هذه الحكومة حكومة الذوات ، حكومة الإعداد للانتخابات وهي من أجل البلديات ، حكومة شد الأحزمة والتقشفات حكومة رفع الأسعار والمشتقات ، حكومة كل إلي معاك هات وراح نخليك عايش في الآهات .

ولكن يا صديقي اسمع شو بدي أقولك . ؟؟

يا صديقي هيئ نفسك ، فلن تسمع بعد اليوم ما يسرك لا من أخوك ولا من ابن عمك ، فليس لك إلا الحكومة لتحمل همك و تعمل بكل طاقتها لتفريغ جيبك وطبعا لن تستطيع أن تفتح ثمك ، وإذا مش عاجبك رفعنا الأسعار غصبن عنك وإذا بدك تعبر انزل على الشارع واحكي رأيك ، وشوف مين راح يسمع صوتك أو يسأل عنك ، ومن الآخر يا مواطن انت شو بدك حرية ..... إصلاح .... انتخاب ... إحنا جاهزين وتحت أمرك ... لكن طبعا مش مثل ما بدك ، إحنا حكومتك وبنفهم أكثر منك ونعرف شو إلي فيه مصلحتك ، إذا شو الداعي تتعب وتغلب نفسك ما دام في حكومة بتحمل همك ، وانت عندها أغلى ما تملك وهي بأزمة وبحاجة لدعمك وكل القرارات هي من أجلك ، أربع حكومات بسنه ونص وطبعا تنفيذا لرغبتك وكل هي الحكومات لخدمتك ثلاثون وزير من الآخر ومثل ما بدك ، وكلها شهرين زمان وبتحل عنك تقاعد ورواتب وألقاب حرام ما هم من أبناء شعبك وبعدها حكومة جديدة برقم جديد وكمان مسخرين لخدمتك .

بس انت لا تفكر ولا تغلب حالك و لا تقول الحكومة بتعكر دمك ولا مجلس نواب يشلك ويرفع ضغطك وأخذ الدعم والامتيازات وتركك بهمك ، وجلساتهم معظمها معارك يعني إلي بده يسير نائب لازم يكون في دورة كاراتيه مشارك .

لذلك يا صديقي اعمل لأخرتك وفكر بنفسك ، وسيبك من الحكي الفاضي إلي ببقولك ما في حرية ولا إصلاح والفاسد أكل حقك وباع أرضك ، كلها إشاعات والهدف منها تهز ثقتك بنفسك ، صدقني الحكومة بتحبك وبتفكر وبتقرر لمصلحتك ، وكل همها كيف ترفع الدعم عنك ، وتسدد العجز إلي يقولوا انه حصل بإهمال منك ، لأنك كنت ساكت والأمور ماشيه من وراء ظهرك ، وانت كنت عارف بس بتقول يا ولد خلي العقل منك لأنك بتعرف شو عواقب حكيك .

وأنا أسف أكيد أزعجتك .......أنا حبيبت اوضحلك شو بتعمل الحكومة لأجلك ، بس صدقني ما إلك إلى تدعو ربك لعله يرفع الضغط والظلم والغضب عنك ، ولكن المصيبة إذا ما استجابلك ربك ، مش عارف بعدها شو بدي أقولك .

زيد عبد الكريم المحارمة