في أحد اجتماعات مجلس الوزراء ..اشتكى الرئيس بأنه لحد الآن مش قادر يفهم طبيعة الشعب ..تيجيلو هيك ؛ بيجيلك هيك ..تطلعلو لفوق ؛ ينزلك لتحت ..!! وقال : بدي حل يا إخوان ..بدون ما نفهم شعبنا ماذا يريد ؛ لن نستطيع حل أية مشكلة ؟؟ ..تنطّع أحد الوزراء وقال وهو يفرك بإيديه : إعزم الشعب على منسف وخلّيه ( عشا صراحة ) ..!! فصدّه الرئيس : اسكت بلا كلام فاضي ..أي العشا يريد ميزانية وعشر ملاحق ؛ مش ملحق واحد ..!! ابتسم وزير آخر وهو يعدّل ربطة عنقه وقال : ما فيه إلاّ الشلاليط ..نجيب الشعب بالدور ؛ وشلاليط ليوم الشلاليط ؛لحد ما يِقرّ هو شو بدّو ..!! فصرخ به الرئيس : شلّوط لمّا يبعثرك ..أنا أضرب شعبي شلاليط..!!

وفي غمرة ذلك ..تنحنح وزير وهو يعلك ( علكة ) : يا سيدي ..ما فيش إلاّ حل وحيد ..نفتح مصنع واحد فقط للعلكة ونوزع على الشعب علكة من إللي تُنفخ ..وهيك الشعب ينفِّس عن حاله بالنفخ والمط ..ويطلع الحكي معه طَقِع عَ الآخِر..!! أعجب الرئيس بالفكرة وقرّرتنفيذ الفكرة فوراً..!!

بعد مُدّة ..وفي اجتماع لمجلس الوزراء ..قال الرئيس : خطّة العلكة فشلت يا اخوان ..الشعب بطّل يحكي بلمرّة ..كل يوم ينفخْ ويطقِّعْ بالعلكة و بس ..الشعب مش فاضي يحكي من العلكة ..انفضحنا بين العالم ..حتى الناس إللي يعملوا معهم مقابلات بطقّعوا ع الفضائيات ..انفضحنا يا جماعة انفضحنا ...!! فقرر المجلس بالإجماع إغلاق مصنع العلكة الوحيد وعودة الشعب إلى حالته القديمة ..!!

بعد مدّة ..وفي اجتماع مجلس الوزراء ..ضج الوزراء ..قال أحدهم : الناس ما بطلت حكي يا سيدي ...قال وزير آخر : أكلوا راسنا بالطلبات ...واشتكى آخر : بدي أستقيل خَلَصْ خَلَصْ الناس ما بترحم ..وقال ..وقال...وقال ..!! المهم ؛ كلهم أجمعوا على أن الشعب فتح حنفيّة فمه على الآخر ومش قادرين يسكروها ...!!

في نهاية الاجتماع ..صدر قرار بالإجماع بأن الحكومة ستفتح ثلاث مصانع علكة في كل محافظة وأن العلكة ستوزّع بالمجان ..وأن الحكومة تهيب بالشعب بأن يأخذ حريته تماماً بالنفخ والتطقيع بالعلكة ..ويجعل لا حدا حوّش...!!

abo_watan@yahoo.com