يالله الدنيا كيف تغيّرت وتغيّر كل شيء فيها ، لا أب ماين على أولاده ، ولا زلمه قادر يسيّطر على بيته صح ويمشّيه مثل ما بده (إلا ما رحم ربي) ، صار الولد بده يلعب دور زلمة الدار (وهو بعده مش مطلع حق طهوره) ، والمرأة بدها تمَشّي كل شيء مثل ما بدها وكل قرار بالدار يطلع منها ... هكذا قال أبو علي ابن الخمسين عام والذي يعاني ما يعانوه معظم الناس ، من تغير جذري في الأدوار ، ويتمنى أن يعود به الزمان لأيام جده عقله المتزوج من أربع نساء وله من الأولاد والأحفاد ما شاء الله كان ، فقد كانت حياة عائلة الحاج عقله مضبوطة حسب الأصول ولا أحد يتعدى على حق ودور غيره ، وكان الجميع يفهم على الحاج عقله من نظرات عيونه وإيحاءات وجهه ، وكان إذا ما طُرح موضوع بأي مجال (خطبة عروس ، بناء بيت ، تدريس ولد بالخارج أو أي شيء صغير كان أو كبير) يسمع الحاج عقله لجميع الآراء ويكون قراره هو الحكم والسديد في الموضوع ...
نقول لابو علي (ابن الخمسين عام) أسمع القصة والطرفة الصغيرة (ويمكن حدا سمعها وبعرفها من قبل) ... تقول الطرفة : بأن شاب أخرس دخل إلى سوبر ماركت ، استقبلته الصبية اللي على الكاش : تفضل أستاذ .. الأخرس : هياه ... الصبية : عفواً ... الأخرس : أأأ هوووو هياه .... الصبية :عفوا ما فهمت عليك ... عصّب الأخرس فنادت الصبية الشاب المسؤول ...جاء الشاب يبتسم :تفضل أستاذ كيف بقدر أساعدك ؟ ... قال الأخرس : هوووو هياه ! هياااااه ... تبسم الشاب وقال للصبية : والله ما فهمت عليه ... صار الأخرس يخبّط على الكاونتر .... أجا المدير على الصوت ، وبعد ما فهم القصة ، قال: بسيطة في محمود الشاب الأخرس اللي بالمستودع نادوه بلكي فهم عليه ... وصل محمود ....الأخرس : هو هياه هيييب ... محمود : هييي ابييب هاااا .... الأخرس : هياه هياااه ...محمود : هياه .... بعدها هز الأخرس رأسه موافق مع ابتسامه ... فرح الجميع للوصول للتفاهم ...راح محمود على المستودع ورجع معه كيس أسود مليان وأعطاه للشاب الأخرس ... فتح الأخرس الكيس وابتسم وحاسب محمود وطلع من السوبر ماركت ...انبسط المدير واللي معه من محمود وسألوه : شو كان بده هذا ... رد عليهم محمود وهو مبتسم : هيااااه يهووو بهيييي ...
فهذا هو اللي صاير ، ما حدا عارف شو سر التغيير ، ولا حدا فهمان شيء ... حتى لو نادوا محمود ما رح يحلها ... والله يرحم جدك عقله، وسقى الله على أيامه....