حرامي.. بين الأول والثاني ..
الأول : ولك في واحد أمين .. سمعت عنوا
الثاني : شو اسمه أمين ايش
الأول : لا و لك يا حمار أمين يعني شريف
الثاني : بالله عليك وين هذا وشو عمل.. ؟
ينظر الى مجموعه من الناس ويقول له
الاول : شايف هـــــــــــــــذاك اللي هناك لابس احمر
الثاني : ايوه
الاول : مش هو ولا اللي بجنبه امشي كمان بنفس الخط شايف محل ألخضره ..بعدها اطلع مليح في محل حلويات هناك بعد المرة اللي بتشتري
الثاني: ايوه اللي بجنبها ...!!
الاول : لا ولك هذا حرامي بدو يسرقها
الثاني : اللي لابس اصفر
الأول : لا ولك هذا نشال واللي وراه اللي لابس ازرق يسرق ساعات ألمي عرفته
الثاني : طيب معناه البنت اللي واقفة هناك
الاول : لا ولك هاي بنت ليل بتصيد خرفان بتنصب عليهم وتتبلي عليهم
الثاني : ولك سطحنني وفريت قلبي .. طيب مين
الاول : امشي بعد العربايه اللي صاحبها حاط مغنطيس تحت الميزان هه اللي لابس بني يا دوب مبين .. لانو بياع العصير مغطي عليه بكياس التمر اللي بضحكوا عالناس فيها كلها قرف .. وتخبيص ولاد ونسوان بحوسوها باديهم والناس نازله كربعه فيها ...
الثاني : آه هذا عرفته الهبيله للي كتبوا عنه في الجريدة ( مواطن شريف يجد مبلغا من المال وسلمه لمدير الأمن العام ) ... !وجابوه في التلفزيون
الاول : ايوه هذا هو !!
الثاني : .. بس بتعرف هذا معهوش يوكل وراح سلم المبلغ بقولوا مبلغ محرز
الاول : شايف يا خوي الدنيا لسه فيها خير
الثاني : عش رجبا ترى عجبا
الأول : ولك شو قصدك ..
الثاني : شايف يا خوي وصلنا لزمن ندور فيه على الشريف والعفيف وابن الحلال واللي ضميره حي ونكتب عنه في الجريد ه والتلفزيون .. وصار اشي نادر وغريب في مجتمع إسلامي
الأول : حتى انه اللي زيك بطل يعرف معنى كلمة أمين وشريف ..
الثاني : معاك حق لأنو بطلنا نستعملها
الاول : يا خوي مهو فيه ناس كثير اسمهم أمين وشريف
ينهض الثاني ليغادر فقد نادته مرنه من الشباك .. وما أن نهض حتى افتقد جهاز الخلوي
وبعد ان بحث عنه سال صديقه
الأول : ياخوي شفت تلفوني هسه كان معاي كنت هون حاطه على الحزام
الأول يصرخ فاجرا: شو مفكرني حرامي ولك انا اشرف من الشرف روح شوف تلفونك وين انسيتو عند مين كنت , عيب عليك تتهمني واحد ما بتستحي شايف هاي تلفوني بأيدي هذا إلك لا طبعا ولك أنا بصلي الفجر في الجامع والظهر بالمول والعصر بالحدائق والمغرب بتلاقيني بالتجمعات بطس بالركعات
الثاني ياخي أنا سألتك بس ما اتهمتك وهذا مش تلفوني استر علينا انفتحت مثل البالوعة
فجأة يرن التلفون في جيبه الأول فيلتقطه بسرعة دون تفكير ويرد عليه ..
الو مين بدك جوزك هيو احكي معه اسمعي قولي .. لجوزك ما يتهم الناس بالسرقة إحنا اشرف من الشرف
رب اجعل هذا البلد آمنا
سامح الدويري