أحلام حاوية

• مرحبا قايز . 
• اهلين مرحبا.
• وين زمان ما اسمعنا صوتِك .
• والله الجيران كاتمين على نفسي ، صارلي اسبوع مش قادرة اتنفس من ريحة حالي ، وسيارة الزبالة والله ما بشوفها ، لكن الحمد لله اجه ابن الجيران وشافني فوول زبالة ، حرقني يكثّر خيره شعّل فيه النار ويومين ت انطفيت ، على طول رنيت عليكِ ،وأنتِ وين طمنينا عنّك .

• انا الحمد لله بخير لسه مكاني بجانب عمود الكهرباء عند الدوار القديم . 
• والله ، كيف صحتك وليش صوتِك متغير .
• اسكتي اسكتي هوّر عليّ بكب ديانه واطلعت الحمد لله بأعجوبة شحطني من الجنب شويه .
• يه يه سلامتك وبعدين .
• هوّ صاحب البكب اليّ ضربني زي ما تحكي زبون عندي بخفف عني دائماً علب الكولا والبلاستيك والشباشب والكراتين ، سامحته ، هذا الختيار الي على راسه شورة وعقال ومعة 3 اولاد صغار .
• اه والله بشوفه مرات بمرعليّ الله يعينه بده يعيش وشوه كمان .
• حكيتله الدور الي جاي جيب مرتك معك لو سمحت ما بجوز انته زلمه تنزل فيّا كل يوم لازم يكون معك محرم ، وسمعت مراقب البلدية بحكي بدهم يوخذوني على التصليح.
• طب فيه مكانك بديل .
• بقولوا بدهم يجيبوا برميل....... يغطي مكاني والله يا حوحو جماعتي كلهم عاديين ( فقراء ) الحمد لله ، دائماً انا فاضية اكثر اشي برموه فييه كيس فاضي ، لكن الضغط بزيد عندي اوآخر وبداية الشهر عند ما تنزل الرواتب ، بتعرفي يا حوحو .

• ايوه :
• يا الله شوه انا حابه اتعرف على زميله النا تكون بحي راقي ، خلينا نرفع من مستوانا اشويه ، يعني حاوية وزير أو مسؤول كبير مش مثل حاوية فقير أو موظف صغير ، فكري للمستقبل
• والله انك صادقة ، حتى حاوية الوزير بتكون ملمعة ومرتبة والزبالة مكّيسة ومعطرة وبنفس اليوم بفضوها البلدية ، يا ريت انتقل ولو أمين عام قصدي حاوية أمين عام ااااااااااااااخ بسسسس.
• ومين سمعك .
• الله كريم ، أكيد غير حد يسمعنا من هل بتنصتوا على لخطوط ويوصلوا مصيبتنا للمسؤولين في البلديات .
• اتمني أحلمي قولي اشي بلكي ربك افرجها .


• شو شو بدي أتمنى بتمنى انهم البلدية يهتموا فينا اشويه ويسمعوا صوتنا ويغيرولنا قصدي يفضّونا كل يومين أو ثلاثة أيام مش ثلاث أسابيع أو اكثر على شان ما تطلع ريحتنا وما حد يحرقنا ويشعّل النار بالزبالة خاصتنا ، لأنه حرقنا من قبل الجيران يعني تلوث للبيئة وهناك أطفال صغار بالحي ومرضى ما بتحملوا .
• لحظة لحظة
• ايش
• اجه زبون رمى فيه كيس ، ايوه كملي .

• لانه احنا الحاويات على مستوى الوطن نظافتنا تمُثل وجه حضاري ُمشرق للبلد ، ولمّا يكون منظرنا زي منتي شايفة شوه بدهم يحكواعنا الضيوف .
• يه خلص رصيدي يالله باي برن عليكِ .
• يه نسيت احكي لجيراني رجاءً ارموا الزبالة على قلبي وبحُظني مش على جنبي الله يعينا، دُنيا كنت أتمنى أكون باب حديد أو اباجور على شباك خلينا نشوف العالم من فوق إلا حاوية .