معاً نحو أردن خالي من النواب


العتب كل العتب ... هو على الشعب ... الذي لم يناله من صراخه إلا الشقى والتعب ... فلماذا الاستغراب من تصرفات النواب ... فهل كنا نبني عليهم الآمال وتحقيق الطموح ... وهذا الأمل قد خاب ... أم أننا كنا نعرف السؤال قبل الجواب ... لا عتاب على مجلس الحكومة والشللية والأصحاب ... والمثل بقول العتب على قدر المحبة ... فهل كانت هناك مودة ومحبة ... مع النواب ... إذا لماذا الاستغراب ... !!

الصحيح شي بخليك تحس بالوجع ... شعب جائع فاقع ... والبلد بدها تقع ... والمُوازنة كلها شحدة وخوازيق ... وأكثرها رُقع ... ورئيس حكومة ما خلى إشي من شره ... إلا وسعره رفع ... والشعب كل أنواع الرسوم والضرائب والجمارك ... دفع ... وطبعاً كل المصاري إلي انسرقت من البلد ... ما في شي رجع ... والي بالكثير سجن شهرين وطلع ... يعني هو ظل أزفت من هيك وضع ... والنائب أخذ راتب وزير ... وبين الراتبين جمع ... والشعب قاعد يتفرج عليهم ويسمع ... شو ها الحكي ... وشو ها المسخرة ... شي بخلي الحجر يفقع ... ...!!!!!!!

شو إلي عملوه للبلد إلي بدهم راتب وتقاعد كبيرررررر .. غير الحكي والهوش والتنظير .. شو عملوا للمواطن الفقير .. غير زيادة الأسعار والتحقير .. .. شو عملوا للي سرق أموال البلد غير هيك ربك كاتب وهذا إلي بيسير .. شو عملوا للصحة والتعليم .. غير انه ما في مخصصات والموازنة مش كثير .. وبالنسبة للإصلاح ومحاربة الفساد والرشوة والواسطة .. شو في تغير .. يعني كله حكي بحكي .. لا جديد يذكر ولا قديم يعاد .. ومع انه البلد أكلها الفساد .. وقال النواب جايين يدافعوا عن حقوق وأموال العباد .. لكن يا عزيزي .. الشعب بواد والنواب بواد .. الشعب بواد كله .. شوك .. وقرف .. وضنك .. وزفت وعذاب .. ووادي العز والترف فقط للسادة للنواب .. ...؟؟!!!!

يا عمي من الآخر .. ما بدنا نواب .. ما بدناااااااا .. بدنا نضل بالفساد .. وأكل الهوا والعذاب .. بس بدون نواب .. وما بدنا إلي انسرق من البلد يرجع .. ولا بدنا حد يدافع عنا ومن مصاري الشعب يعبي كرشه ويشبع .. الواحد منكم من كثر المصاري .. صار يترع .. والمُصيبة مش راضي يقنع .. الوزير جابته الدولة موظف .. مجبورة تعطيه راتب .. لكن سيدي النائب .. ممكن نفهم مين إلي جاه الله عليك تجي وتسير نائب .. إحنا روحنا عليك على الدار .. وبُسنا ايدك تيجي تخدمنا وتسير نائب .. ولا أنت إلي ترجيت إلى يسوى والي ما يسوى .. وبست ايد الصغير قبل الكبير .. ودفعت مصاري كثير .. وجاي هسا تسير علينا كبير .. وبدك من مصاري الشعب تعوض كل المخاسير .. !!!

كنا نتمنى على السادة النواب .. يطالبوا بالمُساواة بينهم وبين أبناء ها الشعب الطفران .. يشعروا معنا .. لأنه الدنيا خربانة .. والبلد طفرانة .. والناس أكثر من نصها جُوعانة .. وهم بس إلي بطونهم شبعانة ..!!!!



تعليقات القراء

القبطااان
والله النواب سبب الخراب ,, اتركونا للاحكام العرفيه وخلي جلالة الملك يعمل فينا اللي بده اياه,, بس مش كل من هب ودب يصير يحكم ويرسم ,,
16-09-2014 11:16 AM
ابو ثائر
يجب على الشعب الذي انتخبهم ان يخلع عنهم الثوب الذي البسهم اياه ونقول للحكومه التي ساعدتهم في الوصول للمجلس
اسوأخلف لاسوأ حكومه
16-09-2014 11:46 AM
سلة
سلم الله لسانك والله كمايقول المثل اصبحنا نريد سلتنا بدون عنب لانريد اصلاحا ولا نريد برلمانا--(اجا عبدالمعز قلنا عنه عزنا --اجا عبد العز ودزنا
16-09-2014 12:07 PM
شاهد
مؤسسة البرلمان في الاردن . هي رأس مؤسسات الفساد . وهي المؤسس له . للأسف الشديد .
16-09-2014 12:28 PM
منتصر بالله
و بعض الاعيان مش افضل يعني
كما ان النواب محترمين

17-09-2014 08:19 AM
ن أ ب
للأسف نشكوا ممن انتخبناهم على أساس عشائري ولو رد نزل مره ثانيه رح نرد نركض وراه زي القطيع العيب فينا
21-09-2014 02:52 PM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات