يا زلمة ايام العيد قربت شو اشتريت حلو وشو اشتريت للعقب يا هملالي انت وين واحنا وين ولك جيف انته ما بتدريش انه واحد من الاولاد باقي يسولف وطرفش حجي اطرفش ويقول والله غير انجازي كل واحد سرق ونهب من الاموال الاميرية ولعين الوالدين بقول كمان بدنا نحاسب الفاسدين وكانهم الجماعة باقين يستنوا فيه لما يقول هالجملتين – الله وكيلك خفشوه بليل وحطوه بالحبس- وشوه هالعيد الي الله حلله ولاعنين الوالدين الفاسدين حرمونا منه.

فيرد عليه جاره الحراث يا زلمه انته من كل عقلك ابتحجي معقول مشان واحد حجى جلمتين حطوه بالحبس.

شايف يزلمه مهو ابني حمار لعين والدين وإلا لازم يقول ويحجي نعم يعيش الفساد ويحيى الفاسدين ويسقط الطاهرين ويعيش السراقين ويلعن شيطان الامينين لو قال هيج لعين الوالدين جان محداش حجى معه وبجوز كمان يصير وجه ربعه ويصير يروح ويندعي عند الجماعة.

يا زلمه فكنا من هالسوالف الي ما الها طعمه ولك كانوا يقولوا انه فيه عندنا حريه وديمقراطية وعدالة اجتماعية طلعت كلها جذب ابجذب والله مثل ابر تخدير الدواب ما غيرك اقبل بالواقع غصبن عن راسك طيب لاعاد جيف بدنا انعيد.

بسيطة منطيح عالسوق ونشتري جعجبان وعلبه راحه وسفط بسكوت والي بحجي بنقله اتحلىة يا حبيبي فعلا انك حراث وفلاح ومتخلف ولك شو هاظ الجعجبان والراحه

ها شو لعاد ولك انته وين عايش هاي سواليف عفى عليها الزمن اليوم الناس بتشتري الشوكولاته والجلاجسي والباونتي وسنيكرز والبن بون والكولتي ستريت والمارس والمرسي

ولك شو هضول الي بتحجي عنهن اسماء اجانب او بلاد بحجوا انجليزي وفرنجي

لا يا مسكين هاظ الي بشتروه الي ابنك حجى عنهم والمصيبة انه كل هاظ على حساب المساكين والي بفتح ثمه غير عند طبيب الاسنان ابيلتعن فاطسه

يا حبيبي الله يرحم ايام الجعجبان

طيب بدنا نشتري للقواريط حبة شرايط من البالة

يا حبيبي ولك حتى شماشير البالة صارت بالعلالي لانه السفله والحرامية صاروا يزاحموا الطفرانين على شماشير البالة والفقير بطيح عالبالة حتى يستر حاله وعياله والسفله بيطيحوا عالبالة ميشان الماركات العالمية ومش بس هيك ولك احنا مطلوب منا ان نعيش شحادين عرايانين جيعانين وخدامين وبدهم ايانا سحييجه والي مش عاجبه يضرب راسه بالحيط او السجن بستنا فيه او يروح يحرق حاله درب جهنم وراه.

ولك ابتعرف انه اصبح مفروض علينا فرض انه نكون مجرمين او سراقين او قطاعين طرق ميشان بس انعيش مثل عيشة الدواب.

ولك لعاد خلي العيد لصحابه.