جراسا -

انا فتاة عمري 29 عاماً جامعية ومتدينة ومحجبة واعمل وراتبي الحمدلله كتييير منيح 1000 دينار ومعي سيارة, يعني بإختصار فيي كل مواصفات التي يبحث عنها الشباب المحترمين في البنت اللي ممكن تكوني زوجة المستقبل.

بس صراحة انا لحد الان ما اجي نصيبي وصرت حاسة حالي عمري ما رح اتزوج خصوصا انه قليل انه ما ييجوا يخطبوني او حد يسأل عني وازا اجا حده ما بيرجع ليش ما بعرف؟ انا بعرف انه الخيرة فيما اختارها الله وانه ممكن الله يكون مخبيلي اشي احسن لقدام, بس صدقوني كل ما اشوف البنات اللي اقل مني علم واخلاق ودين وجمال بيتزوجوا كتير بنقهر خصوصا انه انا مضغوطة من جميع النواحي يعني ابوي نكدي كتيير ولا يطاق وهو بيكرهني كتيير ما بعرف ليش وما بيعاملني بطريقة منيحة ابدا ولسه بيمد ايده علي لهلأ ومش قادر يستعوب انه انا مش صغيرة وبدون سبب او لاسباب تافهة ! وامي انسانة رائعة من جميع النواحي وهي اغلى ما املك وصراحة دائما بحس انه ازا صرلها اشي مستحيل اقدر اعيش مع ابوي هاد بالاضافة لتفاصيل كتيرة في حياتي صعب تحملها وبالاضافة لاني نفسي اصير ام وخايفة تروح السنين وافقد الامل حيث انني احب الاطفال كثيرا وبشهادة الجميع ممكن اجلس العب مع طفل بالساعات بدون ما احس عشان اشوفه مبسوط واولاد اخواني بيحبوني كتيير وبيفضلوني, وكمان انا كتير زهقت من روتين الشغل من الصبح للمسا بالشغل وما في اي اشي تاني بحياتي من سنوات حتى الاجازات الطويلة ممنوعة بالشغل يعني يومبن تلاته بالكتيير وطبعا مش كافيين للراحة او الخروج من حالة الروتين اللي بعيشها, مؤخراً صار معي اشي بالشغل في رجل تجمعني به علاقة عمل (يملك مستودع للشركة) عمره 53 عاما متدين جدا متزوج وعنده اولاد ووضعه المادي فوق الريح, طلب من احد زملائي الشباب انه يسألني ازا بقبل اتزوجه ام لا؟ طبعا انا على طول جاوبت ب لأ, زميلي حاول يقتعني وسألته هو ليش بدو يتزوج على مرته حرام عليه قلي انه مش مرتاح معها دون اعطاء اي تفاصيل ورد له جواب لكن عرضه بالزواج قائم يعني في اي وقت ممكن اوافق هو مستعد هيك خبرني زميلي, طبعا انا جوابي له كان بناء على انه متزوج وفي حال زواجي منه رح ادخل بمشاكل الها اول ما الها اخر بالاضافة الى انه اهلي خصوصا امي مستحيل يوافقوا على هاد الزواج, بس صراحة انا اخر فترة صرت كتيير افكر انه العمر عم يمشي بدون ما احس وانا نفسي اصير ام ونفسي اغير كل الروتين في حياتي بالاضافة اني اشعر بعدم استقرار بحياتي لخوفي من فقدان امي وهاد الشخص مستعد لكل طلباتي سواء كانت اساسية ام كماليه وبس احكي معه (للشغل طبعاً) بحس انه كتيير مهتم فيي وبيصير يسأل فيي اشياء كتييير في حدود الادب والاخلاق وطبعاً انا سألت اكتر من صاحبة الي رأيهم في الموضوع نصحوني اني اتزوجه بس انا خايفة اكون مخطئة انا وصديقاتي, وكمان انا صرت حاسة حالي طول الوقت عم بفكر بهاد الموضوع (قد ما عندي فراغ عاطفي), قبل كم يوم اتصل فيي هاد الشخص وطلب مني اشتغل معه سألته شو نوع الشغل اخبرني انه في التصدير والشحن وانه كل يوم ساعة بعد الدوام انا اعتذرت عن الموضوع لاني ما بفهم بشغل التصدير واني صعب اروح بعد دوامي لانه دوامي طويل والتوقيت شتوي هلأ والدنيا بتليل بدري واهلي ما بيوافقوا! بعد كم يوم رد اتصل فيي وخبرني انه الشغل في تخصصي ؟؟ (هداك اليوم كان في التصدير والشحنّّ) وانه ما في داعي اجي بعد الدوام (هداك اليوم كان لازم اجي ساعة بعد الدوامّ) وانه بيكفي اجي مرة بالاسبوع اخد الشغل واشتغله بالبيت! صراحة انا كتيير استغربت وصرت افكر كيف قلب الموضوع هيك فجأة وانا صراحة مش شاكه ابدا في نيته لاني بعرف انه شخص مؤدب ومتدين وبشهادة الكل بس انا حاسة انه هو بده يحاول يقنعني بموضوع الزواج منه بطريقة غير مباشرة وصراحة انا بدي اسألكم شو رأيكم بهاد الموضوع موضوع الزواج منه خصوصا مع ظروف حياتي اللي خبرتكم فيها وافتح الموضوع مع اهلي واحاول اقنعهم ولا انسى الموضوع بالاضافة الى موضوع الشغل معه خصوصا انه انا خلال عطلة نهاية الاسبوع رح اشوفه لانه طلب مني اروح اشوف الشغل المطلوب عشان اقرر كم بدي عليه مصاري؟؟