خايف اقول اللي بقلبي


خايف اقول اللي بقلبي خايف اقول اللي بقلبي يطلع لي كم ( ازعلطّي ) وبعدين هات دبرها ..البلد ملانه ازعلطية وبمشوهم الجماعة على الريموت .. اضرب فلان بضربوه .. يهدل علان ببهدلوه.. بصراحة انا بخاف من هيك زباين .. شغلين اكل .. وشرب .. وقلالة حيا ومخ مافيش .. بس انا اخوكو ومتحزم بيكو .. صحيح اني حاط ايدي على قلبي منهم .. لكن يا اخوان الوضع بده ازلام .. وبده مرجلة ولاّ بعدين البلد بتروح من بين ايدينا وسلامة فهمكو .. احنا الخسرانين .. واللي سرقونا شو هامهم مصاريهم بعبهم .. وقواشينهم معهم .. هوب وينك يا لندن .. وينك يفرنسا وينك يا اميركا .. بديش احلف بألله انهم ما بعرفوا عيرا ولاّ سلحوب وين بتيجي .. هذول شغلين سهرات وقمرجة .. ورقص وشرب للصبح .. والله لو اقول اللي بقلبي غير يحطوني عند الدقامسة بظرف ساعة.. مش عيب علينا بهالبلد ولد نشمي دافع عن كرامتنا بعده مرمي بالسجون .. طيب هالخنازير اللي حرقوا غزة .. ودمروا لبنان .. وولعوا النار بالمسجد الاقصى .. هذول ما شاي الحال وابنا لعين والدين .. يا عمي .. انتو مصدقين انهم بسفطوا اليهود .. عمركو شفتوا واحد بسفط حبيبه .. ( يلعن حبايبهم ) .. اي علّي الحلال انهم بدقوني وبدقوكوا دوا لاسرائيل .. ولاّ انتو بتحسبو الصحبة بينهم قليلة .. هذول يعمي من خلقوا حبايب بس احنا من يومنا هبايل .. اخ بكرة لما الانجليز والامريكان بفرجوا عن الوثائق السرية والله غير ينخزوا .. الله يخزيهم // ماهمه من يومهم مخزيين .. الله يلعن الشيطان تراني ( وغطّت ) وهات دبرها عاد ... والله خايف بكرة يودوا لي كم ازعلطي يبهدلوني قدام الله وقدام خلق الله .. ومنو بيكو الزلمة بصف معي .. والله نصكو غير يتشفى بيه ويقولوا قرد اللي يضربه .. هو هالفصحنجي على مين مركن .. يا عمي انا مركن على ربي .. وانشالله ربي ما بخللي ظالم على كرسيه .. ترى الظالم بخاف من خياله لكن بيك بيك هالهمل اللي ( بهووا له ) وبحرشوه على شعبه .. ملعون تميس هالشعب الاردني قد ما اكل هوّي على راسه ... ومن مين ؟؟ من اللي بغلا الزلام ما بتشتريه بنص ليرة ... لكن منهم لأ الله مسامير الصحن .. هذول المربعين ..لو يقولولهم احرقوا الشعب بحرقوه .. اذبحوا الناس .. بذبحوهم .. بكرة يا همل بتروحوا من وظايفكو .. والله ما بتشبعوا الخبز .. طلّوا على اللي سبقوكوا شلون كبوهم .. ونسيوهم .. وانتو مصيركو العن منهم .. ترى انا ما بحرشكوش حتى تدافعوا عن كرامتكو انا يا عمي بمزح مزح .. والله لو ازعلطي طسني قنوة غير تروح بكيسي .. انا بمزح معاكو مزح .. وعند حزها ولزها انا لا شفتكوا ولا عرفتكو ..اي هو انا بدي اصير ابو زيد الهلالي .. ولاّ عنترة زماني ..
\\\\\\\\\\ ما دام كم شب طلعوا يطالبوا يالاصلاح منشاني ومنشانكو اكلوا شلاليت وبكسات حتى قالوا كافي .. طيب ياعمي خليتوهم يحكوا اللي بقلوبهم .. ولاّ ينسطحوا احسن .. الله يسطح الشيطان ( نصنا شياطين ) مقمرين ومقلبين مثل خبز الصاج بالف وجه .. هذاك اليوم الله هداني وكتبت اللي كم سطر .. والله كله كلام مدوزن وعالمسطرة والمالج طلع لي واحد ابن بلد ( زغرة تزغره ) بقول لي والله يا خال انك شغل تنظير .. وحكيي فاضي .. استنيت لي يومين ثلاثة بلكي يطلع له واحد حمش يصفقه جوز كلام مدوزن .. اطلعتوا فالصو لا بتهشوا ولا يتنشوا ع قلت بيني وبين حالي يا ولد شو بدك بيه ازبله احسن له لويش تعمل له قيمة وقدر .. قرد اللي يضربك اي هو انت حاسب حالك بني ادم .. ولك البلد بتطبل وبتزمر .. وانت قاعد تحت البلوطة الوسخ ماكلك .. ما انته داري ديانها من المطالب .. ولك ما انا بكتب منشان اللي زيك .. ولاّ انت من نفس الزباين .. الزعلطية .. روح .. روح .. تعال تعال .. سنحك بهالوجه ...انتو ملاحظين اني بحكي ومش خايف .. بس اذا بدكو الصحيح والله رجليه برجّن رج .. ياعمي انا داري عالشارع وكهربة الطريق بطفوها بكير قال الحكومة بدها توفر بالطاقة .. ولو اجا عبيان عليّه وشمطني كمّن قنوة .. والله غير تروح بكيسي .. على فكرة شو اخبار مجلس النواب .. ترى انا بحكيش عن هاظا المجلس .. بحكي عن مجلس 89 .. بيقولوا مجتمعين .. وبناقشوا بشوية قرارات مهمة .. يا عمي ردوا عليّ روحوا لدوركو ابشك الكو .. اذا لهسا ما انتو قادرين تعرفوا قصة صديق العيلة الكبيرة ابن شاهين .. ولا مسترجيين تجيبوا سيرة باسم عوض الله .. الفوسفات انباع .. والبوتاس على الله تعود وخالد طوقان بده يعمل الكو مفاعل نووي واحنا مش ملاقيين نوكل .. ومصاري مصفاة البترول ,, وموازنة البنك المركزي .. ونص موازنة امانة عمان عارفين منو بوخذها .. فرجوني زلمة بيكو بقدر يعد الصحيح .. .. والله عتب ابو اشرف على قرايبه القضاة ,,, وابن الرواشدة راحت بكيسه وكسبها خالد شاهين .. يا عمي الزلمة علاقاته بالعلالي فوف فوق .. وفت مصاري للهبل .. ها كيف نفد بريشه لعاد ومزط لبره
\\\\\\\\ عمي افهموني مليح .. طول مهو الشعب الاردني بشحد الديموقراطية شحدة ... وطول ما همه الجماعة بتحسنوا علينا .. وبعطونا ايها قطمة قطمة .. وطول ما همه بنقطوا الميّة والهوا والكاز والغاز بحلوقنا تنقيط .. وطول ما احنا مسكرين ثمامنا وبنعملها على حالنا لمّا ( بهمّرواللنا ) .. وطول ما بنظل نقول هذا كركي وهذا معاني وهذا سلطي وهذا اصخري وهذا عدواني وهذا شمالي وهذا جنوبي وهذا شرقي وهذا غربي وهذا احسني وهذا مسيحي وهذا مسلم طول ما همه الجماعة امفحجين وراكبين فوقينا .. ولكو يا عمي انتو فكركوا بريطانيا طلعت من عنّا .. عليّ الطلاق كلوب بعده هون .. وهو اللي بحكم وهو اللي برسم .. اسمعوني صيروا ازلام وقولوا الصحيح ... الشعب الاردني بستاهل كل هالمذلة .. ولكو يا عمي البلد ملانة خيرات بس همه مش رايحين يطلعوها احسن بكرة تشموا شعر ابطكو .. بدهم اياكو تظلوا ميتين من الجوع .. عارفين ليش .. منشان ما تشوفوهم شو بعملوا .. وتظلوا تركضوا ليل نهار ورا لقمة هالخبز ... ولكو يا عمي ردوا عليّ ... عليّ الطلاق بريطانيا عمرها ما فاتت بلد وطلعت منها ... واخ يا قلبي ول عليّ شو اهبل فرغت كل اللي بكيسي .. وحكيت كل اللي بقلبي .. اخ رجليّه بطلن يتحملني من الخوف .. خليني اشوف لي خشة بعيدة اتخبا بيها والله بعد عملة الدرك بشباب ساحة النخيل منا امين على حالي .. وربنا يستر .. اخوكو بضيق وبده فزعتكوا يا اجاويد ... واللي ما بده يفزع بس ما يديرش ينزين .. وانا سامع واحد بحدي بقول الكو اتركوه الله لايرده .. جاجة حفرت .. على راسها عفرت ...



تعليقات القراء

إلى الرويبضة
إلحقوا بسرعة هي كاتب محترم، بحكي اللي عنده و مش حاسب حساب لحدا.

لا تخاف يا محمود بتظل من القطيشات، يعني اشوى شوي.
18-07-2011 08:48 PM
من اربد
والله ياخوي مرتين كتبت بس ما نشروهم. معك حق يمكن تروح بشربة مي لو زدتها شوي. والله الجهل والزعرنه غير تخرب هالبلد. ان بأيد كل اللي حكيته.
18-07-2011 09:04 PM
alhourani
نعتذر.....
19-07-2011 01:07 AM
بدون وطن
والله انا من أشد المعجبين بمقالاتك ، كلامك بقلب كل مواطن شريف ولكن مش الكل بقدر يكون مثلك والكل خايف يقول اللي بقلبه .

الله يقويك ويكثر من امثالك والله ينتقم من كل كاتب منافق ومتجرد من الاخلاق والشرف لأرضاء اسياده من الفاسدين والمرتشين وحرامية ناهبين البلد.

المواطن الاردني صار يركض ليل ونهار علشان يقدر يجيب رغيف الخبز وصار يتسول بسبب الفساد والمفسدين

الله معك وغير الله ما بدك اي حد يوقف معك
18-11-2011 07:18 PM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات