المحللين والمنظرين بطلعولك بسواليف غريبه عجيبه ومكرره .... ومنها .. اسمع شو بقولوا ... ( داعش ) طلعت صناعه امريكيه ....اخوان المسلمون طلعوهم برضو صناعه امريكيه .... الجيش الحر برضو صنااااعه امريكيه .... لااااااااا حول ولا قوة الا بالله العلي العظيم .... والعلمانيه والاشتراكيه والليبراليه برضو صناعه امريكيه ... حسبي الله ونعم الوكيل .... فش اشي يا جماعة الخير ( صناعه عربيه ) ؟ ... بلاش .... في سؤال اهم .... الصين صنعت وقلدت كل اشي معقول الصين ما حطيت راسها براس السياسه وعملت ( تنظيمات/مدارس/جماعات/ نظريات /دساتير.... ) تقليد ؟ ... مهي بتقلد كل اشي ... سؤال للصينين .. لماذا لم تطرقوا باب السياسه وتستثمروا فيها .. والله فرصه ما انتو شايفين صارت الامور طاسه وضايعه ( وليخه ) بظل هالربيع العربي ... يا اخي استغلوا الظروف ونزلولكوا كمن دستور /كمن حزب /كمن تنظيم على الساحه العربيه والله سوقهم الايام هذي ماشي ... خذوا سوريا عينه يا اخي .. بلاش سوريا خذوا العراق عينه .. يا اخي بلاش من العراق يمكن بتتحسسوا من العراقيين خذوا الليبين عينه .. بلاش ليبيا .. وخذو مصر .. اقولك خذو اليمن احسن اشي .. شوفتوا هذا الزلمه اللي دخل على المستشفى باليمن بدون احم ولا دستور وقام رمى قنبله هيك ( شيله بيله ) على الناس الموجودين وفجرها وفقعها بصباحهم وهرب ... شوفتوا ... ولا واحد قلوا شو سويت يا زلمه .. ولا واحد قلوا شو اسمك ؟ .. وين رايح ؟ .. مع مين بتشتغل ؟ .. انت صناعة شو ؟ صناعه امريكيه برضو ولا صينيه ؟ .. ولا الاخ عربي (سك) ؟ . هذا ان دل على شيء دل على ان الامور بظل الربيع العربي صارت طاسه وضايعه ..( كل من حارتوا ايدو الو ) .. والكل حسب المنظرين والمحللين ابدا الله وكيلكم بدبوها بظهر الامريكان .. كل اشي صار وبدو يصير ومصارش بدبوها بظهر الامريكان .. على الحلوه والمره ... بقولوا القاعده صناعه امريكيه وكانت اتمولهم ضد الروس .. وبعدين قلبوا عليهم وصارو يذبحوا فيهم ... وبعدين رجعوا المنظرين والمحللين بقولك رجعت اميركا وضمتهم الى احضانها واصبحو صناعه امريكيه ... لا الادهى والامر واللي خلاني اضرب كف بكف انو ( داعش ) طلعت لها وجهين او احتمالين .. احد الاراء والمفكرين ما شا الله عنو بقولك داعش صناعة المخابرات السوريه ... واحدهم بنط وبقولك لا داعش صناعه امريكيه اسرائيليه ... اي حيرتونا ... وان سألت داعش بقولك والله يا عمي ما في منو هذا الحكي انا تنظيم عربي اسلامي انتمي للقاعده .. والقاعده بقولك ناس هي صناعه امريكيه .. واميركا بتحب اسرائيل واسرائيل بتكره القاعده والمسلمين والعرب .. والعرب والمسلمين بكرهوا بعض وبذبحوا بعض .. والذابح والمذبوح يدعمهم اميركا ... نرجع من أول .. عيدوها لحالكم ... قصه ما بتنتهي .

بدي اريحكم ...
نوخذ سوريا عينه .... المعارضه السوريه انقسمت لثلاثين تنظيم متحارب ضد بعضهم ... النظام السوري لما شاف المسأله هيك .. قال بس .. هاي صارت ولدنه الشغله ... شو مال الجماعه دقوا ببعض ونسيوني ... يا عمي انا لسه موجود وما انهزمت .. على ايش هذول بتقاتلوا ... بتقاتلوا على اخذ كل واحد حصتو من سوريا .. طيب انا لسه ما انهزمت .. لساتني بقاتل .. قلك النظام السوري . والله انبلشنا بلشه مع هذول ... شو اللي قاعد بصير يا جماعه ... تركهم يتقاتلوا واعلن هدنه معهم ومنها هدنه منطقة ( برزه بدمشق ) قبل يومين ... قلهم روحوا ذبحوا بعض وخلصوا على بعض والربحان فيكوا يرجع يقاتلني وهي قعده .. الناس والله المعارضه ما صدقت وراحت وبلشوا طخطخه ببعض وهات يا قتل ويا ذبح .. هذا اللي وهذا الك .. والعمليه مستمره ... حتى مسأله هذا صناعة شو ومن شو بطل يهم حدا .. انشا الله كلهم صناعه كوريه تجميع ( تايلندا ) والله بظل هالفوضى هاي والخربطه والقتل المباح لكل الاطراف بطل الواحد صدقا يتعاطف الا مع المدنيين فقط .. وما عدا عن هيك فخار يكسر بعضوا ... الامور خرجت عن نطاق الحريه والديمقراطيه والبرامج والحزبيه ونظام والدين والعرف والتقاليد صارت المسأله بصراحه حرب ( عصابات ) بدهم يصفوا بعض .. تركتهم سوريا واميركا والعالم يصفوا بعض .. قلك سيبنا منهم .. لا ... واللي بجلطك وبعلك ( معارضه الفنادق ) الائتلاف السوري ... اللي دايرين بباريس وبريطانيا وبنظروا على السوريين من الخارج .. وصرلهم ثلاث سنوات على روحات وجيات وطلعات ونزلات وما في واحد منهم عليه العين ... خربوا بيت بلدهم بس بالنق والجعير .... لا عندهم خبره سياسيه ولا اصدقاء للعالم ولا عندهم رؤيا ولا وجهات نظر ولا توحد ولا نفوذ ولا سيطره ولا حتى فيهم واحد بمون على سوري واحد ولا بمونوا على بعض ... راهنت تركيا وبعض دول الخليج عليهم طلعوا بصراحه ( فستق فاضي ) ... فتخلت عنهم كثير من القوى العالميه .. هذول حطهم على جنب انسى امرهم .. خلينا مع هذول يا خوي اللي بلشوا ببعض ذبح ..
عمركم اسمعتوا انو في حزب اسموا ( الجبها الاسلاميه ) تقاتل وتذبح ( جماعه جبهة النصره الاسلاميه ) وجبهة النصره الاسلاميه نازله ذبح بمسلمين ( داعش ) ؟ ... لا والادهى والامر ان الجيش الحر ايضا (مسلمين ) نازلين ذبح بالجماعه الاسلاميه والجماعه الاسلاميه نازله ذبح فيهم .. لا .. والف لا .... والادهى والامر ان عدوهم المشترك هو ( مسلم / النظام السوري ) عمركم بحياتكم كبستكم بمحمد (ص) عمركم شفتوا مثل هاي الحرب كل اطرافها مسلمون .. لا .. والادهى والامر الممولين لهذه الحروب ( مسلمون ) ايضا ... لا.. وازيدك من البيت شعر .. عند صلاة الظهر كلهم الله وكيلكم بروحوا بتوضوا وبرموا السلاح وبصلوا مع بعض ( الظهر جماعه ) وبعد الصلاه بسلموا على بعض وبعدين كل واحد منهم بحمل سلاحو وببلش رشق بالثاني وقتل..
شايفك ... روق يا فارق .... هسه كنت انت وياه اتصلوا .. شو قصتكم .. انتو مسلمين ؟ ... جاوبني .. تحكيش كثير .. جاوب على قد السؤال .. انتم مسلمين ولا لا ؟ .. بقولك جاوب .. مسلمين سيدي .. طيب ما دام انتو مسلمين بتخافوش الله ... ليش نازلين نحر ببعض والعالم كلوا وبالاخص الغربي واليهود بتفرج عليكم وشمتان .. شو اخرتها يعني ... ما تقعدوا وتتفقولكوا على رئيس ونظام ودستور وخلصونا .. اي اللي بشوفكوا على هيك حرب متناحره بقولك اسكت هذول ما ان ينتصروا عليم الله بدهم يحتلوا العالم .. والله يا جماعه حتى لو انتصرتوا بدكم (خمسمائه سنه و30 فلس لا غير) لاعاده اعمار وبناء ما دمرتوه .. يلا السلامه .
نصيحه للشعب السوري .. والله انتو الوحيدين اللي قاعدين بتدفعوا الثمن انتو والدول المجاوره المستقبله لكم ... احسن اشي قول للجماعه ولكل الاطراف اللي جوا بلدكم فرجونا عرض اكتافكم .. بطلنا ... سكرنا .. يفتح الله .. لا عاد بدنا ديمقراطيه ولا حريه ولا بطيخ مسمر ..ز خلص .. توبه .. حلوا عنا ... روحوا ذبحوا بعض بعيد عنا .. قرفنا .. والله ما احنا عرفينلكوا وجه ولا هدف ولا مبدأ .. لما اتوصل الامور انو المسلم يقتل المسلم .. خلص فرطت الامور ... والله مش هيك الحروب ولا الثورات .. هاي مش ثوره .. هاي صارت ( مذبحه ) عينك عينك ... والمسأله مش مقتصره على سوريا .. رح يا حبيبي شوف مصر واليمن ولعراق وليبيا وتونس والسودان والصومال ومالي وغيرو ... هاي صارت حروب مسخره لا الها هدف ولا معنى .
راحت بكيس المدنيين بس ... اتعاطفت الناس والعالم بالاول معكم بعدين صارت الامور فوضى وشوربه .. وانا بقول حان الوقت لتدخل عالمي بكل قوه لوقف الة القتل ولوقف هذي المسخرات كلها .. والله حرام .. حرام ... شو الناس بتدافع مدافعه على نار جهنم .. فش اخره .. فس كتب سماويه تردعكم .... اتقوا الله بانقسكم وبانفس غيركم ... حسبي الله ونعم الوكيل بس ... بدل ما تتقاتلوا وتذبحوا بعض هي اسرائيل قدامكم اتوحدوا اشوف واهجموا عليها ... كلكم .. كل المسلمين والعرب .. بغض النظر عن المذهب والطائفه والمنبت والجنس واللون ... فرجوني شطارتكم .. بدل ما نازلين اتذبحوا بهالمدنيين وبانفسكم والله حرام ... الرأي العام العالمي والداخلي لكل دوله يشعر بصراحه اقولكم اياها يشعر باستياء وتذمر وحسره للوضع الذي اوصلتم انفسكم فيه ... سيبونا ياه ... اي لو واحد فيكوا انتصر بالنهايه بفكر حالو خلص انتصر وانتهت المسأله ..مهو المهزوم راح يبلش فيك تفجير واغتيالات وبلبله والله ما راح يهدي بالك ايها المنتصر .. لعاد شو بتفكر .. خذ العراق عينه .. لليوم فيها تفجيرات واغتيالات وخذني اجيتك .... ما راح تمشي الامور بالطريقه هاي .. وهي انا نصحتكم وانتو حريين .. اللهم اشهد اني بلغت .. عودوا الى صوابكم والجميع يرمي السلاح واتفاهموا بهدوء وخلصونا وخلصوا هالعالم من مشاكلكم الي بطل الها طعمه .

ملاحظه : نفترض مجازا انو كل اللي ذكرناهم صناعه امريكيه ولا صناعه فنزويليه انشا الله ... مش مشكله .. وين ( الكاتلوك ) تبعهم .. وينوا ... بدو اشوف ليكون في خطأ مصنعي ومش عارفين .. لأنو مستحيل اللي قاعد بصير .. وينوووووو ... وينو ( للكاتلوك ) وينو ؟.