جراسا -

مساء الخير للجميع وكل عام وانتم بخير

معقول يا ناس اللي بصير بالدنيا؟ معقول بطل في بنات للجيزة؟ معقول بطلت الناس تدوّر على سترة بناتها؟عنجد مش طبيعي اللي بصير معي ..!! للمرة الثالثة على التوالي بروح بطلب بنت من أهلها وعلى سنة الله ورسوله بنصدم بالواقع ..كثير تعرضت لهيك قصص بس قصة امبارح للأسف اجت بيوم عيد واجت صادمة الي بشكل كبير جداً ..طلبنا من الحجة الله يطول بعمرها تشوفلنا عروس عجبتها واحدة ساكنة في اربد واتفقنا نروح ثاني يوم العيد نشوفها طبعاً البنت اختيار الحجة وما بعرفها مسبقاً , رحنا وقعدت مع ابوها طبعاً اكيد سألنا عنهم قبل ما نروح وقبل ما نفكر نسألهم عنها وكل اللي سألناهم عن أبوها حكو ما شاء الله يعني ناس متدينين لأبعد الحدود والبنت بتصونك و وووو ..الخ من هالحكي ومش شخص واحد اللي حكى اكثر من شخص حتى تيقنت انه أتوكل على الله - طبعاً قبل الروحة وقبل ما نطلع صار معي شغلة بس ما حدا يضحك عليي كنت متأكد بعد ما صارت هالشغلة انه انسى الموضوع الشغلة مش نافعة- اللي صار معي يا حبايبي انه بنطلوني فرط قبل ما أطلع من بيتنا انا وأهلي فأضطريت اروح اغير البدلة ولبست بدلتي الثانية , ما بعرف اجاني احساس انه الشغلة فارطة زي البنطلون , المهم طبعاً البنت دارسة هندسة ,وصلنا واستقبلونا أحر استقبال واهلا وسهلا وقعدت مع ابوها وسألني كم سؤال وين بتشتغل وقديش عمرك ومن أي جامعة متخرج وشو تخصصك ووين ساكن من هالحكي اللي بلا طعمة انتو عارفينه , هلأ قمت أروح عند البنت بحضور اهلي وأمها للبنت , طبعا البنت خجلانة من حالها وانا سألتها نفس الأسئلة اللي بلا طعمة اللي سألني اياهم ابوها - هلأ دخلت عالخط امها , حكتلي شو مخلص؟ حكيتلها كمبيوتر ساينس , حكتلي يعني مش هندسة؟؟ انا والله مفكرة انك مخلص هندسة ..!! قلت بحالي يا عفو الله ولعت..!! اذا من أولها بتدور على شهادات ... قلنا ليس مش مشكلة حكيتلها اعتبريها هندسة مش مهم التخصص المهم الشخص كيف راح يعيش مع بنتك وردحتلها شوي بأدب طبعا وسألتها سؤال محرج جداً ..حكيتلها طيب يا خالتي عندك بنات غيرها مجوزات؟؟حكتلي اه في ثنتين , حكيتلها جيزانهم شو بشتغلوا؟؟ حكتلي واحد بالجيش وواحد معلم مدرسة ...قلتلها طيب ولا واحد فيهم مهندس وانا جبت الموضوع بشكل غير جدي حتى اجنبها الأحراج ... لحد الآن الموضوع عادي جداً ...سألتني امها السؤال التاللي "قديش راتبك؟؟؟" - حكيتلها 700 دينار ...بتعرفوا شو حكتلي؟؟؟هذول شو بدهم يكفوا ؟؟؟ انا قسماً بالله لما سمعت الكلمة هاي ما ضل براسي عقل .. سكتت ما عرفت شو بدي احكي لانه جد وقتها البنت طلعت من نفسي , يعني اذا امها بتدور على المصاري - بتحكيلي 700 دينار شو بدهم يكفو يا دوب يكفو فواتير كهربا ومي , حكيتلها بأسلوب ناشف خالتي اولاً انا مش راح أعيش بنتك في بيت شعر وثانيا هذول الـ 700 دينار بعيشو عيلة اذا كانت الأم مدبرة وقادرة انها تدير البيت مش تبعزق وتصرف اشياء ما الها داعي وبعدين الـ 700 دينار هذول اللي مش عاجبينك عايش فيهم حياتي عزابي بالطول وبالعرض مش ناقصني اشي بيت ملك والملك لله عندي ومعفش جاهز ومش ناقصني اشي ... وبعدين حملت حالي وطلعت رجعت عند ابوها ابوي كانو قاعدين والأدهى وأمر من هيك انها اعترضت على الجامعة اللي تخرجت منها يعني بتحكيلي اربد الأهلية هاي عليها نقطة مع انه ممكن خريجين هندسة وجامعات حكومية ومش ملاقيين الراتب اللي باخذه .. معقول هيك صارت الدنيا؟؟ انا روحت مخنوق ولسه بترن بأذني كلمتها.."شو بدهم يكفوا" ... معقول هيك صار بالناس؟ اذا هذول العيلة المتدينة هيك كيف الناس التانية؟ شو نحكي؟ انا بصراحة وحكيتها لأهلي انسو موضوع الزواج شيلوه من راسكو..؟؟ لأنه فعلاً الناس صارت طماعة وبطلت تدور عالستيرة..اللي بدو الستيرة لبنته اعتقد انه بيرضى تعيش مبسوطة مع انسان راتبه 200 دينار ....فعلاً يا ناس الدنيا أخر وقت ... الناس الطمع أكلها وصارت همها المصاري ...والمشكلة كل ما تسأل واحد .. بحكيلك هيك من ثم واسع ..بنات الحلال كثارررررررر ..والله لا اعتقد انه ضل فيه بنات حلال ..ممكن البنات يكونوا بنات حلال بس الأهل مش اهل حلال ... عشان هيك انا لغيت الفكرة كلها من راسي .. وعلى رأي المثل "العب وحدك بتطلع راضي"

...!!!
وجعتلكوا راسكو معي ..!! بس عنجد بتحدى اذا حدا بدلني علي بنت حلال وأهلها محترمين ومش جوعانين