرق وغرب واحنا ما اشطرنا بالتفسيرات وبنقل السوالف وطق الحكي والعيون كلها قاعده بتراقب هون وهناك بس علشان تككم ((اثمامنا ))وتسكرها لأنه هاي الي شاطره فيه ,,,

واحسن ما يتهمني احد بأنني من أعداء الوطن وأنني مدعوم من جهات شرق وغرب والجماعة ما بهمهم سمعة الوطن ولا قلوبنا على الوطن وفيه مين يحمل همه .. لكن هو صحيح البعض منهم ما بتهمهم الا جيوبهم ومثل حكوماتنا عمره ما همها الشعب قد ما بهمها تنكد عليه وتلعن (( سلسفيل الي خلفوه )) وتخليه ما يرتاح يوم بحياته ويتهنى وبنقول الهم كفاية ضحك على اللحانا – ديروا بالكوا على المواطن الفقير والي ملتعن – حرسيه – بس وصاتكم على الوطن قبل ما تفقروه وقبل ما تصير مديونيتة ((( عشرين واربعين وخمسين مليار نيرة ,, ))), وبعدين يا حسرة عليك يا وطن شو بدك تتحمل من هيك حكومات ومن هيك سياسات وبحطوا العتب على اعداء الوطن الي بدهم يركعونا مش على حكوماتنا وبلاويها الي ما بتعرف تشكل مجلس اقتصادي واحد يبقى على حاله بس شطارة بدها تبحث عن الضرايب بالبناطيل ,,!!! وقاعده للمناكفات وتغيير الوزراء واعطاءهم رواتب تقاعدية (( بالهبل )) حتى يكون مفصلينهم على المزاج ,,,و كله بقول (( آه )) علشان مصالحه ,,, اما المواطن والوطن فيئن تحت وطأة (( آهاتهم )) من كثرة الأوجاع التي تصيبه . وسلمكم الله من كل الآهات .