بطريق الصدفة لا على البال ولا على الخاطر في احد المستأجرين بالعماره اللي انا ساكن فيها بدو يرحل .. وبلش يبيع اثاثو من باب خلص قرف العيشه ..هيك استنتجت .. وين بدو يسكن وين بدو يروح ما بعرف هو بدو يشتري اثاث جديد او بدو ينام بالشارع او بأحد ( المغر) برضو مش عارف ..
من ضمن الاشياء اللي بدو يبيعها ( ماكينة خياطه) فعرضتها زوجته على زوجتي .. مهي المسأله بتبلش من عند النسوان بعدين بتقدم الازواج للتفاهم على السعر وطريقة الدفع .. لعاد انا شو وظيفتي بهالدنيا غير اني ( محفظه ) ..
تفاهمنا على السعر.. وعتلت الماكنه من الطابق الرابع الى الارضي .. هي عباره عن ماكينه عمرها لا يقل عن 25 سنه تقريبا .. عليم الله انو (هتلر) خيط فيها سروالو الداخلي قبل ما تتنقل من دوله لدوله ومن بيت لبيت ومن حي لحي ومن دار لدار ومن ست لست .. أجريت عليها الصيانه اللازمه .. والصيانه كانت محصوره بس ( بالتزييت ) مفش غير هيك هو انا بدي اخترعلها (ابر ) ولا (مكوك ) .. ارضينا فيها على حالها وما شا الله عنها بلشت اطرز واتخيط واستبشرنا خير فيها .. كانت النيه تتجه من شرائها للاستخدام المنزلي .. لبنطلون مفروط .. لسحاب فلت .. لرقعه ... خياطه وجه مخده .. لكن طلعت الشغله براسي وصرت افكر استغلها للعمل التجاري انا وزوجتي طبعا ... للجارات .. للقرايب .. يعني فكرنا انها ممكن اتحققلنا دخل اضافي اذا اجدنا انا وياها فن الخياطه والتطريز وكمان التفصيل .. وبلشت اجيب كتب عن الخياطه للتعلم وانطبق على (اواعي/ ملابس) ما بدناش اياها .. يا اخي الشغله فكرناها سهله طلعت صعبه وبدها نباهه ومخ صافي .. وانا بفتقد للشغلتين هذول وزوجتي شرحي .. زيي يعني .. اي انو نباهه ومخ فاضي وبجيبتي ثلاث فواتير .. ..
انقرر انقص قماشه من اجل عمل تنوره بعد الخياطه تطلع (سروال داخلي) يصلح لكافة الاعمار كيف ما بعرف .. انقص القماش على اساس انو بنطلون ( جينز ) يطلع معانا بعد الخياطه والتطريز ( طقيه ولادي ) .. نيجي نعمل (بجاما ولادي ) يطلع معانا ( جوز جرابات ) ...حاولنا نحصل على كاتلوك ماكنة الخياطه لنفهم شو قاعد بصير .. ما قدرنا انحصلوا .. لنفاذ الكميه .. كميه ايش يابا هو ظل الها اصلا موديل ولا وجود .. ما شركتها زمان سكرت واتحول مصنعها لمصنع ( علكه مستكه ) .. حاولنا ان نجد العله ... وكنا نتسائل ليكون هذي الماكينه الها نمط وطريقه خاصه بالخياطه .. يا اما احنا مش فاهمين عليها يا اما هي مش فاهمه علينا ..
وصلنا لمرحله بسيطه متقدمه من التخييط مثل .. انو الخيطان وسيله جيده تستخدمها الماكينه للتخييط .. حركه الرجل على القاعده الحديديه بالاسفل تؤدي الى دوران عجلة الماكنه والتي بدورها تجبر ( الابره ) على الطلوع والنزول وتخزيق قطعة القماش هاي معلومه مهمه .. وعرفنا كمان انو التزييت بخلي الماكينه اكثر ليونه وهذي معلومه ايضا اكثر حساسيه .. واتعلمنا انو خياطتنا خليها (على البركه) ما توعد واحد بأِشي لا اتقول لولد من ولادك او حدا بدي اعملك قميص .. لانو ما بضمن شو يطلع معانا .. بلاش يتفاجأ الولد او الحدا انو اللي طلع ( شنطة ستاتي ) خليها على التساهيل .. واحنا خليناها على التساهيل .. حتى في جاره النا جابت بنطلون لجوزها عشان زوجتي اتظبطلها اياه من باب يعني انو احنا اشترينا ماكينة خياطه والكل صار يجيب اواعيه من باب حكم الجيره .. والله هاي بدها درزه .. وهاي اغلبك بدها تقصير .. وهاي (بردايه ) بدها خياطه على الداير .. واوقعنا بمطب الاحراج .. لا احنا عارفين انخيط ( انا حابب اتعلم خياطه عشان هيك بساعد زوجتي وبنظر عليها من باب انها غشيمه زيي ) ما انا لقيتها فرصه .. ومع هذا الناس مش مقتنعه انو احنا بطور التعلم والتدريب .. ولكن الناس امسهله الموضوع .. الجاره بدها اتقصر بنطلون جوزها .. قلت لزوجتي سيبيكي من هالشغله هاي .. بلاش اتخربي بنطلون زوج المره .. ما ردت .. من باب انو الشغله بسيطه .. انتهت العمليه .. وبعد يومين شفت جارنا لابس البنطلون بصراحه ما عرفتو من الوهله الاولى .. فكرتو زلمه مهبول .. معقول في زلمه بسنو كبير بالعمر لابس بنطلون ( برمودا ) .. قصير البنطلون كثير والله كثير .. ولما تلينا الحادثه هذه امام زوجتي استنكرت ونددت وجابت الحق على الزلمه .. بحجج ما الها طعمه وغير مقنعه .. البنطلون يمكن كش من الغسيل او ان الزلمه طول .. معقول بيومين الزلمه يطول ( متر ) والله كل اشي بصير الايام هذي .. ما عدنا شفنا لا الجاره ولا زوجها يا اما رحلوا او قطعونا .. والاحتمال الثاني اقوى .
والزيارت للبيت من قبل الجارات مستمره .. وبوقفوا الجارات فوق راس زوجتي على الماكينه .. على احرفيها على اليمين لا على الشمال وكمان اشوي ..عيدي الدرزه عليها كمان مره .. وكل ما تحرف زوجتي على اليمين او على الشمال ( اطق ) الابره تنكسر .. وبدل يلي بتبدل ... صرت اشتري ابر (بالكيلوا ) بطلت اتوفي معي ابره ابره .
قررت يوم اني اخيط بنطلون اللي هيك اشخص في بالشغل .. جبت بردايه قديمه ما بدنا اياها واخذت قياساتي ورسمت النموذج بسموا ( باترون ) على قطعه القماش ( البردايه ) وبلشت اقص .. ثم نقلت العمليه من ارض الواقع الى ارض الماكينه .. وبمساعده زوجتي الفنيه ( مهندسة الخيط ) وانا شاغري كان اسموا ( مهندس المكوك ) اما اولادي وزعنا عليهم شواغر الخياطه بالتسلسل ( فني الابره ) و (فني التزييت ) و ( مسساعدة قسم الانتاج لشؤون القماش ) ... وبلشنا نحيك ونخيط وندرز ذهابا وايابا على قطعة القماش المأمول منها انها تطلع بنطلون اللي اشخص فيه ... واستمرت العمليه قرابة الساعة ..
لما البست البنطلون ظهرت العيوب التاليه ...
1- انسينا نحسب حساب ( السحاب ) .. طلع البنطلون بدون سحاب .. وهذا يعني اما ان تعيد الخياطه والتفصيل من جديد او ان تقوم بالغاء احد الاعضاء بجسمك وتجميده من الاستعمال بفتره ارتداءك لهذا البنطلون .. وانا كنت افضل الخيار الثاني لان روحي فرفطت من التفصيل والخياطه.
2- انسيت احسب حساب ( الدكه ) من فوق .. مما اضطرينا نوخذ من مساحه (الخصر ) لخياطه الدكه ..فطلع البنطلون ( امشنغل ) اتشنغل .. وهذا بدورو سيؤدي الى عصر اجزاء من الجسم مما سيؤدي الى احتقان الوجه بفتره ارتدائك البنطلون .
3- حمدنا الله انو الارجل موجوده بغض النظر (غض النظر ) عن الاطوال .. خليها مستوره .. شو يعني رجل ( برمودا ) و ( رجل شلصتون ) .. شو يعني ما فرقت عن موديلات اليوم كثير .
4- (الجيبه الجنابيه) طلعت منحرفه كثير باتجاه الخلف .. فوقعنا بحيرة من امرنا .. كيف هو هذا البنطلون بنلبس من اليمين للشمال ولا من قدام لورا ولا العكس صحيح .. ولا بنلبس على وجهين .. هذا الاشي بقرروا (الكوى ) .
بعد هذه الحوادث ( التخيطيه ) على الاقمشه المختلفه قررنا تجميد عمل الماكينه من عضوية اثاث المنزل لاجل غير مسمى .. وتقتصر مهامها على الاشياء الخفيفه فقط لحين اتقان فن الخياطه والتطريز والتفصيل وقد لا يحصل هذا الامر بزمننا هذا ربما على زمن اولادنا .
ملاحظه : بطلت اتعلم خياطه وبديش اياها مصدر دخل اضافي .. معروض علي هسه (ماكنه لصنع البوظه ) .. بفكر اشتريها وعرضت الفكره على زوجتي قالت ما عندي مانع ... بس على شرط .. تعمل اللي وللولاد عملية ( شيل لوز ) .. لانو الظاهر والعلم عند الله انو ما راح حدا يشتري منك مما يضطرنا انو نوكل كل انتاجك .. لغيت الصفقه .. وعدت ادراجي على ماكينه الخياطة ازيتها .
والسلام عليكم
Burhan_jazi@yahoo.com