دخان المرشحين


من زمان , واحنا نستنى كشعب , تجي حكومة تخلي الشعب يفش ( غلّه ) بشي ,فكانت حكومة ابو زهير , التي اسقطت المقولة الشعبية ( عمر الحكومة ما رفعت شي ونزلته ) , لا ياعمي الحكومة نزلت سعر الدخان , وهسا بمقدور الشعب الاردني كله انه يدخن , ويعج على اي نوع دخان بده اياه , وكمتنفس للكل تقدر تدخن من ابو ( الليرة ) لما البراطم يقلب لونهن اصفر , و اسنانك ( تكت ) وتقع على الارض , وحتى ما حدا يقول ( الحكومة ) ما خلت شي الا ورفعته , لا لا روح عنّها وغير على اي دكانه , واشعل سيجارتك وانفخ لما الشدوق ( تبلّون ) , وهيك صار بمقدورك تطلع باكيتك من الجاكيت , بكل جرأة , حتى لو كان اكثر من واحد سلبطجي بالقعدة وطلب يدخن منك ,
مش مهم الدخان كثير ورخيص , كمان من اليوم مالك حجة الدخان الوطني ارخص من الاجنبي , لا تقول لي مهرب او لبناني او سوري ( انسى ) .

ومع اي ضائقة مالية تمر على المواطن , وحتى ينفّس شويه , يقدر يعفط له باكيت , وينسى الوضع , ومع ازدهار الدخان الوطني , تبعه ايضا ازدهار ( بالولعة ) , قداحات فيه , 10و15 قرش , ومع نقيب الكباريت ( 3 نجوم ) , تقدر تولع السيجارة وانت قاعد بالدار اما القداحات ولع وارمي فتستعملها اثناء القيادة , واذا ما ولعت ترميها من الشباك , اما القداحات اللي تتعبا غاز يمكنك ان تستعملها , في المناسبات العامة مع باكيت دخان من الغالي , على اساس انك (برجوازي ) .

وبالمناسبة واحنا بعز المربعانية الانتخابية , قد يكون من المناسب توزيع الدخان بدل من الوربات او الكنافة في المقّار الانتخابية , وبدل من شراء الاصوات غير المرّحب به والمحرّم , فأني الفت نظر مرشحي الشتوية الباردة ’ انهم يعطوا الناخب ( مونة ) سنة دخان مع ولعته , وانا على يقين ان الناخب عمره ما ينسى المرشح طالما الدخان طالع من ثمّه واكيد رح يصوت له , ويجوز يعلم اولاده الدخان مش مشان الدخان لا من اجل ان يتذكروا سعادته مع كل سيجارة ويتذكروا شعاراته مع كل ( قدحة ) , ويتذكروا كيف راحت اصواتهم بالهوا زي الدخان , وهيك الكل رح يهز راسه ويدعس على السيجاره مش شي ثاني .

وشعار المرحلة القادمة للمجلس القادم ( برابيش ارجيلة ) لكل ناخب.......

فيصل البقور



تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات