جراسا -

اخواني واخواتي القارء المحترمين
السلام عليكم ورحمة الله وبركاته
ما اود طرحه هو مشكله ماليه واتمنى من اصحاب الخبره بالامور الماليه والبنوك بمساعدتي بحلها
انا فتاه عمري 30 سنه، قبل ثلاث سنين قمت باخد قرض شخصي من البنك لشراء سياره بقيمة 7 آلاف دينار اردني على ان يكون السداد 150 دينار شهري وبقيت ملتزمة بالدفع اول سنه ونصف بدون اي مشاكل حيث كانت اموري المالية مستقره، كان راتبي عند اخذ القرض 380 دينار بدون الاقتطاعات وبعدها شركتي زادوني وصار 500 وبعدها وصل 700 دينار، المهم بعدها حصلت عندي ظروف منعتني من تسديد قرضي حيث مرضت والدتي واحتاجت لاجراء عمليتان وانا والدي متوفي وانا واخواني واخواتي بنشتغل وبنصرف على البيت، فاضريت اني ادفع جزء كبير من مصاريف المستشفى وطبعا كلنا بنعرف قديش المستشفيات الخاصة غالية.. وقتها رحت على البنك وطلبت اني اقوم بتاجيل القسط الشهري بس البنك رفض وانا ما كنت قادره ادفع فما دفعت، وبنفس الفتره تركت شغلي والسبب كان كثرة اخذ المغادرات والاجازات للبقاء مع والدتي بالمستشفي، بعدها فتره اتصلو فيني التحصيل وكان مكسور علي قسطين شهريين ورحت قابلتهم تعاملو معي باسلوب سيء كتير وحاولت اشرحلهم وضعي وانه عندي ظروف قاهره وطلبت انهم يأجلولي القسطين لاخر القرض بس رفضو وحكولي لازم تدفعي الي عليكي.
في شغلة بدي احكيها قبل ما اكمل انه لما زاد راتبي رحت للبنك منشان ازيد قيمة القسط الشهري بس حكولي اذا بدك تزيده بيصير بس اذا بعد فتره اجيتي اتنزليه ما بصير وانا من هبلي طنشت كان بقدر اني اسدد اقساط من الآخر بس انا ما اهتميت حكيت خليني ادفع على اقل من راحتي.
المهم نكمل بعدها احتجت فلوس وفكرت شو ممكن اعمل فرحت عالبنك وطلبت منه اعمل اعادة جدولة والبنك رفض فما كان عندي طريقه غير اني ابيع سيارتي وادفع جزء من سعرها دفعة اولى لشركة تمويل واكمل الباقي اقساط بس هيك راح يصفي علي التزامين بالشهر، قسط للبنك والقسط التاني لشركة التمويل وفعلا عملت هيك وصرت ادفع للتنين طبعا بعد ما رجعت اموري المادية تحسنت ودفعت اول سنه برضه بدون مشاكل بس انا كنت كاتبه للشركة شيكات بنكية في واحد من كل شهر وراتبي ما بينزل قبل عشره الشهر وخبرتهم هاد الحكي لما اخدت التمويل وحكولي ما في مشكله بنصرفهم بعد عشره الشهر، وبس بلش الجد صارو يتصلو فيي اول الشهر ويحكولي الموظف راح عالبنك ومافي رصيد وارجع اعيدلهم القصه انه انا حكيتلهم هيك يحكولي اوكي تعالي عالشركة ادفعي وفعلا كنت اروح على الشركة ادفع بس ما كنت آخد الشيك منهم واستمر الوضع هيك اول سنه بس السنه التانية رجعت الظروف ساءت معي وبطلت قادره ادفع لا للبنك ولا للشركة وصرت لما يصير معي فلوس اروح اودع بالبنك يعني شهر ادفع وشهر لا، توقعت يتصلو فيي البنك او الشركة بس ما حدا اتصل فيي، فحكيت يمكن شايفين اني عم بدفع مرات فعادي الوضع ولو بد هم يعملو شي بيخبروني واستمر الوضع هيك لحد ما رجع تحسن مرة تانيه ورجع استقر
المهم لما تحسن الوضع رجعت بدي اكمل اقساطي فرحت عالبنك منشان اعمل ايداع للفلوس وهون انصدمت انه البنك حاططني عالبلاك ليست ومعمم على اسمي بكل البنوك على اساس انه عندي شيكات راجعه لازم اعمل تسوية بس الغريبة انه ما حدا خبرني ولاحدا اتصل فيي ولا وصلني ايميل ولامسج ولا انذار يعني المفروض انهم على الاقل يخبروني
الشيكات الي انا كاتبتها للبنك هي عشر شيكات لاول اقساط والباقي كمبيالات وفي الي كفيل بس برضه ما حدا اتصل فيه
هلا بدي احل المشكلة مع الجهتين البنك والشركة بالذات اني من النوع الملتزم والي صار معي كان غصب عني وطول عمري عندي التزامات ودايما بلتزم فيها بس فعليا هاي الظروف صارت مو بايدي وممكن اي حدا يتعرضلها فشو ممكن اعمل هلا وكيف ممكن يشيلوني من القائمة السوداء وللعلم انا ما بقدر ادفع اكتر من قيمة القسط الشهري وما حدا يحكيلي بيعي السيارة لانه كتير صعب مو لاني بحب اشم الهوا فيها لا بالعكس انا ما بقدر اشتغل بدونها لاني بيتي بعيد كتير شغلي وبتلزمني بطبيعة شغلي واي استفسار انا جاهزة بس بليز حدا يحكيلي شو احسن شي اعمله هلا.