جراسا -

انا فتاة في منتصف الاربعينيات انسة وموظفة حكومة ولم يسبق لي حتى الخطوبة من قبل .لما بيتقدم لي عريس بطبيعة الحال وبحكم سني وعمري عادة بيكون بالخمسينيات ..بالنسبة الي ما في مشكلة بالعمر لاني انا برضه مو صغيرة ولكن الي بيحصل انهم كلهم لما بيتقدم لي سواء بهالعمر او اكبر شوية بيكون اجتماعيا اما ارمل او مطلق يعني في عنده اولاد ولهادا السببب.بيفترض عليي او بيشترطو انه اترك الوظيفة (وظيفة الحكومة ).

استقالة تامة ولا حتى بيقبلو اني اعمل اجازة بدون راتب والسبب انهم بدهم حدا متفرغ لاولادهم الي معاهم بالبيت .وطبعا ع طول برفض الامر لاني بشوف وظيفة الحكومة مش مزحة تنترك بهالسهولة .

بعدين كانسانة ما عندي احساس الام تجاه هالاولاد لحتى اخاطر بمستقبلي واترك وظيفتي كرمالهم..ومو ضمنانة اني رح ارتاح بحياتي معاهم (واعتقد اني محقة بشعوري هادا ).

وطبعا الاباء انا ما بلومهم لما بيطلبو هيك شرط احترم ظروفهم واعقدر ما تعنيه قسوة الحياة على الاب المسؤول وهكذا مصلحتهم بتقتضي ولكني اقع في حيرة بين فئات الناس من هم حولي بسبب اختلاف الايدولوجيا وتباين الاراء لما بيتقم لي العريس منهم اجد في نفسي في رمال متحركة فمنهم من يؤديدني برفضي ومنهم من يعارضني بذلك وبسمع عبارات كتيرة ...منها الحقي جيبلك ولد ولا بنت..وضل رجل ولا ضل حيطة ..ابوكي مات وبكره امك بتموت ما حدا مخلد.بلاش تعيلي عالة على اخوانك..ومن هالقصص.

انا عايشة ببيت والدي رحمة الله عليه وعلى اموات المسلمين جميعا مع امي .ولكن يبقى وجودي بالبيت حملا على غيري..انصحوني بما يرضي الله ورسوله

اترك وظيف الحكومة ...استقيل !!!!واقبل بالزوج القادم ؟؟ولا اترك نفسي في مهب الريح كما يشعرني المجتمع اذا لم اتزوج...؟علماانه ما عندي مانع ارتبط بارمل او مطلق بس يكون موافق على بقائي بوظيفتي ..جزاكم الله عني خير الجزاء