جراسا -

انا رجل متزوج الي 12 سنة وما عندي اطفال وفي مشكلة عند زوجتي صحية الله يشفيها، اتفقت انا واخوها نقنعها اني اتزوج وبدول مشاكل ولا مؤامرات عشان يجيني ولد افرح فيه، وفعلا بالبداية زعلت "ودارت بوزها" كم يوم وبالاخر اقتنعت واشترططت علي شرط غريب انه العروس الجديدة تقيش معها بنفس البيت ، من فرحتي وافقت على الشرط بدون ما احسب العواقب.

في بداية الايام كانت الامور كويسة وكنت اعدل بينهم يوم هون ويوم هون لحد ما صارت مرتي الجديدةحامل، وهون بدأت القصة، كان حملها صعب والاطباء حكوا انها لازم ترتاح جسديا ونفسيا وا تبذل جهد لانه جسدها لا يحتمل الحمل وقد تخسر الاثنين معا، من هبلي حكيت لمرتي الاولى عن مشكلتها الصحية وانه لازم تدير بالها عليها وتساعدها عشان الي ببطنها.

زوجتي الاولى عملت كل انواع الاعمال والتصرفات والسلوكيات عشان كل يوم تخلق مشكلة جديدة بالبيت وظليت تسع اشهر احل مشاكل بينهم وارضي هاي وازعل هاي والعكس صحيح لحد ما وصل الامر اني انام بالصالون وما بحكي معهم لفترة لا تقل عن شهر، لحد ما اجى يوم الولادة كانت المفاجئة الكبرى، زوجتي الاولى راحت للمستشفى وبقيت مع ضرتها طول الوقت تواسيها وتهتم فيها واجى المولود "صبي"، ولما رجعوا للبيت كانت تهتم فيه وتدير بالها عليه وعلى ضرتها وتعمل الاكل وتنظف البيت وتهتم بالبيبي وانا كاني مش موجود.

لما اجيت اتدخل ببعض الامور لقيت تحالف قوي لايمكن اختراقه، الزوجتين اتفقوا علي وما اتهنيت بلحظة بعمري طول ما هم مع بعض، لدرجة انه كل وحدة كانت توصيني على الثانية لما انفرد انا واياها، طلع جناني بطلت اجمع قررت اترك البيت وامشي وفعلا، غادرت شهر كامل ما شفت اتصال منهم ولا حدى سال عني ولما رجعت للبيت كنت مثلي مثل اي قطعة اثاث بالبيت "لا بهش ولا بنش" ولا بايدي قرار، ولما استشرت احد اصدقائي حكالي زعل وحدة منهم خليها تحرد عند اهلها بتنفرد بالثانية وبتضمها لصفك، وفعلا زعلت مرتي الاولى كونه الثانية معها طفل ولكن المفاجئة انه لما حردت الاولى وراحت لبيت اهلها حردت الثانية وحكتلي انت واحد بتهون عليك العشرة ما بعيش معك وتركوا الطفل عندي وراحوا وانا مش عارف شو اعمل؟