نسمع احاديث وقصص لا ندرك مدى صحتها في حالة حدوث وفاة ... هذا الامر استوقفني كثيرا وذلك بسبب تكرار ما يقال بمثل تلك الحالات ... مثلا عندما يتوفى احد كبار السن وتذهب لتعزي تقترب من ( الحجه ) معزيا لها ... العمر الك يا خالتي .. وكيف مات الحج .. والله ( يما ) كنا قاعدين نتعشى وقام الحج اتوضا عشان يصلي .. وبس خلص وضوء ولسه يا دوب وهو قاعد بمسح بأيديه ووجه داخ ووقع على الارض .. اسعفناه بس كان متوفي .. الله يرحمه .

واحد أخر ... والله وهو بصلي عند السجود طول الحج .. قلت شو مالو الزلمه طول بالسجود .. اتفقدتو يما الا هو باقي ميت .. شوف ما احسن هاي الموته ... واخر ... والله يما الحج اتوضا وصلى ومد حالو بعدها على الفرشه وقلي يا حجه روحي ناولني كاسة ميه .. وعبين ما رحت اجبلو ميه للحج ورجعت .. شفتو نايم على جنبو .. والله ما في اشي الزلمه .. اسعفناه الا هو باقي ميت ... وأخر ... والله انا ابني كان سلوكو مش اكويس وبعدين الله هداه وصار يصوم ويصلي هيك خلال شهرين وهو رايح على الجامع خبطتو سياره ومات ... واخر .. والله الحجه اخر عمرها تعبت ..نقلناها على المستشفى وقعدت يومين .. وسبحان الله لما دخل عليها الكتور مسويه يتفحصها لاقها بتشاهد ورافع اصبعها فوق وبعدين ماتت .. اكيد اتشاهدت ..متأكده .

يعني مش ارف انا .. كل اللي قاعدين بموتوا انا استنتجت الله وكيلكم كلهم صالحين مؤمنين متشاهدين متوضيين مصلين صايمين ... معقول .. فس واحد با اخي مات وهو يلعن ويسب على عيشتو وولادو ومرتو وصابتو جلطه ومات .. فس منو هذا الحكي ابدا .. مهو الزلمه مات .. لو رجع للحياه وقلنالو يا حج كيف متت انت .. انا متأكد ثلاث ارباعهم راح يقولك صلي على النبي .. انا متت جلطه من الزعل .. ابني سرق من محفظتي اجار البيت وراح يتمصرف ويتهمل فيه ولما رجع على البيت واجهتوا بالحقيقه وصرخت عليه وعصبت وبعدها قلبي ما اتحمل انجلطت ومتت هذا هو السبب ..

يعني يا حج مش السبب انو حضرتك متت وانت ساجد .. ساجد .. يازلمه انا ولادي ومرتي خلوني احك راسي .. يا زلمه هو انا لاقي وقت اصلي فيه من مشاكلهم .. انا والله متت واتريحت وهم السبب وطمعان برحمة ربي وغفرانه .. سيبنا يا زلمه شو قاعد بتحكي انت .. طيب مهو مرتك وولادك بقولوا غير هيك .. يا زلمه ما انا ميت هو انا قادر ادافع عن نفسي واقولكم ليش متت .. مظبوط الاعمار بيد الله ومظبوط سبب الموت هو انتهاء الاجل بس الحاله اللي انا متت فيه بصراحه ( جلطه ) منهم .. سيبني هسه خليني ارجع على قبري والله ما اني فاضي للقصص هاي .. قال ساجد الله .. اي والله كفروني بعيشتي انسى يا عمي .

تعال على الثاني ... قال انت متت بحادث سياره وانت رايح على الجامه اتصلي العشا جماعه .. جماعه ! .. العشا ! ... جامع ! ... مسن قلك . امك وابوك ... يا زلمه انا كنت مروح من ( الكوفي شوب ) وحاطط التلفون على ذاني بحكي مع صاحبتي وكل ذهني معها ... وقطعت الشارع وانا سارح ... وقامت سياره شمطتني وجابتني هون على المقره زي ما انت شايف .. يعني ما كنت رايح على الجامع .. انو جامع يابا .. والله انا كنت ضلالي وهامل وعواطلي .. سيبنا يا شيخ .. ضيعت حالي .. يا ريتني كنت اصلي ويا ريتني كنت رايح على الجامع .. يا سيدي انا طمعان برحمة ومغفرة ربي .. سيبني هسه .

وانات يا حج قال متت وهي مرتك ( الحجه ) رايحه اتجبلك كاسة مي وكنت قايم من الصلاه .. والله يا حبيبي انا معي سكري وضغط .. وسبب السكري والضغط مرتي بصراحه .. والله قبل ما اموت بساعتين وانا بترجاها لزوجتي اتقوم اتجبلي كاسة مي .. وهي الله وكيلك ذان من طين وذان من عجين .. على عظامي بجعوني ... والله ضارب علي السكري .. مش قادره اقوم .. استنى اشوي .. وظليت على هالموال لما ارتفع عندي السكري ولا نزل والله ما اني عارف وسلمت ( الروح ) الامانه الى ربي وانا عطشان .. وانا فارط من العطش ... وللعلم والله من العيا والمرض ما صليت العشا هذاك اليوم .. واللي بقولك غير هالحكي كذاب .. سيبني هسه .. والله انا طمعان برحمة ومغفرة ربي .. والله اني متت فارط من العطش .. والله اني متت وزوري محطب من العطش .. قال كاسة مي قال .. امنيح هيك.

طيب وانتي يا حجه قال اتشاهدتي قبل ما اتموتي وانتي بالمستشفى ... والله يا خالتي انا لما دخلت المستشفى اصلا كنت مغيبه ... كنت قاعده بغسل بالبيت وضربتني الكهربا وغيبت .... انا اصلا هذاك اليوم كنت قاعده مع جاراتي وما خلينا وحده الا وحكينا عليها .. وبعدها قمت اغسل وضربتني الكهربا .. ونقلوني للمستشفى .. ومتت وانا مغيبه بالمستشفى .. اصلا انا بعرفش شو صار معي .. طيب هم بقولوا انك اتشاهدتي .. وهو انا الحقت اتشاهد .ز بقولك كنت اغسل واستغيب نسوان الحاره .. ضربتني الكهربا وظليت على قعدتي هذا اللي صار .. واللي بقولك غير هذا الحكي مش صحيح ... بس الناس بحبو يظهروا اموتهم بصوره حسنه وموتتهم نهايتها دينيه وصحيحه ومخلصه لله .. اتردش على هذا الحكي بالنسبة اللي انا بحكي عن حالي اما غيري ما بعرف .. سيبني هسه الله يقطع الكهربا وساعة الكهربا.

وانات يا حج قال لما اتوضيت ومسحت وجهك وقعت ومتت ... با خوي يا حبيبي انا صرلي شهرين ما اتحممت .. انا معي تقرحات برجلي اليمنى واليسرى ... والدكتور مانعني من الحمام حتى اطيب واخلص لدهون والدوا وابصر شو ... ومين قلك اني متت لما خلصت وضوء... انا اصلا بصليش .. لاسباب احتفظ بها لنفسي .. بس كنت غلطان .. انا طمعان برحمة ومغفرة ربي .. اخ .. اخ .. بس .. هو انا بعرف اتوضا اصلا .

مداخله .... هسه احنا ما بننكر انو في حالات وفاه في منها القصص حقيقيه ومظبوطه وصحيحه ... بس مش لهالدرجه هاي اصبحت معممه على كل اللي بموتوا ... يا اخي ما بنسأل واحد كيف مات الا بطلعلك اياه ( شيخ دين ) او مات وهو يقدم تضحيه للأخرين .. او مات بسبيل يساعد شخص او انسان .. او مات وهو رايح يتبرع للجامع .... او مات وهو بساعد جارو بتصليح خزان المي ... في منو هذا الحكي ما بننكر .. الخير ما انقطع .. والصالحين والصالحات موجودين .. وحسن الخاتمه للذي رضي الله عنه موجوده .. لكن مش لهالدرجه .. كل واحد بموت معقول هذه القصص التي تنسج حول صلاحه وتقواه واخلاصه معقول معممه بنسبة 99 % من البشر .. ول .. ليش الناس ما بتقول الحقيقه ... ولا عشان كل واحد بقولك خلص خلي الناس تعرف انو تقي وصالح ومنو لله بعدها ... بلاش نفضح الزلمه .. انسى ... مهو برضو اشي ومنو حتى تصبح المسأله معتدله .. في خير وفي شر .. في موته حسنه وموتة سوء .. الواحد يحكي الصح .

حتى بقضايا القتل .. بقولك والله فلان طخ فلان وهو يا حرام رايح يصلح بينهم .. او رياح يتفاهم مع الزلمه اللي متهاوش معو بهدوء ... وقام هذاك فاجأو وطخوا .. يعني ما كان معاه مسدس وكان ناوي مع سبق الاصرار والترصد رايح يطخ الزمه ويذبحو ؟ .. لا .. وانو هذاك الزلمه بدو يدافع عن نفسو وقام طخ المعتدي والمتربص .. لا .. بطلعولك المقتول انو يا حرام مسكين وبريء ورايح يصلح .. في مثل هذه الحالات .. الناس ما بعرف ... حتى بالموت بتتوارى عن قول الحقيقه ... مع انو الموت وقع وحصل ... يا اما بتحكيش اشي وهو الافضل خلص اكتفي بقول ( الله يرحمو .. اجلو انتهى ... غفر الله له ذنبه واسكنه فسيح جناته ) وخلص .. وبس ... بغض النظر ان كان صالح ولا طالح هسه هو بين ايدين الله وحسابه عند الله اذ كان بالجنه او بالنار ... وانتهينا .. فش داعي لنسج قصص احيانا بتكون مكشوفه ومعروفه ولا ندري مدى صدقها من كذبها او المبالغه فيها... في حين هناك حالات وفاة امبينه عين الشمس لا احد يستطيع ان ينكرها .. مثل من مات شهيد .. واضحه المسأله .. معروفه لا يوجد داعي احد اصلا ان يسأل كيف مات فلان قصه معمه ومعروفه للجميع .. او من مات وهو يؤدي واجبه وبشهادة الجميع .. هذه قصص حقيقيه غير خاضعه للتأويل او وضع عليها علامة استفهام .... اما القصص الجانبيه الاخرى والمخفيه عليها مائة علامه استفهام بسبب تكراراها عند الجميع وبغالبيه مطلقه.

على اية حال .. مما دفعني للكتابه عن هذا الموضوع لتكرار القصص والروايات على اذني باستمرار .. نفس القصه .. ونفس سبب الوفاه ..... مما اثار فضولي وبدأت اسأل .. معقول كل الناس بتموت هيك بنفس الاجواء .. والله ممكن .. العلم عند الله .. الله يرحم الجميع.