قمت الصبح من النوم لقيت حالي ( مفلوز ) ومرشح .. السبب هو ( التوقيت الشتوي ) .. انا خطيتي برقبة مين ؟ .. هون السؤال ... ابني اعطيتو ( ربع ليره ) يجيب خبز .. ضيع الربع ليره .. شو بدي احكي .. ما لومت ابني ... مهي مبينه السبب ( التوقيت الشتوي ) ... بلاش .... انقطعت بالمي بنص الاسبوع .. برضو السبب التوقيت الشتوي ... الازمه السوريه سببها ( التوقيت الشتوي ) ... عام 1948 احتلت اسرائيل فلسطين والسبب كان معروف بس الامم المتحده كانت مخفيه السبب للناس .. لكن افصحت عنه فيما بعد وقالت سبب الاحتلال هو ( التوقيت الشتوي الاردني ) .. هتلر قبل ما ينتحر ويلظ انفاسو الاخيره قال كلمتين . فهو لم يتشاهد او يوصي بكلبو لجارهم قال انا انهزمت بالحرب العالميه الثانيه والسبب يعود الى ( التوقيت الشتوي الاردني ) ثم قلب على يمينو ومات .

اسئله لها علاقه بالموضوع ...

1- لماذا انهزم الاردن ( 5/0 ) امام الارغواي ؟

2- ليش ( البوعزيزي حرق حالو ) ؟

3- ليش مديونيتنا بـ ( الاردن ) وصلت 18 مليار فاصله 30 قرش؟

4- ما هو سبب البطاله والفقر بالاردن ؟ .

5- ليش ( زين العابدين ) هرب على السعوديه ؟

6- ما سبب التفجيرات المستمره بالعراق ؟

7- ليش اوباما اخر عملية المفاوضات بين اسرائيل والفلسطينيين ؟

وغيره من الاسئله المثيره للجدل .. اجوبة هذه الاسئله اكتشفها معهد ( دورادو اسكمو ) ببريطانيا بعد ان عمل دراسه عالميه وجد ان الاسباب تعود الى ( التوقيت الشتوي الاردني ) .. والادهى والامر كشف هذا المعهد ان اسباب العالم الكارثيه والغير كارثيه وتفسير الظواهر الغريبه ومنها ( مثلث برمودا ) يعود بشكل مباشر الى ( التوقيت الشتوي الاردني ) ..

فبعد هذا الكلام ظل في كلام ..

لماذا الاصرار على التوقيت الشتوي ؟ ... لماذا التلاعب بالساعه بين الحين والاخر ؟ ... احنا الشعب العربي بهمنا ( الوقت ) ... لعاد .... ليش الحكي ..

الصينيون واليابانيون والالمانيون والامريكان وكثير من الشعوب ( الغربيه ) تحتها خطين ( يعملون ) باليوم ( لا يقل عن ( 18 – 20 ) ساعه يوميا ... ومكيفين حالهم مع وقتهم .. لا بهمهم نهار ولا ليل .. الكل منظم وقتو رغم انهم من الدول العظمى ومن الدول الاقتصاديه ومن الدول المتقدمه .. عمرنا بحياتنا ما سمعنا واحد منهم ( شكا ) من مسألة التوقيت الصيفي او الشتوي .. هذي الامور ما بتصير الا عند العرب وبس ... اي انا شخصيا صابني ( صرع وجنان ) من هاي المقوله .. التوقيت الشتوي .. التوقيت الصيفي .. يا عالم يا هو .. التوقيت .. التوقيت .. مش فاهم انا شو يعني تقديم ساعه ولا تأخيرها بعالم الشعوب .. انا ولادي بروحو على المدرسه وما تأثرت ... (كيفت) نفسي انا وعيلتي واولادي على هذا التوقيت وين المشكله ... اذا المسأله فيها توفير ليش لأ ؟ ... اي اكاد ان اجزم وبدون حلف يمين ان حكومه دولة النسور لو تتخذ قرار ( توزيع خبز مجانا على المواطنيين ) الا وثاني يوم تطلع احتجاجات ويظهر استياء الناس .... في ناس ما راح يعجبها توزيع الخبز مجانا .. بقلك .. كيف يوزع خبز مجانا ابصر شو قصدو .. او يا عمي هيك بصير اهدار للمال العام .. والله اتحيرنا منيني انبوسك يا قرعه ... فعلا رضا الناس غايه لا تدرك ... وبقولك بدهم يتفقوا على قانون انتخاب او يصير عنا حياه حزبيه .. اذا الناس منقسمه على نفسها بالقضايا الداخليه والخارجيه كل واحد الو رأي .. فعلا ( شارل ديغول ) لما استلم الحكم قال والله ما اني عارف كيف بدي احكم شعب ( ينتج ) 400 اربعمائه نوع من انواع ( الجبنه ) ... ومع هيك استطاع ان يضع خطوط عريضه للمجتمع الفرنسي ووصلوا الى مرحله اتفاق وتفاهم ونهضه ...

انا اللي قهرني وجالطني انو في ناس بهالبلد بتفكر حالها هي الكل بالكل .. وانها هي صاحبة القرار الشعبي .. يا عمي في ناس تتأثر بالقرارت لاسباب من هنا وهناك بلا شك ... لكن ليست الاغلبيه المطلقه بالشعب .. يا اخي نفترض الاغلبيه المطلقه مش عاجبها قرارا ما .. بس في ( ناس ) ثانيه معجبه ومتماشيه وموافقه على قرارات الحكومه .. كيف يعني كلام الناس هذول يمشي وكلام ناس ثانيه ما تمشي ... الحكومه على مين ترد .. في ناس بتخاف لأسباب كثيره ما بتقدر تظهر موافقتها على سياسات الحكومه وقراراتها تجنبا للقيل والقال والحساسيه وغيرو .. وهي اظنها من الاغلبيه الصامته .. هذول الناس مش هم كمان مواطنيين .. ولا رأيهم ما الو اهميه ؟ ... شو يعني ( ساعه ) بحياة الشعوب .

سؤال بريء .. ليش كل اشي بصير بهالبلد من ( سوء ) يستند الى هذا ( التوقيت الشتوي ولا الصيفي ) ... اين مسألة القضاء والقدر بالموضوع ؟ ... لقد اخذ موضوع ( التوقيت ) مساحه واسعه من الحديث بكل الوسائل .. الاعلاميه والغير اعلاميه .. يا اخي تعال على حالك اشوي وكيف نفسك شو صار يعني .. شو يعني توقيت شتوي .. هي اصلا ( شتت ) السنا .. يلا .. حتى شتا ما اجاش السنه ..... صار بدو التوقيت الشتوي ( صلاة استسقاء ) حتى ينعكس على ارض الواقع .. عجبكم .

تركنا كل اشي وبلشنا بمسألة التوقيت .. يا اخي في ملفات كبيره وكثيره بالبلد بدها شغل وهداوة بال .. والله مش كل قرار توخذو الحكومه اخبط ولا الناس قايمه .. كيف بدها تشتغل الحكومه وبطالبوا منها انجازات .. اذا قرار بسيط اتخذتو قامت الدنيا وما قعدت .. كيف بكره لو اتخذوا قرارات مصيريه شو بصير بحالنا ... سيبو الحكومه تشتغل .. يعني هذا القرار هل هو قرار شخصي ..( دولتو) بقولك بنوفر على الخزينه ولو انشا الله ( قرش ) مش الشعب الاردني اولى فيه .. يعني اذا بوفر( 7 مليون ) مش هذول بعملوا لا يقل عن 10 مصانع او مشاريع سنويا بأكثر من محافظه وبساهم بالتقليل من البطاله .. مش هذول ال ( 7 مليون ) انشا الله مليون ليره مش هذا المبلغ بتشتري فيه الدوله ادويه لمراكز الصحه والمستشفيات الحكوميه ..

اذا الحكومه اخذت قرار معين او منحت صلاحيات او قامت صلاحيات او سافرت او عملت مبادره او مشروع وطني او فتحت مدرسه او مستشفى او استقبلت ضيف او اخذت اي قرار داخلي او خارجي .. اخبط الا وستجد من ينهض من فراشو ويبلش بالحكومه ليش / كيف / وعشان مين / وشو قصدها / وبصير/ وما بصير ... كيف دوله بدها تنهض بهاي الطريقه .. مش عارف ؟ ... كيف بدنا انحل مشاكلنا مش عارف ... هذا جميعه يسبب ( بطئ ) بالتنفيذ والتنميه والتقدم ...

يعني احنا حصلنا على ( كرسي بالامم المتحده عضو غير دائم ) مع كبار الدول ... يعني برضينا ينط واحد من الدول الكبار ويقوللنا يا جماعه ( كيف بدكم اتحلوا مشاكل العالم وانتو على ساعه ( توقيت ) مش متفقين ؟ .. على قدم .. أخر ..أخر .. قدم .. قدم .. أخر .. ليل .. نهار .. نهار ليل .. شو هاذ ؟.
اخواني ما دام انتم اخترتم من يمثلكم بمجلس النواب .. ومجلس النواب تكلم مع الحكومه بهذا الموضوع ... والحكومه ارتأت ووجدت ان مسأله التوقيت الشتوي ولا الصيفي تم التعامل معه لأسباب منطقيه ولا يعكس ذلك التوتر المجتمعي او يستحق هذه الموجه وهذه الضجه ...وانتهينا .. ليش الشعب صوتو يعلو على صوت مجلس النواب الذي الشعب الاردني ؟ ... لعاد ليش تم انتخابو من الشعب .

على اية حال .. انا شخصيا ما بتفرق معي .. والله لو قدمت الحكومه ( يوم ) مش ساعه ما بتفرق معي .. راح اكيف حالي مع قراراتها المدروسه .. لا يمكن ان تكون قراراتها مزاجيه او ارتجاليه او عناد او اي شيء من هذا القبيل لا سمح الله .. هذه قرارات بالنهايه تصب بمصلحة الدوله والشعب وليس لمصلحة احد ... عندما ارى ( اطفال ) سوريا والعراق وغيرهم من المنكوبين بالعالم اتألم واتحسر واسال الله ان يعينهم ويصبرهم ويحل قضيتهم .. وعندما انظر الى الجانب الاخر لقناه اخرى تتحدث عن توقيت شتوي ولا صيفي بقول .. احنا في ايش والناس بأيش ... هذا بواد والثاني بواد ... سيبونا يا عالم من هاي القصص والله الامور مش بالبساطه اللي بتخيلها الناس .. الوضع صعب .. وصعب جدا .. هناك قضايا وامور ابر م هيك بكثير تنتظرنا .. روحوا خلونا نشتغل ونعمل ونطور البلد وخلي الحكومه تشتغل والله ما حدا فاضي لهاي القصص .. مع احترامي للجميع ووجهات نظر اجميع .. هذا رأي الشخصي ووجهة نظري .. لا تدفعوا الحكومه الى الاكتئاب والاحباط .. اتركوها تشتغل .. اعتقوها لوجه الله .. انا شخصيا يأست وانصرعت من هاي الامور... وضعنا صعب والقادم اصعب .. الله يفرجها على الجميع وبالاخص الدول العربيه والاسلاميه المنكوبه والدول العالم الاخرى المنكوبه ايضا والتي نتعاطف معها انسانيا .

مع احترامي للجميع وبدون حساسيه ... انا اتعودت على القاب ( القلم المأجور /منافق الحكومه /ذنب الحكومه / عديم الضمير / بتخافش الله / مهسهس/ كويتب/ ....) انا بحكي اللي شايفو ورأي الشخصي ممن باب حريه الرأي والتعبير ولا هاي كمان انتو ضدها بس انتو بدكم تحكو وغيركم لأ .. ما بصير ..على ايه حال ..واذا احد لم يعجبه كلامي اتوكلوا على الله وبلشوا طخ علي بس واحد واحد حتى ما يعلق سسيرفر الموقع .. وشكرا للجميع .. بلشوا.