طبعا من اليوم عهد جديد وبداية جديدة وكله جديد بجديد ، ومثل ما كانت جده غير ، ودبي غير ، نتمنى مجلسنا الجديد طخ يكون غير ، مع كل اضافات 2013 والترخيص والتأمين الشامل ، بنزاهته وشفافيته وجماله ، ولأن الشعب عرف ( الفولة ) فما رح يطالب الا في حدود المعقول والممكن ، وهيك اذا النواب حابين يعدلوا ويبدلوا ، من القوانين اللي ( خوزقت الناس ) احنا معهم ، واذا ما بدهم مش مهم ، لكن المهم ما بدنا اياهم يفصلوا للناس خازوق جديد ، لأنه ما له محل .
ومن باب النصيحة لا بد من التذكير بأمور وقع فيها المجلس السابق ، مثل الهوشات المتلفزة ، والخطابات المتعكزة ، والتصويتات المتحيزة ، واللجان المقززة .
واذا بدهم يصوتوا على شيء يا ريت يكونوا صاحيين للي بحكوه او يصوتوا عليه مش ( بياته ) معهم من مبارح ، ما دعاني لهذا القول ، هو عند العودة لما كان يحدث ايام المسخرة الديمقراطية الاردنية ، نجد ان بعض النواب كان يصوتوا وهم( خارج التغطية ) .... نعسان ...عيونه مثل الجمر .... يضحك بسبب وبدون سبب ... ولما يرفع ايده تحس انها وقعت منه من كثر التعب ( واللي بالي بالك ) وكثيرا ما شاهدنا التصويت والايدي ترتفع مع وجود ( سيجارة او سيجار ) طيب مين يقتنع ان هذه السجائر ما كانت ( ملغومة بالمار جوانا ) مع الاخذ بعين الاعتبار ان ( تعاطي الكحول تحت القبة ممنوع ) اما التدخين فمسموح ، ولا تقول انك ما لاحظت ان البعض كان يتناول كأس الماء من امام جاره النائب ( ويديرها براسه ) على بياض ، كمان شو بعرفنا ما تكون نوع مشروب لونه مثل المية ويحطوه ( بكاسات من بوفيه المجلس ) بس الغريب انهم يشربوا بدون ( كسرة ) وما يسكروا او ان حالهم بالسكر وعدمه هو نفس الحال . اللي مش قادر افهمه ليش اصحاب بعض اصحاب السعادة والمعالي ( يسكروا او يحششوا ) مع انه الله اعطاهم اكثر من اللي يتمنوه ، يا عمي خلوا هيك سواليف لمتاعيس الحياه اللي الدنيا تخبطه من هون وانتوا من هون ، يعني هذول لو ضل الواحد سكران وداير بالشارع ، ما عليه لوم الرجل بده ينسى ومش قادر ، اما انتوا شوا بكوا تنسوه ، وكل شي بالحياة ( زبطتوه ) على قدكوا ، وانا هنا ليس لتحليل ما حرم الله وانما فقط من باب اتقوا الله واشكروه على نعمته والا انتوا مش حاسبين انه فيه موت بأي لحظة .......
ارجوكم ايها المجلس الجديد , بدون شرب كثير الا مع وجود المزات ، لأنا خايفين على صحتكوا النيابية ، واذا تعذر وجود المّازة ، فمش غلط لو الواحد حط بجيبته ، قطعة جميد او شوية ترمس او حتى لبنه ، حتى تكون القرارات اللي رح تصوتوا عليها يعني فيها منطقية مع المشروب الغربي والمّازة الشرقية .
بدكوا توخذوا بالكوا ( الحكي موجهه ) للنواب الجداد ، انه فيه بعض النواب رجعوا ورح يعملوا تعديل على نوعية الحياه الخاصة تحت القبة ( يعني المشروب وخلافه)


فيصل البقور