جراسا -

الكاتب: مجهول حتى يفرجها الله

الحياة الاسرية مليئة بالمنغصات والمشاكل، واللي بصير بين الازواج شي طبيعي كونه ما في مؤسسة زوجية مثالية خالية من المشاكل والعصبية والمناقرة والمجاكرة، لكن كانت مشاكلي مع زوجي دائما بسبب اهله اخته "بتتغونج" وامه "بتتطعوج " وابوه بصرف ايماءات بتخوف لما يشوفني.

وبس يجو عنا بتصير مشاكل بنقعد بالاشهر انا وزوجي ما بنحكي مع بعض بسببهم لدرجة انه بيوم من الايام سمعت ابو زوجي بحكي لابني يا ابن الكلبة يا ابن الحيوانة امك مثل التمساح ولما خبرت زوجي صارت مشكلة طويلة بينا وصلت للطلاق وبعدها قطع فتوى ورجعنا.

ما بيوم فكرت اني احرد ، لاني بعتبر هذا بيتي وكل ما فيه هو ملكي حتى زوجي وبنحب بعض بس اكيد مش مثل الحب الي بالمسلسلات التركية او الافلام الرومانسية، لكن بنحب بعض واتفق معي اخر اتفاق انه لما يشتاقوله اهله يروح هو والولد لعندهم وقعدنا سنتين ونص بامان الله بدون مشاكل على الرغم انه كان يرجع من عندهم معصب بس كنت اطنش وما اهتم .

لحد ما اجى بيوم يغازلني ويحكيلي شعر وكلام حب بالاخر قبل ما ننام حكالي الاسبوع الجاي بتجهزي طبخة من ايديكي الحلوين بدي اجيب اهلي ونتصالح ، ما حكيت شي عشان ما يزعل، بس انا مابدي اشوفهم وما بدي اياهم يجو عنا وما بدي المشاكل ترجع وهاي اخته الحرباية انا قرفانه اشوفها هي وامها ...

شو اعمل كيف اتهرب من هالشغلة بدون ما ازعل زوجي؟؟؟