الاشغال الشاقة المؤقتة بحق متهم اقدم على قتل شقيقته


جراسا -

خاص - قررت محكمة الجنايات الكبرى وضع متهم بالاشغال الشاقة المؤقتة سبع سنوات ونصف السنة بعد تجريمه بتهمة جناية القتل القصد بوصفها المعدل من تهمة جناية القتل العمد مخفضة العقوبة الصادرة بحقه من الاشغال الشاقة المؤقتة 15سنة حيث اقدم على قتل شقيقته باطلاق عدة عيارات نارية عليها من مسافة قريبة جدا لتغيبها عن منزل ذويها.

وبرأت هيئة المحكمة والد المتهم من تهمة جناية التدخل بالقتل العمد لعدم قيام الدليل القانوني المقنع بحقه.

وجاء في تفاصيل القضية ان المتهم وهو شقيق المغدورة ، وفي الشهر الاول من العام الماضي تركت المغدورة منزل ذويها ولم تعد اليه ، وفي منتصف العام الماضي شاهدها احد اقاربها في احدى مناطق عمان وقام بتسليمها الى المركز الامني واحيلت قضيتها الى المدعي العام وتبين فيما بعد انها تعرضت الى اعتداء جنسي من احد الاشخاص وتم تحويلها الى الحاكم الاداري والذي بدوره قرر توقيفها اداريا .

وفي شهر تموز العام الماضي توجه والدها الى الحاكم الاداري وافرج عنها مقابل كفالة واصطحبها الى منزله وعند وصولهما شاهدها شقيقها المتهم وعلى الفور احضر مسدسا واطلق عليها عدة عيارات نارية من مسافة قريبة جدا وارداها قتيلة.

ووجدت هيئة المحكمة في حكمها القابل للتمييز بان عناصر واركان تهمة جناية القتل العمد لم تتوفر بحق المتهم "شقيقها" وقررت هيئة المحكمة تعديل وصف التهمة المسندة اليه من جناية القتل العمد الى جناية القتل القصد وذلك لان الافعال التي اقدم المتهم على ارتكابها يوم الحادث كانت بنت لحظتها ووليدة ساعتها ولم يكن مخططا لها اومصمما عليها سابقا.

 




تعليقات القراء

مستغربه
المضحك المبكي قال تعرضت لاعتداء جنسي وحده تاركه بيت اهلها ودايره بالشوارع وفالته على حل شعرها يعني وين بدها تقضي وقتها غير مع ولاد الحرام لقوها لقمه سائغه ما قصروا فيها يعني بدهم ياخدوها يودوها على الجامع وتصلي قيام الليل قعدت مع شلة سرسريه ولعبوا معها عريس وعروس والله شغله اما انها الله يرحمها اخدت جزاءها العادل لانه الله ما بضرب بحجار والجزاء من صنف العمل بس ولاد الحرام اللي ما قصروا فيها شو اخبارهم اكيد بستنوا بضحيه من عيله مفككه توقع في شباكهم وقال اتجوزنا وجبنا ولاد كانت باطله ومحوله جيزة هدول الناس وخلفتهم .
05-12-2009 02:40 PM
زيكو
الله لا يقيمك ولا يقيم كل وحدة تسول لها نفسها ان تكرر هذه الفعلة ولو وجدت رجال مثل هذا الرجل لما كانت تفكر اي انسانة بان تكررها مرة اخرى ، ولكن عتبي على ابوها واخوها اللي ما ربوها من اول وداروا بالهم عليها قبل ما تطلع للشارع وربوها ترباية اسلامية من اجل عدم الوقوع في مثل هذه المطبات
05-12-2009 03:44 PM
مجدي
يستحق حكم اقوى من هذا الحكم . وهي ضحية في مجتمع ذكوري واغلبه يدعي العفاف . لماذا قتلها ؟ ولماذا لا يقتل الشاب اذا مارس هذا الفعل ؟ الشرف فقط بالمرأة !!!!
05-12-2009 04:43 PM
مستغربه الى مجدي
شو هي هادي قصة مجتمع ذكوري كل ما دق الكوز بالجره ما بنشوف ولا بنسمع الا انه مجتمع ذكوري يا ابن الناس التربيه مو شغل الرجال التربيه شغل النسوان الولاد بكونوا متل العجينه بايد الام هي بتربي وهي بتعلم وهي اول مدرسه للاولاد فاذا كانت ست صالحه وبنت ناس بتعرف الاصول بطلع ولاد وبنات غير شكل يعني التربيه الاساس ...
والمجتمع ذكوري لنصدق يا زلمه المجتمع بهاد الزمن مجتمع نسواني بامتياز مجتمع البنت بتعمل فيه اللي بدها ياه بتحقق رغباتها المنيحه والعاطله بتصاحب بتحب بتبعت بعد منتصف الليل ما لذ وطاب من المسجات المصوره والمكالمات الحاميه والحاره بحرارة صحراء كالهاري بتدرس بتسافر بتسهر بتأرجل ما بتخلي شي بنفسها وبتهرب وبتفل وبتطلع على ظهر العمارات وبتحاول تعمل انها بدها تنتحر بتتبلى على الرجل وبتلبسه تهمه واذا حطت واحد بعقلها بتجيب اخرته بالشغل الاولويه الها ولطلتها الحلوه وغنجها ودلعها ومشيتها اللي كلها طعوجه شو في كمان وبالاخير مجتمع ذكوري هو ضل فيها ذكور ولا رجال ما البنات خلوها خل هلكتونا مجتمع ذكوري مجتمع ذكوري هالاسطوانه المشروخه لساروا الرجال ندره والذكور ببشرك بتحولوا الى اشباه ذكور بفضل الشذوذ سقا الله على ايام الرجال هلأ بدك تلاقيهم وتقابلهم بتروح على الجوهرجي لانه هناك مكانهم متل الذهب وعيار 24 عشرين بلا نسوان بلا ذكور بلا هم بطلت تعرف مين من مين .
05-12-2009 05:07 PM
مجدي
يا مستغربة نحن نعرف ان الام هي المدرسة الاولى . واليوم اتفاجئ ان فتاة ( حسب اسمك ) تقول ان مجتمعاتنا مجتمع ذكوري . هذه الفتاة اعتدى عليها وحتى لو خرجت من البيت هل يجوز ازهاق روحها ؟؟ غريبة !!! ان كل العالم يسأل لماذا جرائم الاردن كثيرة .. هل تنكرين هذا ؟؟ وهل انتي معجبة في اخلاق شبابنا اليوم . الشاب يفعل ما يريد والفتاة اذا اخطئت تفقد روحها .. وكلنا معرضون للغلط .. وكثيرا تجد ايضا الام تترك اولادها وتقضي الوقت بجلسات الثرثرة .. ان العلاقات الجنسية موجودة في كل العالم ولكن لا يجوز قتل روح لانها خلطت ومن منا لم يغلط وبلا ذنوب ؟؟؟؟ تحياتي
05-12-2009 05:57 PM
صقرالحطيبات
قليله العيارات الناريه الافضل تقطيع لها الشخصيات هاي عشان غيرها يتعلم انها مش سايبه بنات اخر زمن
05-12-2009 06:38 PM
الى مستغربه
يسلم ثمك
05-12-2009 07:00 PM
الى مجدي
.... مجتمع ذكوري
صح!!!!!!!!!!!!!!!!!!!!!
05-12-2009 07:11 PM
مستغربه الى مجدي
بالاول بقول شكرا للمعلق 7 ويسلمك

يا مجدي ايها الرجل المحترم اذا قرأت تعليقي الاول انا ذكرت ولاد الحرام اللي كانت معهم وشو صار فيهم واعتراضي كان على انه مجتمع ذكوري لا مش مجتمع ذكوري الشب وما بدي اعمم عشان الحلال والحرام هالايام متل النعجه صاير وبتلاقي ماشي ورا مرته متل التوتو بتصرخ فيه الصوت بقوم بلبد وخاروف مع صاحبته انا ما بأيد قتلها بس ربك كبير يعني هربت من شهور وراحت لاحضان السرسريه يعني خلينا صريحين لو لا سمح الله الواحد اخته او بنته عملت هيك ل برشاش الخمسميه او بالناتو او مسدس سميث اند ويسون او الكلاشن ناولهاياها بين عيونها يا اخي ولو فيها الغام ارضيه بحطها على لغم وبخلص منها الزلمه دمه بيحمى على عرضه وبعدين انا معك انه البنت متل الشب بالدين والحدود وحده عليهم بس ان اجيت للحق يعني الولد اذا غلط مش زي البنت اللي رحمها لازم يكون نضيف لانه بده يحتضن اولاد زوجها بالمستقبل عذريتها مصانه غير انها ممكن تحمل وترمي لقيط وبعدين بتفكر كيف ترقع والسؤال بيسير صيني ولا اصلي يعني عملتها اكبر من عملت الزلمه
وبعدين في اهل بنحطوا على الجرح بطيب خلينا نحكي الحق بتطلع عندهم بنت بتعطي ابليس دروس نبت شيطاني وبتحصل انا ما بأيد القتل بس الله عارف كل واحد شو مخبص وبردلوا ياها الصاع صاعين يعني والله اشي بخزي واللي زيها بتلاقيها على الاسوار وعلى الشبابيك بتتفلت لاي زلمه تتعمشق فيه والله مصيبه البنات اللي زي هيك موتهم حلال والله عالي بسماه ما بترك حقه بياخده الله يجيرنا بحياة الله مجدي ممكن واحد يفوت على بيت ويعتدي على بنت وهي معززه مكرمه محترمه صاحبة دين وهي بين رجالها واهلها قال امشي عدل بحتار عدوك فيك والنساء فتنه من لا فتنة له كمان البنات عندهم شحنه ناسفه من الجنس مش عارفين كيف يفجروها فبقولوا خليها تطلع وتفضح ولا تبقى جوا وتسطح اصابعي وجعوني من الطباعه . واخر قولنا استغفر الله لي ولكم ولسائر المسلمين والله ستير يحب الستر .ويا رب ما تآخذنا راحت المخلوقه لرحمة الله ا.بس بنحكي للعبره .
05-12-2009 08:01 PM
أبو شهاب
منذ متى حكم الاسلام علي هذه الحالة القتل اني اخشى على كل من ايد هذه الجريمة أن يناله اثم لان ديننا الحنيف لا يأمرنا بالقتل الابالحق ، ثم أن مبررات القاضي بأنه قتل قصد او غير قصد ما هذه القوانين القتل هو قتل

أن مفاسد شقيقها القاتل والقضاة اكبر من جريمة هذه البنت لان الانسان هو بنيان الله في الارض ولا يحق لاحد أن يهدمه بالقتل الا بالحق لذلك جاءت شريعة الله بتطبيق القصاص من مرتكب بعض الجرائم ، أن اصلاح المجتمع لم يكن بوما بهدر الدم والقتل لان الاسلام الذي ننتمي اليه جاء لاصلاح الناس والمجتمعات كلمه حق يجب أن تقال ما قام به الشقيق لهو عادات قبلية ليس فيها من الدين من شيىء ويتأثر بها القضاة كونهم من نفس القبيلة ومعتقداتها .
06-12-2009 01:59 AM
منى الى صقر الحطيبات
يا صقر يا ظالم شو عرفك ليش طلعت ما يمكن الشارع كان ملاذها الوحيد وافضل من البيت .ليش دايمن البنت ظالمة والرجل مظلوم.اللي اعتدى عليها ما اله اخوات ولا ام ولا بنات؟
الله يستر على كل الولايا .بس كلمة للرجال : خافو الله ومش كل القصص بتنحل بالقتل؟
06-12-2009 08:22 AM
سياج المجالي
الخيانه وجهه نظر/ الشهيد كمال ناصر
هل نقوم بأيجاد المبررات لأي فعل ونتحدث عن مجتمع ذكوري فهل خروجها بدون موافقه الاهل مبرر 00هي وغيرها ومن يتسامرآ بالكافي شوب والشوارع بساعات متأخرة وبدون محرم
ونعلم ان بلدنا ليس بالمدينه الفاضله وهو الان خليط من مجتمعات أختلط فيه الحابل بالنابل
ووجب على النساء التزام بيوتهن الا ماتدعوهن الظروف للخروج كالعمل او الدراسه
06-12-2009 09:53 AM
mwatnh
الى الست مستغربة. أول شي بحب احكيلك الاموات لا تجوز عليهم سوى الرحمة،ما خليتي لا للبنت و لا لأهلها ستر مغطى و بتحكي بعدين عن الدين و الترباي لأ مبين و واضح انت شو متدينة و مربية و بتخافي الله ياستي الفاضلة بلكن البنت كانت رايحة عند صاحبيتها او عند عمتها و حدى خطفها و اغتصبها وبعد ما رماها خافت ترجع لاهلها لانها ادرى بتفكيرهم و تأكيد لكلامي انه اخوها الحمش اول ما شافها طخها بدل ما يدور على ابن الحرام الي عمل فيها هيك بس بالتأكيد كان معصب من اشي تاني بحياته فطلعت براس اخته زي ما حضرتك ابصر مين اضطهدك و حابة اتطلعي كل غلك على البنت واهلها وعلى البنات الي شخصيتهم قوية ومش صاححلك تكوني وحدة منهم بالتأكيد اهلك و جوزك قامعينك لهذا السبب بتسبي على البنات الى عندهم شخصية. يا ست مستغربة رأيك الغير مقبول اخلاقيا أو دينيا و الناتج عن قمع وكره لجميع من حولك و الاغلب انك تكرهين حتى نفسك غير جائز. دينيا حرم الله القتل وارجعي و شوفي ايش عقوبة الزنى بالاسلام و اخلاقيا عيب عليكي تسبي على الناس و تجرحي فيهم و تذمي فيهم وانت ما بتعرفي اي شي عن حياتهم الاخلاق الي بتحكي عنها من امبارح يا ام اخلاق تمنع انه الواحد يسب و يشتم بناء على رأيه الشخصي. و وحدة مريضة نفسيا متلك المفروض اتدور على دكتور نفسي بدل ما اتدور على حدى تصب غضبها علي. حسبي الله ونعم و الوكيل بكل ولاد وبنات الحرام
06-12-2009 10:36 AM
مستغربه الى مواطنه
الله اكبر قلبك شو مليان يا ستي شكرا الك التربيه واضحه عليكي انتي ما خليتي ولا بقيتي من كلام تافه وكلام بدل على انك انتي المضهده والمتعرضه الى اعتداء سافر عليكي من ولاد الحرام انا قلت انه الواحد بعتبر من المشاكل وبحكي لانه المشاكل هاي كترانه بس ازا عقلك ما بستوعب فهاد اشي برجع الك وعن الدين لا تحكي فيه مبين من ردك انك ما بتعرفي الله وين حاطك فاسكتي احسنلك وروحي ربي حالك وربي بناتك في المستقبل لييرؤ معهم اللي صار مع البنت اياها ولا تعملي محامي دفاع اذا القصه واضحه من المصدر بدك تقعدي تفسري على كيفك قال مواطنه وعم بقول حال الوطن بتراجع لانك مش مواطنه صالحه مواطنه طالحه مع سبق الاصرار واللي بدق الباب بسمع الجواب اللي ما بعجبه يخرب بيت شيطانك شو حقوده وشو لسانك زفر .
06-12-2009 11:34 AM
gemini
والله يا مستغربة لو انت الي تسكتي وتريحينا من افكارك الي كلها كره وحقد ...
06-12-2009 12:12 PM
مستغربه الى الجوزاء
وانتي مين اللي داعس على دنبك انتو من جماعة اللي بحبوا تشيع الفاحشه بين الناس من جماعة تحرير المرأه من اخلاقها ودينها اسكتي احسنلك وبلا فلسفه زايده يقطع عمرك شو مفلسفه انتي والمواطنه
06-12-2009 02:17 PM
اصيلة
والله صحيح مجتمعنا مجتمع ذكورى بحلل للذكر كل شي وبحرم على المراة كل شي .وكأنها هي اللي بتغلط والرجال كلهم حماشة وحرص على الدين ما شاء الله .. بعني هالاب والاخ كانو كثير صاينين عيلتهم .يا جماعة الفاحشة علشان تحصل لازم يكون هناك ذكر وانثى .وبواحد ما بتصير وبعدين كلكم نسيتو اللي اعتدى عليها اكيد راح يكون ابن ولا اخ ولا اب واحد فيكم واكيد هلا بتفتخرو في كثير .. وبتشجعو يعملها مع بنات ثانية .. يا جماعة خافو الله حرام عليكم .. البنت او الولد لازمهم تربية واهتمام وعناية وبراى الولد اكثر من البنت لانهم قوامة المجتمه ولا نسيتو.. وبعدين والله انو النسوان عقولهم ناقصة بطلو يحكو بالقصة صارو ينتفو بريش بعض..
07-12-2009 09:48 AM
اردنية
مرحبا - يقول عليه السلام التمس لاخيك سبعين عذرا فان لم تجد فلم نفسك- ولو كل واحد بلش بحالو بدل ما انتم قاعدين تدقو ببعض !اما بالنسبة لمستغربة فكل واحد بيبعث عشان يعطي رايه مش عشان تردي عليه!!!!!
10-12-2009 04:51 PM
من صقرالحطيبات الى منى
انا مش ظالم الله يسامحك وانا قدمت رأي الي أنا شايفه وهو الصح وما طلبت رأيك يا ست منى ok
14-12-2009 09:18 PM
عماد الصرايره
هذا صقر ماخذ الحياه كلها مشاكل انا عماد وعارفه
20-02-2010 09:31 PM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات