في واحد سجنو ودخل بسين وجيم عشان حط ابنو بالبرد حتى يعودوا على الظروف القاسيه ويشتد عودو .. هذا الحكي عند الاجانب ما بمشي .. على السريع معطو من دار الخلفو وجابوا على المخفر وسحبو الولد منو وحطو بدار الرعايه واعتنوا فيه .. والاب انمسح فيه الارض ..
وفي قصه ثانيه وحده بتلعب بنتها على ( مرجيحه ) قامت دزتها وهي بتمرجحها وقعت على صباحها شافوها الناس وشكو على الام .. على السريع وعلى طول ادخلت قوات الامن وسحبت البنت منها واعتبرو عنف اسري ضد الاطفال وحلفتلهم مليون يمين غلاظ انو مش قصدها وانها بتمرجح بالبنت وكانت ادزها وقعت بالصدفه ... ابدا وراسهم الف سيف .. انتي اهنت البنت .. انت لا تصلحي انك اتكون ام .. يا جماعة الخير يا عمي يا هو والله العظيم مش قصدي .. هاي بنتي اسألوها .. افحصوها .. مفيش فايده .. سحبو البنت لدار الرعايه وشحطوها على المخفر للام ودخلت بمتاهه لا الها اول ولا اخر.. وبعد تحقيقات طويله وممله وبالاخر بعد سجن وبهدله لمده سنتين سلمو البنت لامها .. يعني كمان شحطه كان سلمو البنت ( عروس ) لامها .. بس ربك ستر استلمتها ولسه هي طفله ...
هون مربط الفرس
هذا الحكي اللي قلتو سابقا كلو حصل بدول الاجانب .. وفي قصص كثير من هذا النوع ... نيجي لعند العرب ..
اي الواحد (بخمع ابنو خماسي ) بلزق راسو بالحيط ولا حدا داري .. اي مش بصلبوا بالبرد اي بكوي بالنار .. ويعتبر ضمن شرعية الاب او الام ... بفكر الوالدين حالهم انهم صنعوا هالولد صناعة بجهودهم .. بعرفوش انو مخلوق خلقه الله وله حقوق كاملة غير منقوصه ...
السؤال ؟
لو طبق الاجانب قانون العنف الاسري وبالاخص على الاطفال بالوطن العربي .. يا ترى كم طفل راح يظل عند اهلوا .. عند ابو وامو ... اي اكاد ان اجزم انو كل اطفال العرب راح يروحو على دور الرعايه ويسحبوا لولاد والاطفال من حضن ابهاتهم وامهاتهم ... وما يظل بالبيت الا الاب والام فقط ..
طبعا ناهيك عن الدعاوي ( يشحرك .. يعدمك عمرك .. اطلع بعزاك .. يكسر ايدك .. يغضب عليك .. ) وكثير الطفل يتعرض لالفاظ جارحه وقاسيه بالاضافه الى الضرب المبرح هذا تحصيل حاصل .. هذا الكلام مفروغ منو .. معقول في طفل عربي ما اكل قتله ( شلوت .. بكس .. خماسي .. سباعي .. قرص .. رفص .. رفش .. تمعيط شعر .. عصي .. قشاط .. حرق .. حرمان من الاكل والشرب .. ) مستحيل من المستحيلات .. ما حدا يقنعني .. وكلوا بدخل من باب التربيه .. لا والله يغزي العين .. قال تربيه قال ..مهو واضح .. لذلك وجدت ان احد اسباب عدم وجود مبدعين او متفوقين او علماء عند العرب الا ما ندر الا وهو ان الطفل من كثر العقاب على كبر بطلع مخلول عقليا وبنسب متفاوته .. خذني عينه ناجحه لهذا الاستبيان ..
انا شخصيا زي زي باقي لولاد اتعرضت للضرب من باب ( التأدب ) انكر .. اكذب ...لا والله .. هذا اللي صار ... الاعاقه تظهر عند ما الواحد يكبر وبنسب متفاوته بدون ان نشعر .. في خلايا بالعقل والجسم ابيدت وانتهت واضمحلت تلقائيا من كثر ما اتعرضت لعنف جسدي او معنوي .. والدليل انو انا شخصيا كعينه لا يوجد عندي اي نوع من انواع الابداع او الاحتراف او العلمنه او الفتاحه .. ونسبة ذكائي على ( خط الفقر ) يا دوب يعني .
العنف للطفل سلسله متكامله .. تبدأ بالتعويد من البيت ( تلين ) وتهيأه ثم المدرسه بتكمل المشوار .. وبعدين اولاد الحاره هوش بهوش .. ما في لغة حوار او نقاش او تفاهم منذ الصغر .. اتعودنا نوخذ حقوقنا بأيدينا .. في حين الضارب والمضروب كلاهما خسران .. يعني مستحيل واحد يدخل طوشه الا ويطلع بكمن بكس الطرفين معا او قلع عين او ممكن يسبب للواحد اعاقه اتظل املازميتو مدى الحياه .. اتعودتنا على الضرب والعنف والمداقره وعدم التنازل وركوب الراس .. وهذا الامر امتد الى الزواج ثم الى الاطفال سلسله متكامله لا تنتهي ابدا ابدا .. اول تعليم علمتو لولادي كلمة ( ديده .. بمعنى اضرب ) .. ( يلا يابا .. ديده على راسو .. تف عليه ) .. واحد عاش تحت ثقافة الضرب بكل مستويات الحياة وبيئتها المختلفة بالله عليك شو بتتوقع مني انو اعلم اولادي يعني .. اعلمو ( بوسو .. سامحو .. معلش يابا .. ) اعوذ بالله .. ما اتعودت انا على هيك .. اتعودت كل شيء ضرب .. عنف .. مصع .. معافطه .. مداقره .. مجاحره .. مطافشه ..
على مستوى كنا نلعب فطبل بالحاره .. انو يوخذ الطابه مني .. انو .. هذا انجن .. ولا انا .. انو اخذ منوالطابه داخل الملعب .. جنيت على نفسي .. بكسات شلاليت اتعرقل مباطحه لازم يوخذ منك الفطبل .. انو اتجيب ( كول ) اي بشل املك .. يعني حتى رياضتنا كلها عنف وضرب وتكسير .. اكون صادق معكم احنا لما كنا نلعب فطبل ( كره قدم ( صفارة الحكم ما تتوقف من اول المباره لاخر المباره ؛) كل لعبنا ( ضربه مباشره ( فاول) يعني .. لعاد .. لعبه ( الطماي ) ضرب .. لعبة (الخمسات ) ضرب .. لعبة ( حاكم جلاد ) هاي مش ضرب .. عشان الامانه .. كانت تلحيم وانتقام وفش غل وتنفيس عن كل مكنونات نفسيتنا المريضه كنا نلاقيها فرصه انمارس هوايتنا بتعذيب الاخرين لعاد .. نحن اطفال العرب .. اي حتى مظاهراتنا وثوراتنا العربيه ما بتمشي يومين الله وكيلكم سلميه الا وفورا بتقلب ( عنف ) وضرب وطخ ودبابات ودماء واشلاء وتفجير .. معذروين .. ما احنا على هيك نشأنا .. على العنف .. يعني بدكم ايانا بلحظه انصير اوادم .. مستحيل ... الاجانب اخر اشي بفكروا فيه العنف .. واذا استخدموا العنف بيستخدموا بتخطيط وذكاء ولتحقيق هدف وينتهي العنف .. احنا نستخدم العنف لتحقيق هدف وما بعد الهدف .. يعني لو ضربت واحد واستسلم بالنهاية واعتذرلك ما بتقتنع ابدا لازم اتكحلها بالاخر وتقلع عينو .. لازم لعاد... مهو استسلم الزلمه واعتذرلك وليش قلعت عينو .. ليش ( خصيتو ) سؤال احيلوا على علماء النفس .
من ذاكرتي .. يا باي شو اكلت عصي .. بعرفش ليش .. لا والله بعرف كنت شقي ... كنت طفل قرد .. بردش .. مشعوط .. راسي مدعدر .. جسمي بقع ازرق احمر اخضر .. نتيجه ..عض .. قرص ..هوايه عصاي .. شلوت على الطاير .. كف على الماشي .. مستحيل يوم كنت ما اكل فيه قتله .. وانا طفل طبعا .. وعلى كبر كمان ليش الحكي ..مرة اجيت اعلم فيها زلمه مع جار اللي ورفعت صوتي عليه والمشكله مشكله انو بسرق من خزان المي تبعي وانا معي حق .. لكن هذا الزلمه ما اتحملنيش نادى على اخوانو وهجموا علي .. مع انو المسألة والله العظيم مش مستاهله انو ينادي اخوانو يعني هو كان كافي يقوم بالمهمه هاي ويا دار ما دخلك شر .. بس شو بدك تعمل اجتمعوا علي اربعه الى خمسه .. اكلت قتله لما اتورمت وفحجت من كثر الضرب .. ما قدرت اقوم .. نسوني حليب امي ..ومن يومها عندي عقده نفسيه من ( المي ) لا بشرب الا ما ندر ( والحمام ) انسى .. بتحممش .. لانو المي بتذكرني بهذيك القتله .. واحد بصراحه خمعني بكس على ( حنكي ) قعدت تقريبا اسبوعين بس اشرب شوربه ... وظل يسرق مي عينك عينك امر من جنبوا واقولو يعطيك العافيه اجبلك سطل .. اساعدك .. في امكانيه اتخليلنا اشوي مي بس عشان نشرب .. كان مذوق الزلمه .. كان يتركلنا اشوية مي .. مهو انا ما وصلت للمرحله هاي الا بعد ان عرفت انو الله حق .. لليوم حنكي بجعني بعد مرور 15 سنه .
يعني عمليه الضرب والتعنيف سلسله متوارثه لا غنى عنها .. بدمنا .. بعروقنا .. اي والله مليون قانون عنف اسري ومليون قانو يمنع العنف بجميع اشكالو ما بنفع معنا احنا العرب .. دايما جسمنا بحكنا ... ( طبعا مش الكل ) لكن نسبه كبيره منا هيك .. وبامكانكم تعملوا استبيان وتتاكدوا .. اما اذا طلعت النتيجه عكس ما اتوقع بكون في خلل .. في اشي مش مظبوط .. فاما ان يكون وهكذا انا اتوقع انو الاطفال او لولاد او المعنفيين بجميع اشكالهم ( خايفين ) يجابوا صح على الاستبيان خوف ما ياكلوا قتله .
المقصود من الكلام هاذ باختصار .. ادخل بالموضوع ..
يا ريت يطبق عنا قانون او يتفعل بطريقه سريعه وحازمه والذي يتعلق بالعنف الاسري وبالاخص الاطفال .. لانو انا شخصيا ( اولادي ) (جننوني بالبيت ) لا بروحوا مدرسه وقلبولي البيت حاره وملعب انا شخصيا صار الفطبل ضارب براسي وقفاي 100 مره .. انا بعترف الى المسؤولين عن العنف الاسري .. انا يا عمي بضرب ولادي وبعنفهم وبعذبهم ومجوعهم ولاعن سلسفين اهلهم .. تعالو خذوهم على دار الرعايه وخذو امهم معهم الثانيه انا مش مقصرمعها بعنفها وظالمها .. تعالوا منشان الله .. بلكي بتعلموهم هناك بدار الرعايه وبطعموهم وبهدوا .. ما ظل اللي مخرج الا هيك .. اني اعترف بتقصيري وتجاوزي للقوانين وحقوق الطفل والانسان .. انا جاي برجلي لعندكو .. تعالوا .. عمركم شفتو واحد زيي سهل الاعتراف .. لانو والعلم عند الله اذا بتظل الامور هيك مأزمه راح يزيد العنف الاسري على حساب الاطفال والزوجه .. وهذه عواقب لا يحمد عقباها .. الاباء والامهات والاطفال او لولاد بالبيت صارو زي الديوك فش حدا ماين على حدا فش اشي يشغل لولاد غير اللعب والهوش .... صرنا مجانيين بالبيت .. شو اخرتها .. يعني .. انا خلال هذه الفتره ( الاسبوعين ) صار معي ضغط وبوادر سكري وبوادر جلطه طولها نصف متر من اعلى الكتف الى اخمص القدم .. هاي جلطه سوبر ديلوكس .. بنادول صرت شارب بنادول 60 علبه .. و6 كيلوا ( سكر فضي ) انبح صوتي على اقعد اهدى البد نام اسكت اخوك امك اختك الباب التلفزيون الكاسه الحنفيه )كمان اشوي والعلم عند الله بصير ( اتعاطى ها ).. هيني بقولكم .. وهيك بنكون دخلنا بمشكله اجتماعيه اخرى .. يعني هذه الازمه سينشأ عنها ازمات .. الله يستر .
ملاحظه : بدكو تيجو يا جماعة مناهضه العنف الاسري (محليا واقليميا وعالميا ).. عشان البس لولاد والمره كمان .. ويا ريت اتجيبوا معكم اذا امكن ( برهم للعضلات وحبتين ضغط وعلبتين بيبسي دايت .. عشان صار معي سكري .. فياغرا لا اتجيبوا معكم .. بطلت اخلف .. بطلللللللللللللت ).
والسلام عليكم
Burhan_jazi@yahoo.com