جراسا -

السلام عليكم ورحمة الله وبركاتة انا بنت عمري ٢٧ سنة انعم علي ربنا بنعم كتيرة اهمها الدين والاخلاق وعيلة محافظة وملتزمة ومستوى مادي واجتماعي مرموق بالاضافة انه انا بنت كتير جميلة ولله الحمد عشان هيك حسيت انه الله سبحانه وتعالى اعطاني كل هالنعم لحكمة فقررت انه احافظ عليها واستغلها بالحلال عشان ربنا يديمها علي

فكنت دائما ملتزمة وبخاف من اي اشي بحسه بغضب رب العالمين وبضلني احاسب حالي على كل اشي وبكون حريصة انه امشي على الطريق الصحيح بكل مراحل حياتي والحمدلله ضليتني هيك لحد ما دخلت الجامعة وشفت المجتمع المختلط والناس اللي مش سالين عن اشي هون زاد التزامي وخوفي من رب العالمين من كتر ما كنت اشوف من تهاون.

و لانه ربنا انعم علي بالجمال كان شباب كتير ييجوا بدهم يتعرفوا علي واللي معجب واللي بحب واللي واللي.....لكن انا كنت رافضة اي علاقة مع الشباب خارج حدود الشرع شو ما كان نوعها حتى العلاقة اللي بسموها زمالة كنت رافضيتها وكنت احكي البنت بنت والشب شب وربنا اعطاني نعمة مش بشطارتي .. وزي ما اعطاني إياها بياخدها مني باي لحظة عشان هيك لازم احافظ عليها واحافظ على ترباية اهلي وعلى الثقة اللي اعطوني اياها.


وضليتني هيك الحمدلله بالرغم من جو الفتنة اللي كان يزيد مع كل سنة دراسية حتى صاحباتي كانوا دائما بحكولي ليش ما تحبي وتتعرفي وتصاحبي عادي عيشي .. حياة الجامعة يا بتكون هيك يا بلا وكل وحدة كان عندها علاقة مع شب وتنين وتلاته بحجة ازا ما زبط واحد بزبط التاني وكانوا دائما بحكولي انتي بجمالك بتأشري على اي شب ..لكن انا كنت اشوف هاي العلاقات مقززة وغبية

وضليتني متمسكة بديني وبتربايتي وبمبادئي لحد ما خلصت خمس سنين دراسة والحمدلله على خير
بعدين زي اي بنت ما في قدامي الا استنى الزواج او الشغل وفعلا اتقدم لي عرسان بعد التخريج بس كنت دائما ادور على الخلق والدين وبس احس انه هالشغلة مش موجودة ما اوافق .. لحد ما اجا شب واهلي شافوه مناسب الي وبعد السؤال ماحدا ذمه وفعلا تمت الخطوبة وكتبنا الكتاب .

هون بلشت المشكلة ما كان يعاملني كويس وما كان يزورني ولا يحكي معي ودائما معصب انا حسيت انه مش طبيعي فلما كنت اساله كان يحكيلي هادا انا هيك مع هيك تحملته وحكيت مش مشكلة يمكن عشان جاي على زواج ومسؤولية خصوصا كان يبني بالبيت حتى كنت مراعيه ظروفه وما اطلب منه شي وكنت احن عليه واخفف عنه لما اشوفه تعبان ومش مبسوط وكل هاد عشان رب العالمين وعشان العقد اللي بيني وبينه وكنت دائما ادعي له انه ربنا يساعده.

لكن كنت كل ما احسنله هو يسيء لي وما كنت اعرف ليش؟

المهم بعد سنة من الخطوبة اجا مرة وحكالي انو انا بدي اسافر بشغل لانه الشركة اللي بيشتغل فيها بدهم يبعتوه برة وكان من المفروض نتزوج بعد ما يكمل البيت ..

بعدين حكالي بس ارجع رح نتزوج واتفقنا على هالشي وهو لما سافر زاد الجفا بيني وبينه وما كان يحكي معي الا بالشهر مرة ومع هيك اتحملت واهلي كانوا يحكولي لازم تصبري لانه هادا الصح لحد ما رجع بعد سنة وست شهور اجا وحكالي انتي انسانه بتمناكي اي شب بس انا ما بقدر اكمل معك ولما سالته ليش حكالي انا بحب بنت وحاولت انساها بس ما قدرت وانتي ما الك ذنب تضلي معي على هالحالهة.

هون انا حسيت كانه سكين وانغرست بصدري ..كرامتي ما سمحت لي اناقشه اكتر وتمنيت الارض تنشق وتبلعني.

وفعلا صار الطلاق بكل برودة وكانه اشي عادي بعد 3 سنين هيك وانا متحمليته وصابره عليه اخر شي يتركني وكأن شيئا لم يكن .. ضيع عمري هدم لي احلامي زي اي بنت بتحلم ببيت وأولاد.

3 سنين وانا بخطط لبيتي وأولادي كيف بدي اربيهم واكبرهم وهو رجعني لنقطة البداية بس عشان سبب زي هاد وانا اللي كنت مخبية مشاعري للحلال وبس

صرت اسال حالي معقول انا اذنبت ذنب ربنا عاقبني عليه وانا اللي رفضت كل الحرام عشان الحلال والحلال سكر بوجهي خصوصا بعد ما سمعوا صاحباتي حكولي : شايفه وين طريقك وداكي؟ ولو انك عملتي متلنا كان هلا متزوجة وعندك اولاد وضليتي معندة لحتى وقعتي على راسك وصرتي مطلقة وعانس وبنت بنفس الوقت!!

ما كان عندي رد عليهم ولا كان عندي حجة مناسبة لعقولهم بس حسيت حالي مكسورة مخدوعة بلا قيمة شو عملت حتى يصير معي هيك؟

مش قادرة اتحمل اللي انا فيه حتى صرت لما اشوف الاطفال اصير ابكي وكاني ما بجيب اولاد مش قادرة اتحمل نظرات الشماته من صاحباتي ونظرات الشفقة من الناس اللي بحبوني والله بكتب لكم مشكلتكي وقلبي يبكي قبل عيوني.

انا بعرف انه فيه حكمة ربانية من ورا هالاشي بجوز تبين بعدين وانه اللي اختاره ربنا هو الافضل وانا مش معترضه على هالشي - والحمدلله - على كل حال لكن انا كتبتلكوا مشكلتي بلكي الاقي في كلامكم اشي يخفف عني لانه اللي كتبته غيض من فيض ..

امانة تدعولي بظهر الغيب انه ربنا يصبرني وينسيني ويعوضني خير

اسفة على الاطالة بس والله من كتر تعبي
شكرا لكم مسبقا