جراسا -

السلام عليكم . أنا متعذبة جدا من تصرف زوجي المهين الي وندمانة أشد الندم على اني وافقت بمهر قليل أو بالأحرى ندمانة اني وافقت عليه من الأصل .

قصتي كالتالي:

أيام ماكنت بالعشرين كان يتقدملي عرسان والحمد لله لكن وقت ماتقدملي زوجي كان وضعه المادي مش بزيادة لكنا حبيناه من أسلوبه الحلو وتعامله الراقي معنا وقررنا انا نوافق عليه وحسينا فيه كونه ماعنده بيت طلبنا مهر قليل وفوق ذلك غرفة النوم كاملة عحساب أهلي بمعنى آخر أهلي اعتبروه كإنه ابنهم وبدهم يزوجوه واحنا طيبتنا زايدة ما كنا بنعرف انه مش كل الناس بتستاهل الطيبة خاصة النسايب الغرباء يلي احنا ما بنعرفهم غير من برا ، لكن بعد ماوقع الفاس بالراس وصار عندي بنت قررت اني أنفصل لاني مش قادرة أستحمل العيشة معه بكفي اني ساكنة مع أهله وفوق هيك على كل مشكلة حتى لو كانت بسيطة متخيلين والله عكل مشكلة انه هو وأهله بصيروا يعايروني انه احمدي ربك انا تدعثرنا فيك ولولانا كان انت هسا بالحضيض ولو كنت ببيت أهلك كان ظليتك معنسة ويكفي انك رخيصة وأهلك زاتينك علينا ودليل ذلك انه مهرك رخيص ....

وييييي والله بسمعوني حكي بلاوي ودايما دايما الا يجيبوا سيرة المهر واني رخيصة ، منشان الله شو أعمل احكولي شو أعمل معهم ؟ هيك جزاء الاحسان؟ يعني فوق ما أنا عايشة معهم بغرفة ومطبخ وتواليت هذا هو كل بيتي هم قسموا بيتهم وأعطونا هالغرفة وفوق هيك غرفة النوم من أهلي يعني هو شو عامللي ؟
نصيحة لكل بنت بدها تخطب انه تفكر 100 مرة قبل ماتوافق وتسأل كل معارفه وجيرانه عنه وعن سمعته هو وأهله وتعاملهم الحقيقي لانها فترة الخطوبة عبارة عن أحلام وأكاذيب بعدين بتنخرطي بالواقع.

شكرا لكل المعلقين سلفا، بس بترجاكم لاتجرحوني لانه يالي فيني مكفيني.