جراسا -

انا بنت جامعية عمري 24 سنه. وضعنا المادي في البيت جدا صعب والدي مريض لا يعمل.

وأخوي الكبير ما درس و برضه ما بشتغل. كان يشتغل فترة في منجرة وعمل مشاكل مع صاحب العمل وترك.

المشكلة في اخوي مش راضي يخليني اشتغل مع اني احمل شهادة جامعية في هندسة الكمبيوتر عشان ما اختلط في الشباب. بس انا لازم اشتغل لأنه ما في دخل ثابت للبيت ووضعنا المادي متدهور أجار البيت والفواتير متراكمة وما في حدا يساعدنا.

قدمت لوظيفة وقابلت ووافقو على توظيفي. أبوي ما عنده مانع اشتغل بالعكس رحب بالفكرة لأنها ممكن تساعد على تخفيف الوضع الصعب الي بنمر فيه.

بس أخوي رافض تماما وعملي مشاكل في البيت وحاول يتهجم علي ويضربني. هو إلو بالعادة بضربني ما بعمل حساب لا لإمي ولا لأبوي.

هو مش راضي يفهم انه عادي كل البنات بطلعو بشتغلو في اماكن عمل مختلطة. مش ضروري البنت الي بتشتغل في جو عمل فيه اختلاط يكون سلوكها مش محترم او تعمل شي غلط.

أبوي وامي بحكولي روحي داومي وما تعطي اهمية لتصرفات أخوكي. بس انا بخاف من المشاكل مش متخيله شو ردة فعله اذا عرف اني كسرت كلمته وطلعت داومت بالشركة.

احكولي شو اعمل أخوي عصبي ومتسلط وأنا بحاول أتقي شره قد ما بقدر بس لازم اشتغل الشركة محترمة والراتب منيح ممكن يحل شوي من المشاكل والظروف إلي بنمر فيها في البيت؟