جراسا -

سلام عليكم ، انا مهندس باشتغل في الخليج من حوالي 13 سنة ، متجوز و مراتي و الولاد قاعدين معايا هنا ، والدي اتوفي و ورثت مبلغ الحمد لله مش بطال خالص ، حطيته على تحويش العمر و قررت ابني عمارة صغيرة في التجمع . العمارة الحمد له خلصت على 8 شقق ، احنا خدنا دور كامل و كل واحد من الأولاد شقة يتجوز فيها . يتفضل 4 شقق قررت ابيع اتنين و نأجر اتنين و كدة نقدر الحمد لله نرجع مصر نرتاح من الغربة . أخر أجازة كنا بنشطب شقتنا و بنفرشها و عملنا عزومة كبيرة لأهل مراتي و أهلي ، أثناء العزومة حماتي و اخوات مراتي ماكانش ليهم سيرة غير ان المكان عاجبهم و عايزين ينقلوا التجمع . و حماتي قعدت كل شوية توشوش مراتي و تاخدها على جنب ، وانا مش عارف فيه ايه . بعد ما مشيوا لقيت مراتي بتقولي ، ايه رأيك نفاتح ماما و بابا انهم ييجوا العمارة ياخدوا شقة ، قلت لها مش مشكلة بس بالنسبة للسعر انا طبعا مش هاتعامل معاهم زي الغريب دول اهلنا . لو هيأجروا هناخد نص المبلغ اللي بنأجر بيه ، و لو هيشتروا مش هاخد منهم غير سعر تكلفة الشقة اللي هو كان ساعة ما بنينا غير دلوقتي طبعا .يعني تقريبا تلت سعر الشقة . لقيتها اتنرفزت و قالتلي انت عايزني آخد فلوس من أهلي في عمارتنا ؟ قلت لها مفيش حد بيوزع شقق ببلاش .ان ممكن آخد منهم المبلغ قسط مثلا ، رفضت و غضبت عندهم ، ومن ساعتها مفيش لا حس و لاخبر ، كلمت ابوها قالي بقى بعد ما وقفت جنبك في غربتك بتبخل عليها ان أهلها يعيشوا معاها ؟ و قفلنا على خناقة. انا مش عايز أخسر مراتي و لا اهلها بس هم فعلا طماعين . و الولاد متبهدلين في النص.و بعتتلي مع حد معرفة ان آخر كلام عندها يا تكتب الشقة باسمي و أهلي ييجوا يقعدوا فيها يا نتطلق......؟؟
فما الحل ارشدوني