الحمد لله الذي شرف المسلمين بنعمه هو من بها على عباده وجعلها ركنا من أركان الإسلام السمحة ، رحلة يتمناها جميع المسلمين على وجه الأرض ؛ رحلة الحج ومن هنا نقول لجميع الحجاج حجا مبرورا وسعيا مشكورا وذنبا مغفورا وللحاج أبو حمدان أيضا 00 لكن دعونا نتلمس فرحة الحاج أبو حمدان في ديوانه بعد عودته ،
أبو سالم والأهل والأقارب الكل بانتظار عودة أبو حمدان من الحج ‘ الديوان ممتلئ بالأحبة وأم حمدان أولهم،
أبو حمدان يقبل على أهله مسلما عليهم فردا فردا ؛ الفرحة تغمر الجميع بقدوم الحج أبو حمدان والعيد عيدين عيد الأضحى وعيد عودة الحجي بالسلامه ، أبو حمدان : كل عام وانتو بخير ،وبعد ما تطمن على الجميع تهافتت عليه الأسئلة، وشو عاد كيف الرحلة ؟ وكيف الإجراءات ؟ أكيد ما عانيتو لأنه وزارة الأوقاف ما قصرت كل يوم كنا نشوف عالتلفزيون ،ويقولوا إنه الحجاج الأردنيين بخير 00الخ أبو حمدان : الحمد لله إنه الله رزقني وقديش دعيت إني أحج والشكر لله استجابلي ؛ لكن شو بدي أقول غير إنه يا إخوان مش كل اللي بتشوفوه على التلفزيون صحيح ،والله إنها مشقه وعذاب و كله باجره ،رحنا بحجوزات عن طريق مكتب سياحي وما كان زي ما بدنا،أول إشي السكن كان كثير بعيد و بيه عشرين سرير ، وكله وسخ ولما رحنا اشتكينا قالونا الحق على المكتب !!وبعدين لو بدك تحط بيه شوية جاج ما بقاقن من عدم النظافة(أي السكن لا يليق بالحجاج ، اتقي الله يا مكاتب السياحه و يا وزارة الاوقاف بالحجاج ) 0
أبو سالم :له له هاظا مش حكي لعاد،لعاد اللي شفناه شوهوه؟ أبو حمدان :هظولا حجاج وزارة الأوقاف .
أبو حمدان : بصراحة الشرطة الأردنية من أحسن ما يكون على الحدود ؛ أبس يا خوك لما طلعنا بيقولوا معكوا مرشد يا إخوان والحقيقة لا بيه مرشد ولا إشي كل واحد خيوه مشى على راسه ؛ وبعدين ولا بيه إشي منظم السكن ما كان كويس لا بمنى ولا بالمدينة والبعثة الطبية بأخر ما عمر الله(اتقي الله يا وزارة الاوقاف و المكاتب السياحيه بالحجاج) ؛ أما وزارة الأوقاف بالأردن كان إلها ناس محددين اللي طلعوا عن طريقها بس أما اللي طلعوا عن طريق المكاتب حدث ولا حرج حتى إنه الواحد حس حاله إنه مش أردني ،كان بنفسي يسأل علينا أي مسؤول أردني من طرف الوزارة حتى يشوف حالنا ؛والله صرنا ندور على علم الأردن حتى ندل أهلنا وجيرانا والحجاج الأردنيين أبس ما كان بيه إشارات بعكس الدول الثانية كل دوله معلمه حجاجها بإشارة ؛وعند رمي الجمرات وينا وين المكان بصراحة العبادة حلوه أبس الحج ما كان منظم والحق كله على وزارة الأوقاف لازم إنها تراقب المكاتب من حيث السكن والحافلات والمرشدين مش كل واحد على كيفه 0 أبو موفق : أبس اسمعنا إنهم أعطوكوا مطعوم الأنفلونزا صحيح يا حجي ؟

أبو حمدان : بالنسبة إلنا ما لقينا دكتور أردني يفحصنا أبس مرضنا صرنا ندور على الكبسولات والريفانين وما لقينا غير حبتين مع شب أردني وشوه بدهن يكفن وأكثرنا مرض هناك ولا حد دري بينا يس لولا رحمة الله ،وما كان أملنا هيك بوزارتنا اللي صرنا نروح نتعالج معالجه خاصة لأنه ما بيه ناس يشرف على أمورنا الصحيه ولا أكلنا ولا شربنا فعلا هون بدي أسأل: صحيح إحنا أردنيين وبالرغم من كل هاظا اللي صار إلا إنه وإحنا راجعين شفنا الفرحة بعيون جنود أبو حسين عالحدود وكلامهم اللي كله لطف ،وبسمتهم اللي أنعشتنا وقتها حسينا إنه فعلا هسا إحنا أردنيين الكل هنانا بالسلامة والشباب بالجمارك الأردنية كلهم لطاف ولا ننسى إنه هاظا الإشي من معلمهم تعلموه من سيدنا الملك عبد الله يمد بعمره وانشاء الله فرحة الحج يطعمه ربنا لكل مشتاق 000 الواحد بظل يسولف عن رحلة الحج طول العمر 00 أبس بقول للأوقاف إتقو الله بحجاجنا اللي بكونوا طالعين عن طريق المكاتب السياحية، أبو سالم : بلكي عالعايش السنة الجايه نترافق عالحج

أبو حمدان : إنشاء الله ما انته عارف إنه لولا الوزارة لغت كوتة الحج تبعة النواب كان ما طلعلي حج أبس الله يطعمك إياها وبتشرف برفقتك، أبو سالم : بكره بتتفضلوا عالغداء بمعية الحجي أبو حمدان 0

أبو حمدان : عقبال عند كل الحاضرين أبس إنتو سألتوا وأنا جاوبتكوا الصح وكل إشي بالدنيا بده تقوى .

نشكر سيدنا أبو حسين والحكومة الأردنية ،والجمارك ،والشرطة ، وكل إنسان سهر من أجل راحة الحجاج الأردنيين وأقول لهم حجا مبرورا إلا أننا كأردنيين لا نرضى إلا بالأفضل لحجاجنا وما حصل مع أبو حمدان ما كان ليحصل فيما لو تكاثفت الجهود وتم التنسيق والإشراف الكلي على حجاجنا من قبل وزارة الأوقاف كبقية الدول العربية ، ونتمنى أن تنظر الحكومة في وضع المكاتب السياحية وأن يكون لها اليد الطولى في الإشراف على هذه المكاتب التي يقع الحاج الأردني وغيره فريسة لاستغلالهم ؛ فلنتقي الله يا وزارة الأوقاف فالمتعارف عليه بأن السفر عناء ومشقه فما بالكم بالحج بين الملايين ، في نهاية المطاف نقول للجميع حجا مباركا 00 ،وعودة ميمونة ، وجهود مشكورة لسيدنا أبو حسين ولجميع رجال الأمن.

وإلى اللقاء -------------------------------------------مع أبو حمدان ضمن ما نعيش من يوميات أردنية .

وكل عام وأنتم بخير
 hikmat_b@yahoo.com