جراسا -

انا مش عارفة من وين بدي ابدا بالحكي ولا شو احكي بالضبط بس بصراحة انا التفكير بقتلني مش كاينة ابطل تفكير باللي صار واللي بيصير، انا عمري 19 متزوجة وعمر جوزي 34 سنة وعندي ولد عمره 3 سنين تزوجت كان عمري تقريبا 15 سنة ما بدي احكي انه جيزة لا هي عبارة عن شروة وبيعة من قيبل اهلي واهله، المهم انا متزوجة واحد هويته قدس (جنسية اسرائيلية) وانا ضفة (السلطة الفلسطينية) انا ما كنت بعرف انهم راح بيشترو بيت في اسرائيل وراح يعيشون هناك ، هلاء عشان انا ابني يصير معاه جنسية اسرائيلية زي ما بدهم اعمامه وابوه لازم انا اتنازل عنه واحلف يمين انه ابني مو معي مع ابوه ساكن في اسرائيل واني انا وابوه مطلقين اسرائيلي، لكن الصحيح انه لا بس على الورق بس برضوا انا مش مقتنعة بهادا كله ورفضت هلاء ابي المحترم اخذني غصب عني ورحنا على المحامي وتنازلت عن ابني وحلفت يمين انه ابني مو معي ولا راح اتعرف عليه من مرة هادا كله بسبب ابي وجوزي وبسبب المصاري اللي الله يلعنها اللي بتعمل البني ادم قذر لهدرجة وانا هلاء قاعده بدون ابني صارلي شهر تقريبا، هم حكولي بس على الورق كذبوا عليي واخذوا ابني مني وراح على اسرائيل والله اعلم وقت ئيش راح اشوفه، ليه الدنيا هيك قاسية معانا عاد والله انا عمري ما اذيت احد اتزوجت غصب عني وعشت حياة مأساوية عند اهلي وعند جوزي اهلي اللي ما فيهم خير واللي جوزوني صغيره لواحد كبير بالعمر ومطلق وعند بنت عمرها 7 سنين ، ليه الاهل بيخلفونا ازا بدهم يرمونا هالرمية المشكلة انه ابي ايده في ايد جوزي التنين (انجس )من بعض وانا تعبت من هالحياة ليه احنا دائما بندفع ثمن اوساخ اهلينا شو ذنبنا والمشكلة انا بنتزوج على اللي اوسخ .... انا اشتقت لابني كتير ونفسي اشوفه انا شو ذنبي ازا هم كذبوا عليه وابي مثلهم كذاب بدي اعرف في مين انا لازم اثق هلاء لا اب منيح ولا ام ولا جوز وابني اخذوه مني عشان الهوية الاسرائيلية وانا امه هويتي ضفة ممنوع يعيش عندي والحل لوينتا راح اضل هيك عايشة ، كل اشي ممنوع ممنوع ممنوع ، طيب الانتحار حرام والحياة اللي انا عايشها هادي (حلال) يعني ، الله ينعن ابو اسرائيل على الهوية على الضفة اللي معيشيتنا في هالظلم والمشكلة من مين من اللي حولينا واللي اقرب اللنا ، اقسم بالله اني كرهت حياتي واحتقرت العالم باللي فيه بسبب هالجوز اللي عندي وهالاب الطماع الي ما فيه خير لا هو ولا احد من هالعيلة النجسة ، بنرد وبنعمل كل شيء اللهم وفوق هيك بيذلوني هلاء معقول هيك هي الجيزة والاهل معقول طيب ازا انا اتالمت في يوم من الايام وين اروح ولمين ، يا الله معقول انا لهدرجة رخيصة قاعديني يدفعوا فيه مصاري لابي وهو ليش يقبل وهم ليش بيعملوا هيك ، اااااااه يا رب ،انا بدي اشوف وين هالجنسية الاسرائيلية راح بتاخذهم وشو راح تعمللهم ، حكيت مرة هادا الحكي اللهم سالتهم شو راح تعمللك قال جاوبوني ( بنشوف وجه الله فيها)شوفوا هالجواب اللي جاوبوني اياه والله راح اموت من التفكير بهالدنيا واللي قاتلني اكتر انه ابني بعيد عني وما بحكي معه غير في التلفون والمصيبة انه ابني اتعلم عبري (اللغة الاسرائيلية)حكيتلهم انا ما بعرف عبري ومش فاهمة على ابني ؟؟ حكولي اتعلمي عشان تصيري تحكي معاه بالعبري وما تحكي معاه بالعربي عشان خلاص هو هلاء صار اسرائيلي ..... اكيد بتحكوا شو هادا اللي بتخبصوا وشو هادا اللي بتحكيه بس اقسم بالله هادا هو اللي بيصير وانا راح اموت من التفكير مش عارفة شو اعمل وكيف بدي اتصرف مع اهلي ومع ابني وجوزي، والله احتقرت كل اللي حوليه من كثر ما هم خبثة وكذابين وما بيخافوا الله ... بالله عليكم شو رايكم باللي بيصير هادا ، حرام ولا حلال انصحوني شو اعمل ، والله تعبت