العيادة الأقتصادية


الشعار (حمية ، رفع ، تهبيط ، رجرجه ، تنخيل )
الرؤيــــة : تريح المواطن بالمرة .
الرسالة : تحليل ، تقديم الخدمة ضمن الفواتير والحُفر المتاحة ، تقديم المُشاورة والصرف الصحي والضغط المناسب للحالة.
عدد المرضى : غير محدد.
نفتح العياده خلال عطلة العيد
الدكتور : نادي على المريض الأول لوسمحتي وشوفيلي كم مريض بالعياده. 
الممرضة : حاضر دكتور.
المريض الأول : سالم سليم السلامة ( ابو سليم ) .
ابوسليم : يالله يالله .
الممرضة: استنى لو سمحت اخ سالم خليني اشوف الدكتور .
ابو سليم : ماشي انا مش مسرع ، مش مستعجل .
الممرضة : دكتور اول مراجع اسمه سالم اسمحله يدخل .
الدكتور: خليه يفوت ، وخلي كل مريض يكشف عن فواتيره ومن ايش بشكي واذا فيه فواتيرأو مراجعات قديمة يطلّعها .
ابو سليم : صباح الخير دكتور.
الدكتور : اهلين ابو سليم ، يا زلمه انا كثير بشوفك عنا ، من ايش بتشكي .
ابوسليم : دكتور داخل عليك ومعي كيس كبير تساعدني انا معي رجّه بالفواتير ودوخه بالدفع ومعي مغص بالبنزين وارتفاع بضغط الغاز والكهرباء وعندي كمان............ .
الدكتور: شوه عندك كمان .
ابو سليم : هبوط بضغط الراتب .
الدكتور : خليلّي هبوط الراتب على جنب الأن ، لأنه كل الناس عندها هبوط بضغط الراتب ، اطلع على العداد واكشف عن فواتيرك .
ابو سليم : اه دكتور ماشي .
الدكتور: لا بسيطة ابو سليم هاي شغلات زغنوطه راح اطلبلك صورة رجرجه وتنخيل ، معك اشي بجيابك .
ابو سليم : ولا قرش والله اجيت مشي .
الدكتور : صادق صادق ابو سليم من غير ما تحلف والله لريحك من هالحال ، وهاي صوره urgent مع تحاليل.
 ابو سليم : اه دكتور طمني شوه فيه .
الدكتور : اه ابوسليم هاي التحاليل والصورة جاهزات ، شغلات طالعة معك كأنها جديد ، يا سيدي النتائح بتقول انه عندك ارتفاع بسُكري الملابس هذا جديد وعدم انتظام بدقات فاتورة المياه وفيه انفلونزه خضراوية واسهال برتقالي حاد ، فقدان الوعي اللحمي والسمكي وكحة بندورية مع خفقان وأزمة دواجن غير مستقرة.
.
ابوسليم : يا حبيبي كل هذا معي .
الدكتور : اي شوه انته مع الي راجعني امس عنده المسكين انسداد بالصرف الصحي وهريان بالجورة هذا مصيبته مصيبة انته ولا اشي بسيطه يا زلمه هذا غير الضغط الي معك بالكهرباء والغاز بدي اكتبلك على حمية مع الرجاء الشديد الألتزام فيها .................................. .
ابو سليم : وما فيه داعي ارجعلك .
الدكتور : لا ما فيه داعي يا سيدي وبتتحمى اعتباراً من اليوم بتنسى اشي اسمه كهرباء وغاز وبنزين وملابس وخِلافه هذا اول باشتان .
الباشتان الثاني : بتنسى اشي اسمه مياه أو خبز أو اكل وخاصة اللحوم بمشتقاتها وصّدقني يا ابو سليم كيف صاروخ كروز بصيب الهدف ؟ حميتي مثله !!! وبعد هيك عمره ما بصير عندك امراض إقتصادية ولا رآح ترجعلي وتقاعُدك رآح يرجع للحكومة اذا ما فيه ورثة ويرتفع ضغطة على الأخِر، وهيك بتكون خلصت من كل المشاكل .



تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات