( مثلي الأعلى .. القدوه .. ساخر)


الكاتب : برهان جازي

فلان مثلي الاعلى .. فلان قدوتي . انا بعتبرو قدوه بالنسبه الي .. اكويس ... لهون اكويس ... طيب نوخذ عينات من هالناس خلينا انشوف مين قدوتهم ومثلهم الاعلى .. بسم الله وعلى بركة الله .. لعلنا نستفيد ونتنور ..
بتيجي على واحد بتسألو مين قدوتك بقولك ( أبوي ) .. شو مواصفات ابوك يعني اللي اخذتو قدوه او مثلك الاعلى .. والله ابوي بصلي وبصوم ومحترم ومبدع بمجال عملو .. طيب ما دام ابوك مثلك الاعلى وقدوتك ( لويش ) تركت المدرسه وداير ادخن واتحشش هون وهناك .. ليش بتسكر .. ليش ما بتصلي .. اللي بدو يوخذ واحد قدوه بسعى جاهد انو يقترب من صفاته ويستفيد من نجاحاتو على الاقل يتأثر بأخلاقو يا شيخ .. ولا أنا غلطان يا حج .. مضبوط كلامك بس درجت العاده انو الواحد يعتز بأبوه ومن باب يعني الاحترام مهو لازم احكي انو ابوي قدوتي بعدين بزعل ... مش حلوه اقول فلان قدوتي ومثلي الاعلى وابوي موجود .... والله لو يسمع هذا الحكي والله بطرني من البيت وبغضب علي .. انسى ..(أبوي) يعني أبوي هو حدا قاري ورق .
وانتي يا شاطره من قدوتك او مثلك الاعلى .. أنا .. اه أنتي .. أنا مثلي ألأعلى (أمي ) .. ما شا الله .. ليش طيب .. امي مكافحه .. اطلقت من ابوي وانا عمري اصغير .. وربتنا وتعبت علينا .. وشو سبب الطلاق .. والله مشاكل كانت امي مجننه ابوي وبتردش عليه ومشوفيتو المرين فطلقت .. وهاي قدوتك ..اه .. ومفكري حضرتك تتجوزي .. اه ... وامك قدوتك ؟ ... اه ..انا شخصيا ببشرك بالطلاق بالمستقبل... امنيح هيك .../ حلو كتير .
وواحد بقولك مثلي الاعلى (شكسبير) وهو ( أمي ) .. واحد مثلو الاعلى ( مارادونا ) وهو زلمه (افكح ) بعاني من خلج ولاده .. واحد مثلو الاعلى ابن عمو ( الحداد ) وهو بشتغل دكتور اسنان .. وحده مثلها الاعلى ( فيفي عبدو ) وناويه السنه أتادي ( عمره ) ... وحده مثلها الاعلى وقدوتها جارتها ( المتدينه ) وهي دايره على حل شعرها .. لعاد كيف .. هيك الحياه ماشيه . الشغله مش قناعه .. الشغله (نقا ) .. كل هذا بيعطيني معنى واحد بالنسبه اللي .. هو انو هذول كلهم ( عديمين الشخصيه ) .
ايوه .. هذا مثلو الاعلى ( تامر حسني ) .. بتعرف اتغني؟ .. لأ .. طيب شو عجبك فيه .. بحبو وبحب اغانيه .. بشوفو انسان رائع .. هسه هذا ( الزلمه الخايس ) هو قدوتك .. تامر حسني .. يعدمني اياك انت وياه واللي بشد على ايديكم الجوز .. قال تامر حسني قال .
ايوه .. وانت .. انا قدوتي ( صلاح الدين الايوبي ) .. ممتاز .. بس يا حجي بشوفك بتلعب شده ومتربع تربيع على الارجيله بهالقهوه هاي .. شو اسمها القهوه هاي .. هاي قهوة النصر ... طيب اللي قدوتو صلاح الدين الايوبي يا ( حبيبي ) ما بقعد يلعب شده ويضيع وقتو على الحكي الفاضي .. على الاقل يعني بتتحلى باخلاق هذا الزلمه وبتعمل جاهد انك اتكون مثلو .. ولا انا غلطان .. يا اخي بلاش .. على الاقل احترم الزلمه .. بلاش وانت بتشفط من بربيج الارجيله زي مكنسه الكهربا تذكر زلمه جليل .. ولا انا غلطان برضو .. لا والله يعني بصراحه قريت عنو بالمدرسه واعجبت فيه فلما سألتني ملقيتش غيرو حاضر بذهني فقلتلك هو قدوتي ومثلي الاعلى ..
ولا هو بصراحه انا قدوتي ( أبوي ) ارجعنا لأبوي .. فش الواحد قدامو الا ابو يا امو .. حتى لو كان سكرجي وامو دايره على حل شعرها .. بصير .. كل اشي بصير بهذي الدنيا ..
تعال ... انت تعال .. ايوه .. وين رايح ؟ .. شو خصك ؟ .. بدي اسالك سؤال ؟ .. اللي بدو يسأل ما بقعد ينادي على الواحد هيك .. في ادب .. في احترام .. ولا شايفني سخله قدامك .. يا سيدي اسف بس عشني مستعجل وحبيت اسالك سؤال .. اسأل وخلصني ... انت مين قدوتك او مثلك الاعلى ؟ .. أبوي .. وشو صفات ابوك ؟ .. ابوي متوفي وانا ببطن أمي .. يعني يتيم .. الله يرحمو ..اتعيش ... لو بعرف هيك ما سألتك ... شو بتحكي ؟ .. لا ولا اشي .. بقول الله يخليلك ابوك .
واحد ببلغ من العمر (37) سنه هيك لحالو بقعده قال انا بعتبر ( جوز اختي ) قدوتي .. مثلي الاعلى ... مع انو ( جوز اختو ) ببلغ من العمر 28 سنه .. وكل ما يحكي جوز اختو كلمه بقولو صحيح .. والله انا بستفيد منك .. انت بتعرف اني بعتبرك مثلي الاعلى .. وهذاك بهز براسو وبنفش .. وبيني وبينو قلتلو يا زلمه انت اكبر منو سنا وهذا الزلمه باين عليه يعني ( عظمو طري /خفيف ) لسه بدو اشوي .. قال اسكت .. اللي مصلحه عندو .. بزنس يعني .. افهم .. طيب بيني وبينك مين مثلك الاعلى ؟ .. قلي .. بصوت همس ( نادي برشلونه ) .. شو مثلك الاعلى شايفو ( بالجمله ) .. بدنا واحد امفرق يا محترم .. اه .. مفرق .. مفرق .. اه .. ( كنغ برغر ) .. حسبي الله ونعم الوكيل بس .. بئس القدوه والمقيود ... قوم من جنبي وروح اقعد جنب جوز اختك .
وحده عربيه مسلمه متجوزه وعندها ( عر ولاد ) بتسألها مين مثلك الاعلى بتقولك ( جورج واشنطن ) .. مين هاذ رأفت الهجان ؟ .
طيب .. لهسه اكويس .. هسه بدي احط بصماتي على هذا المقال .. مش هذا مقالي ( بيت انجان .. بطاطا .. زهره .. ) ..
انا بقول والقول للجميع .. اذا الواحد بدو يوخذ واحد او وحده مثلو الاعلى او قدوته يا اخي لازم تتأثر فيه وتتبعوا وتوصل الى ما وصل اليه من الخلق الرفيع ومن العلوم وعلى الاقل في ترابط او عوامل مشتركه على الاقل يعني من باب المعنويه ... و ( بصيرش ) توخذ واحد او وحده قدوه مش مظبوطين او تافهين او هاملين او انت بواد وهو بواد مهما كان .. لأنو بصير تناقض .. بصير الواحد عديم الشخصيه .. أمعه ... ولا انا بحكي صحيح .. لا .. عداك العيب .
ملاحظه : لو واحد سألني انت صرلك ساعه بتنظر علينا طيب حضرتك انت مين قدوتك ؟ .. يا زلمه الجواب معروف .. والله مش عارف ؟.. ولا عارف بس بتتخوث .. يا سيدي انا بدي اريحك .. مهي خربانه خربانه انا مثلي الأعلى هو ( فطوم حيس بيس ) .
والسلام عليكم
Burhan_jazi@yahoo.com



تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات