جراسا -

مشكلتي سخيفة جدا بس بتوجع الراس كتير لانها تكررت كتير .

انا خطبت عن حب واهلي وافقو عليه بسرعة بدون اعتراض لانه الشب كويس من كل شي والحمدلله واهلي اجمالا بشكل عام كتير بحبو خطيبي بس من جديد بلشت تصير حساسية بين اهلي وخطيبي .

اهلي مزحهم تقيل جدا وازا الواحد مو متعود عليهم بدايق وخطيبي لسة ما تعود على مزح اهلي وهو بعتبر مزحهم في نوع من الاهانة وعدم الاحترام ، حاولت اوصل لخطيبي فكرة انه اهلي هيك طبعهم وانهم بمزحو معك هيك لانهم تعودو عليك وبعتبروك متل ابنهم بس هو مو مقتنع وبحس فيه اهانة .

تعاتبو مرة وخطيبي فهم اهلي وجهة نظره وانه ما بدو هيك مزح تقيل ادام اخواني الصغار عشان اخواني ما ياخدو عليه ومع الايام ما عاد يحترموه .

اهلي تحسسو من هاد الحكي وما عجبهم كلامه وقلبو معه رسميات زايدة عن اللزوم وخطيبي بلش يحس انه قلبت رسميات وبرضو مش عاجبه انها رسميات وانا معه برضو لانه الموضوع مو مستاهل يقلبو زعل وحساسية ورسميات وهم فعلا مزحهم تقيل .

حتى بلشت احس انه الموضوع بدا يقلب علينا نحا انه بالاول كنت بس اطلب بدي اطلع مع خطيبي عادي ما يعترضو ، بس من بعد القصة طلبت كزا مرة اطلع مو قابلين اهلي وانعزمت عند اهل خطيبي برضو اهلي منعوني اروح !!

ما بدي اغضب اهلي بسبب خطيبي ولا بدي اخسر خطيبي بسبب اهلي شو اعمل ؟