يوميات عقله (مسقع صباحك)


عقله في زيارة جاره مفلح قاعدين بقاع الدار تحت التوته وابريق الشاي بنص القعده وحديث الذكريات ...عن ماضي جميل وبعد كل هالحكي تذكر عقله انه مفلح عنده ابن اسمه صالح وفجأه بسأل عنه
عقله: يا زلمه اخذنا الحchي ونسيت اسألك عن صالح .. شو اخباره
مفلح:والله هيه قاعد جوا ... لا شغل ولا مشغله
عقله: والشهاده .. وحفلة التخريج اللي ساويناها اله
مفلح: والله يا اخوي هاظ اللي صار
عقله: ينادي ...صالح ... تعال عمي تعال
يطلع صالح من الدار ويرحب بعقله ..
صالح:اهلين عمي يا مرحبا
عقله: شو صار معك ... ما اشتغلت
صالح: لا والله يا عمي ع حطت ايدك
عقله: ما رحت ما اجيت ... ما ركضت
صالح: والله ما خليت واخر اشي رحت ع التلفزيون .. ع اساس انه معي شهادة اعلام .. والله لا يورجيك
عقله : آه شو صار
صالح: قال بدهم اعمل برنامج يكون جماهيري ويجيب عاءدات من المكالمات وكل الشركات تدب عليه يعملو اعلانات .. ..وهاظ لازمه شغل كثير وخطط وميزانيه ... واذا ما صار مشهور ..بخسر كل شي
مفلح : بعين الله يابه الرزق على الله ..
يقوم صالح ويرجع حوى الدار ..ويرجعوا عقله ومفلح للحديث
مقلح : والله انا تعبنا عهالولد وقريناه ومثل ما انت شايف .. وخايف الولد يصير بيه اشي
عقله : مثلك ... مثلك ... والله كل الشباب عهالحاله .. بعين الله
مفلح: ما علينا ... يا اخي بتسمع الاخبار
عقله : خير شو فيه
مفلح : بقولو ان المسؤولين السابقين طالعين عالشاشه وبسولفوا عن المشاكل الاجتماعيه والاقتصاديه
عقله : مين هظول يا اخوي
مفلح:رؤسا وزرا سابقين .. وزرا سابقين .. نواب ...
عقله : عن ايش بسولفو
مفلح : عن الازمه الاقتصاديه وعن الحريات وعن البطاله وعن الانتحار ..
عقله : آه .. شاطرين بالتنظير خيوه
مفلح : ليش ما طبقوا هالسوالف لما كانو بالمنصب والمسؤوليه.
عقله : وقف وقف ... وين راح صالح
مفلح : يا زلمه مالك شو بدك بصالح
عقله :استنى شوي .. وينادي : صالح ..صالح .. تعال عموه لقيتلك برنامج
يطل صالح من الباب : خير عمي شو لقيت
عقله : تعال ..تعال ..لقيتلك برنامح طقع .. وبوكل السوق .. وبجوز يكسر الساحه تكسير
مفلح : يا زلمه دشر هالولد لا تحم باله
عقله : ولا بحم باله ولا اشي ... اسمع يا صالح ... بتعمل برنامج وكل حلقه بتستضيف فيه مسؤول سابق ... يعني دوله ..معالي .. عطوفه .. سعاده .. وبتعمله مقابله ومقارنه بين كلامه لما كان مسؤول وبين كلامه لما صار مش مسؤول وبتسأله شوية اسأله ...
صالح: هم هذول برضوا ييجو على برنامج بعريهم وبنتقدهم
عقله : انت جرب واسأل اثنبن ثلاث منهم .. واذا شفت انه ما بيجو ... جيب من اصحابكم الخريجين وكل حلقه واحد يتقمص شخصية مسؤول ... يعني اعملولهم مكياج ... واعمل الحلقه
صالح : والله فكرتك مليحه عمي بس بدها خطه ومصاري
عقله : ربك بهونها بس انت انوي
مفلح : وشو بده يسمي البرنامح
عقله : مسقع صباحك
مفلح :له له له يا جار بتسبني بداري والله ما توقعتها
عقله :ههههههه ... قصدي يسمي البرنامج (مسقع صباحك)



تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات