انواع النواب


بعد اقل من 10 ايام ، سيدخل المجلس القادم العديد من النواب كما دخلوه اول مرة ، كما سيدخله العديد لأول مرة ( وكلهم لن يعلو علوا كبيرا ) ، وعلى المكشوف رح تكون القصة كلها وسوف تكون خريطة المجلس الفسيفسائية ( مخلوطة بقشرها ، متداخلة بألوانها ، مخربطة بأهدافها ) يعني طعة وقايمة عشان هيك رح يكون النسيج النوابي مزركش ، واحيانا مرقّع .

فهذا نائب ابن كتلة ، وذاك ابن دائرة وتلك بنت الكوتا وهذي بنت عادي ( مش كوتا ) وهذا من اين جاء ؟ ومع مين ؟ مين ابوه ما حدا بعرف لا هو( كُتلي ولا هو دائري ولا كُوتي ) .

هؤلاء هم نوابنا الكرام ، بالشهر الاول رح يقعدوا بالمجلس بلشانين ب الجوازات الحمرا ، وكراسي المجلس المنجدة والمايكات اللي قدامهم وفترة بعد الظهر هي فترة تجريب المايك اذا كان يحكي ويوصل الصوت او لا ، وما ننسى ان كل نائب له مكتب بكنب وبرادي وكيف رح يكون لبس مدير المكتب مناسب مع لون الفورمايكا او السجاد او لون عيون سعادته . الشهر اللي وراه يعملوا السادة على اختيار اللجان الدائمة للمجلس يعني ( توزيع مناصب ) جديد حسب الطول والنصاحة والحلاوة .
وهيك نوابنا رح يخرجوا البلد من الوضع الحالي ، بصراحة شو تتوقع من نائب ( لقلاق ) وكثير حكي او نائب خانس ولا نفس بس يلعب بالمكتة والمايك ,او نائب عانس همّه يخش الدنيا وهناك نائب متمكن من النيابة واخر متدرب جديد وهون نائب ولا ( طخة ) ولا معه خبر وهذي الزاوية من المجلس محجوزة لكبار السن منهم وعند المدخل ايضا محجوزة لذوي الاحتياجات الديمقراطية ، اما قدّام اكيد النواب الفرافير والنواب الحلوين العشريين .

وعلى المقاعد الخلفية اللي ما فيها اضاءة ساطعة يجلس النائب البشع النكد ( اللي شايف حاله ) وبحده نائب حوت بطنه اجرب ( ياكل الضب ) وبجانبه نائب سمكة بدون خياشيم .

اما بنص المقاعد يجلس نائب مقروص من المجلس السابق يليه نائب مقروص من الناخبين ( كيف نجح .... الله اعلم ) . وعلى جانبيّ الرئيس نائب ( مهرمن ) ثم نائب نبت شيطاني واخيرا يجلس بصمت محاولا الفهم ( نائب بعل ) مش مصّدق ان هون ، وهكذا تكتمل فرحة الاردنيين بديمقراطيتهم العجيبة ، ونوائبهم اللي رح يكونوا مع الزمن على المواطن يسلخوا جلده وعلى الوطن يدوسوا على ما تبقى من مقدراته



فيصل البقور



تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات