جراسا -

انا بنت على قدر من الجمال الحمدالله ومتعلمة وناس اجوا يطلبوني .. بس بالعربي ' مش خارط مشطي الا اتنين '.

حبيت ' احمد ' كتير .. هو انسان بيتصف بكل الصفات الحميدة و بتمتع بالركازة و انسان مثقف وعنده كم هائل من المعلومات و عنده مبادئ واخلاق واكبر مني بست سنين بس ما بيصلي ابدا و ما بده إياني اشتغل بشهادتي وبده البس خمار .. مع انه كل عيلتي بس بتلبس حجاب عادي .

وانا بدي اشتغل بشهادتي و ما بدي البس خمار وابصر شو.. وهو بيعاني من كثرة التفكير في الخيانة وممكن يشك بأي حد ما دام عنده تفكير انه الانسان بيتغير.

و بخاف منه صراحة لانه مشاعره جياشة ما رضيت اقابله الا مرة وفي مكان عام بس ربنا الله انسان في قمة الركازة والتواضع .. وجاهز للزواج ووضعه مرتاح مقارنة مع الناس و رومانسي .. وبحبني كتير وحكيت معه قبل فارس.

اما ' فارس' - ابن عمي - اكبر مني بسنة بيحبني وجاهز للزواج واحلى من احمد بمليون مرة بحس معه بالامان وما بخاف منه يمكن لانه ابن عمي .

بس ما عنده العامل الجوهري يللي جوه احمد من ركازة و ثقافة و مبادئ والقيم المعنوية.

ما عنده مشكلة اشتغل بشهادتي وألبس يللي بدي إياه ...وضعه المادي فوق الريح ومش معقد وما بيفكر بالامور السيئة متل الخيانة والشك.. وبيصلي.

هلأ الاتنين اتقدمولي ... وانا ما بعرف شو لازم اعمل ؟؟

كل واحد فيه شي بحبه و شي ما بحبه.

بعرف انه الانسان مش كامل بس انا جد في حيرة .

احمد سلطان بعيني وملك وانسان مدعوك بالحياة.. قرشه بيطلعه بعرق جبينه اما فارس دلوع البابا كل شي بده إياه بياخده عالبارد المستريح .. وانا بحب الانسان المدعوك يللي قرشه بطلعه بايده.

وأحمد رومانسي بس معقد كتير.

والاتنين بيعشقوني كتير ..بس اكيد انا بدي افكر بعقلانية قبل القلب .

شو بتنصحوني ؟؟