صدف وان زرت احد الدول الاجنبيه .. بلد متواضع لنقل مثلا ( قبرص ) .. وما ان اقتربت الطائره من مطار ( لارنكا ) حتى ظهرت ( جزيرة قبرص ) اشبه بالشلن .. صغيره كثير .. ترى معالمها كلها وانت على ارتفاع 3000 قدم قد ما هي صغيره .. ختمنا الجوازات ودخلنا بدون فيزا .. كان الشرط ان يكون بحوزتك لا يقل عن 2000 دولار لدخولها ... اجتمع علي نفر من الناس يتكلمون اللغه الانكليزيه ويعرضون علي خدماتهم .. اقامة بالفندق .. تأجير سيارات ... برنامج سياحي لزيارة الشواطئ والشاليهات .. وغيرو .. ففضلت ان اختار ما يناسبني بعيدا عن هذه الاجواء التي من الممكن ان اتعرض للنصب او الاحتيال او التخويث وخاصة اني غريب واول مره بزور هاي الدوله .. على اعتبار انها دوله .. يا باي ما اصغرها .. صغيره كثير .. شارعين وسده زي ( قطعة فلين بطشت مي ) ..
المهم اخذت تكسي موديل سنتو وذهبت الى العاصمه ( نيقوسيا ) بحثت عن مكان ابيت فيه وانا الف وادور بين الفنادق حتى اندليت على فندق رخيص ويؤمن ثلاث وجبات يوميا مجانا ...
اصحيت الصبح الساعه ال 10 صباحا ونزلت على مطعم الفندق المتواضع ...
- شو في عندكم فطور اليوم .
- نعم يا خوي ... فطور ايش ... صحيلي الساعه عشره وبدك فطور .. اصحا يا حبيب امك .. احنا بنقدم وجبة لفطور أساعه السته الصبح وبس.
- أيش ؟ .. الساعه السته .. يا حجه (صاحبة الفندق ) وأنو إللي بدو يصحالكم الساعه سته عشان يوكل .. وهو الواحد باقي نايم على شجره يعني .
- هذا اللي عنا .
- طيب على فرضنا انو اصحيت الساعه السته شو بتقدمو انتو للواحد من فطور ؟.
- يعني شو بدك انقدملكم .. مشاوي يعني .. اشوية زعتر وزيت او اشويه زبده ومعلقة ( تطله ) .. يعني شيء من هذا القبيل ومع فنجان شاي ولا تزعل .
وجدت انو الفطور مش محرز .. ومش مستاهل اصلا انك تصحالو بدري .. يعني مجرد ذكروا بلائحة الفندق من اجل يغروك بالاقامه طلع بند الوجبات الثلاث اكبر من الحقيقه على ارض الواقع . والله اللي بسمع بوجبات ثلاث بقلك راح يزيد وزنو الواحد عشره كيلو على اقل تقدير من ورا وجباتهم .. طلعت سولافتهم تخويث ولف ودوران .. قلنا يا دايم .. اطلعت من الفندق ورحت دورتلي على مطعم شعبي وفطرت وخلصنا من هالشغله ...
الساعه الرابع رجعت على الفندق وبرضصو قلت قبل ما اروح على غرفتي خليني اتغدى وبعدين بنملي ساعه .. روحت زي الأسد واثق من نفسي وقعدت بمطعم الفندق برضو المتواضع .. يا باي شو في صراصير .. عادي .. لم اتفاجأ .. متعودا دايما .
- شو بدكم اتغذوني اليوم ؟.. شو طابخين ؟
- نعم يا خوي .. غذا أيش ؟ .. جايلي الساعه اربعه وبدك تتغدى ..( برضو ) اصحا يا حبيب امك .. احنا بنقدم وجبة الغدا أساعه وحده الظهر وبس.
- أيش ؟ .. الساعه وحده .. لا حول ولا قوة الا بالله العلي العظيم .. صبر جميل وبالله المستعان .. انو اللي بتغدى الساعه وحده .. شو هالبرنامج هاذ .
- هذا اللي عنا ... وكمان تعالي جاي .. انت مستلمنا عشره بلدي .. شو قصتك ؟ ... كل اشوي ناططلنا بدي أكل .. بدي افطر .. هذا الموجود .. ( حتى القبرصي بقول عشره بلدي ) وبقولك فش تقارب بالحضارات او تقارب ( بالمشربحه ) .. شايفها نفس الأشي ..
- ماشي .. خلص .. وعلى فرض انو اجيت موعد الغدا شو بتقموا للواحد يعني مثل حالاتي مقيم عندكم ومش ملتزم ببرنامجكم .ز فرضنا التزمت ببرنامجكم شو بتغدوني لا سمح الله يعني .
- شوربة فريكه .. وقطعة خبز .. وصحن مخلل خيار ولفت .
- هذا غداكم ؟
- لعاد شو بدك ؟ .. دافع ( 5 باوند ) اي ما يعادل 15 دولار .. اي ما يعادل 11 دينار اردني .. شو رأيك انجوزك فيهم .
- لا .. اعوذ بالله .. لا سمح الله .. شو هالحكي .. مين قال هيك .. يخلف عليكم .. هيني طالع على غرفتي وبعدين بنزل اتغدى برا .. ولا تزعل .. بس على فكره متى وجبة العشا عشان احسب حسابي .
- خليها على التساهيل .
- شو يعني على التساهيل ؟
- يعني بدك اتقول قبل الساعه السته .
اطلعت على غرفتي دشيت حالي بمي بارده لأنو المي السخنه معدومه .. مفقوده .. مع انو مذكور بلائحة الفندق (ماء بارد ساخن / بالانجليزي طبعا ) .. بس فش منو .. المروحه بتشتغلش .. الغرفه مليانه صراصير .. الغرفه عباره عن مزبله .. الواقع يختلف عن البرنامج .. المكتوب عكس الواقع .. الوعود بالخدمه كذب بكذب .. الامتيازات عباره عن ديكور .. بس الواحد شو بدو يسوي .. انا شو وداني على قبرص اصلا .. أخ ..أخ بس .. كنت عزابي وحبيت اشوف العالم الاخر .. اشم هوا .. اغير جو .. اتعرف على ثقافات الغير .. طلعت السولافه كلها زي بعض .. وين ما اتروح في صراصير .. في تخويث .
انزلت على مطعم الفندق قبل وقت العشا وقعدت بالمطعم .ز اقتربت مني صاحبة الفندق .
- اتفضل بأيش اقدر اخدمك ؟
- بصراحه ... انا قاعدلكم .. حتى يجي موعد ووقت العشا .. بدي اتعشا .. بالعربي الفصيح ... بالقبرصي المليح ... بدي اتمالح انا وياكم .. بدي يصير بينا عيش وملح .. بدي اذوق اكلكم .. بدي اشعر اني استفدت من برنامجكم .. بدي اشعر انو ما انضحك علي .. في عنك مانع ؟
- لا ما في مانع .. استنى نص ساعه وبنجبلك وجبة العشا .
استنيت نص ساعه .. وبعدين جابت صنيه فيها العشا .. ونزلتو على الطاوله .. ( اربع حبات زيتون / قطعه زبده بحجم حبة الزيتون / معلقة تطله صغيره زي معلقة الدوا / خبزة حمام لا يتجاوز طولها 3 سم / فنجان شاي ) .
اطلعت فيهم وبلشت اكل واتسلى فيهم وانا بحكي معها .. شو هاذ ؟
- هذا العشا .
وما ان جاوبتني كنت خلصت كل العشا المفترض .. العشا ( العينه ) .. وين العشا ؟ .. مش شايف اشي .
- ما انت اكلتو وانت بتحكي معي .
- هذا بتسموا عشا ؟ .. ماشي يا ست الحسن .. خذولي طريق .

اتعلمت درس مرتب .. ليس كل ما هو مكتوب قابل للتنفيذ ... الناس ربما طبيعتها ساذجه ... طيبة القلب .. تثق ثقه عمياء بالاخرين .. لكن بالمقابل هناك من يلعب على وتر تلك الطبيعه ... يغشها .. يستغلها .. يلتف حول المضمون .. مهما بلغ الواحد من درجة الوعي والادراك والذكاء لا بد وان يأتي شخص او جهه تضحك عليك .. وستكتشف ذلك فيما بعد .. بعد ان يكون الاوان قد فات .. ولكن ستخرج بتجربه .. بانطباع .. هذا سينجبك فيما بعد بالتلاعب بك وان تكون ضحية لديكورات مزيفه ..

ملاحظه : سافرت الى دوله اخرى .. وعرض علي تقريبا نفس البرنامج لأحد الفنادق ... فضحكت .. وفضلن النزول بأحد الفنادق المتواضعه بدون وجبات ولا اغراءاتهم البرامجيه ... لكن الأدهى والأمر اني اكتشفت فيما بعد بأن الفندق الذي عرض علي برنامجه المغري كان صادقا .. وكانت الشباب إللي نزلوا بهذا الفندق الله يسامحهم نازلين ( معط ) من المشمر والمحمر وبكل وجبه وبأي وقت .. وحمام بارد سخن .. ورفاهيه جيده .. يخرب بيت حظي ... لما اجيت اعمل فيها فهمان وفهلوي راحت علي .. والله الواحد بطل يعرف الصادق من الكذاب بالأيام هاي .