ابو سامي .. مهن عنايا عمووووه !!!!!!


هاهو العام الخامس من رمضان قد اوشك على الرحيل .. ..ومنذ عامه الاول تعود قلمي ان يودع شهر الخيرات بعيدا عن السياسة والقتل والحروب والهمز واللزم واطالة اللسان ..اودع رمضان الخير بحال المواطن الغلبان فحال مقالي كالعصفور الذي بلله القطر.. الطامح بالعيش رغم مرارة الزمان
مقالي الجديد حامل معه سر المواطن الدفين المتوكل على الله والمتيقن بان الفرج سياتي علينا جميعا ومن رب كريم,,
..فكلما اقترب العيد تزداد الضغوطات النفسية وتنحصر السيولة النقدية وتجف منابعها يرافق ذلك حاله من طقوس التذمر وحكة اليد والتافف والهيجان والغضب.......
ابو سامي عنوان المقال الدائم رمز الاصالة والمواطنة ... مواطن يعيش على تراب هذا الوطن حاله كحال الكثيرين ...يقاتل على كل الجبهات فمطالب المدارس والبيت و الاكل والشرب تكاد لا تنتهى ولا ننسى مطالب ام سامي والتي تنهمر كالمطر .. ......
.ابو سامي رجل مكافح يحاول جاهدا ان يلبي متطلباتهم فقلبه الطيب لا يقوى على الحراك ولا الخصام .. ولكن هيهات هيهات فالاسعار نار.. والمتطلبات الها اول ما الها اخر والراتب بالكاد يكفي لنصف الشهر.. والجيب تشتكتي الى الله ...
التقيته على غير ميعاد عند معرش بطيخ وكان لنا هذا الحديث..
انا.... يسعد اوقاتك عمي ابو سامي ..كيف وكيف رمضان معك هاي السنه .....
ابو سامي فرك عينه اليسار( بكم القميص ).. اهلين عمي الحمد لله شو بده يتغير علينا غير كثرة الطفر ومقارعة ام سامي و الاولاد ورفع الاسعار ..
انا... طمني عن شغلك وعن صحتك سمعت عامل قسطره والسكر صاير بالعلالي
ابو سامي... هي يا ريت توقف على هيك قبلنا بالهم والهم مو قابل فينا.. عمو الي بخلف بده يتحمل والله من يوم ما قعدت بالدار وروحي طالعه من الزهق وبقضيها اتفشش بالاكل وبام سامي و بالاولاد .....
انا... الله بعين وكلها لربنا بكره بتخرجوا الشباب وبساعدوك والبنات الله بيسرالهن اولاد حلال وبروح همهن ...
ابو سامي....يا من ترى وهم مخلصين قرايتهم.. اه يا عمي والله البنات همهن هو الي متعبني اكثر واكثر هاي الكبيره كلش قربت تخلص و حاب افرح فيهن قبل ما اموت واطمن عليهن منته عارف شباب اليوم بتخاف تعلق مع واحد ويطلع مشكلجي وبميت عقل وساعتها اخذ قرقعة راس ومحاكم وهموم ......
ابو سامي...يا عمي الحياة بدها تضحية وتعب .. والله امبارح امبارح..!! تدينت من جارنا ابو يوسف 250 دينار للبنت قال بدها تلفون من الي بشبك على النت (بتقلي بفيدها بالجامعة ) اكلت راسي هي وامها من كثر الزن كل يوم بدي تلفون بدي تلفون......
انا... وكلها لربنا يا رجل..روق ابو سامي اي خلص عاد...
وماهي الا لحظات والخلوي بلش بالرنين..
ابو سامي... الو ..الو... مش سامعك مين انته..
المتصل... طوط طوط طوط طوط...
ابو سامي تفو على هيك جيل وعلى هيك تربايه ..ولك مين انته...
هاي المره العشرين ولا حد برد بفكرني بنت بده قبل هل مغرب يطير صياماتي... ..يرحم ايام زمان يا حسره على شباب هل يوم ...( جيل بعبع بوكل ما بشبع
بروح وما برجع
بتنادى عليه وما بسمع).. ...
الهاتف يرن من جديد ..ابو سامي ولك الو الو.. لخظات يستند وتخف نبرة صوته...هلا هلا عمي.. كيفك عمو صوتك متغير هو انته الي كنت ترن من الصبح !!!! ...
المتصل... اه اني الي برن مالك بتسكر التلفون بوجهي وشغل تفتفه صاير ان شاء الله مني مزعلك ولا كل هاض من غلب الطرنيب....
ابو سامي... الله يلعنك يا شيطان فكرتك واحد بعاكس من الصبح وهو يرن.. ..
المتصل... جيبلك واحد جديد زي هل ناس وريحنا من قرقعتك كل يوم ....
المتصل... بقلك ابوي اميت بدنا نعزم عماتي لانه رمضان قرب يخلص وبكره اذا ما عزمناهنش بفضحنا بالبلد...
ابو سامي..اني هاي السنة مش عازم حدا ومن هسع ام سامي ما الها دخل هذا الكلام من شوري حكيت مع عمتك ام سليم تا اعزمها فعطت بوجهي تقول مدفع رمضان .. قال ابنها مرضان منكسر اصبع اجره الاوسط ومش طالين عليه عاد بتمضيها تحكي مع ام سامي والبنات طول الليل على( الفس اب) وعند العزايم بتصير تتبشع.........
المتصل.. قصدك عمي الواتس اب.... . مني عشان هيك حكيت معك والله وابوي كمان زعلان على عمتي ام علي..كنست فيه امبارح الارض.. بنتها جاي يخطبها شب بداوم بعمان ورانه عليه بعد المغرب ومش راد عليها..وبس قاللها عن العزومه عملت حالها عازمه كل الاردن وبتقدرش تيجي.. ...
ابو سامي.. معناته قول لعمك سمير يحكي معهن مش بقولن عنه حنون بلكي يقنعهن ..شو الواحد بده يساوي مهن رحم وكله تقرب الى الله ..
المتصل طيب عمي بدك تيجي اليوم تلعب شده ترى الوحد مهو عارف شو يعمل برمضان...
ابو سامي ..طيب بشوف خلص سكر ..
انا... خلص رمضان وكل عام وشعبنا الاردني بالف خير.. واهلين اجر وثواب ...!!! (معقول يطول حد اجر من كثر الصياح وشد الابط )



تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات