الى غير رجعة , الله لا يعيدها , مش معقولة مثل هيك سنة فعلا كانت وحش على شكل ايام , اكل منا الاخضر واليابس , و طول السنة حاطين ادينا على قلوبنا , ومن لما الشمس تطلع لحد ما تغيب واحنا نستنى بخبر.... شي مش عارفينه , مارسنا كل انواع القروض من البنوك ومن الاصحاب والاحباب , والهدف كان فقط ( الستر ) لآخر السنة , ومع ذلك انفضحنا بحسن اعمالنا , مارسنا كل الصلوات ( مع وضؤ او بدونه ) وكل واحد فينا يتمتم طول الوقت , سواء كان مع نفسه او مع الناس , حتى ان كثير منا شك انه يعاني من مرض ما , لأنا شغالين تمتمه وننظر الى السماء ...... لكن مرة هالسنة وقعنا على وجوهنا , سواء من مطبات الشوارع او من مطبات الدنيا او من مطبات الحكومات , ومش بس هيك ما خلينا طريقة الا ومشينا فيها مشان الحكومات تسمع انّاتنا .
صراخ وصرخنا , مسيرات وحفيت اقدامنا , اعتصامات وقفنا لما صار مع الكل ( ديسك بالفقرات ) مرة نخفض سقف المطالب ومرة نرفع السقف ( لما سقف حلقنا وقع على اللسان ) .
وكشعب عالي الهمة ومحظوظ , عشنا مع كل انواع الحكومية سواء ( المترددة , او البطيئة , او السريعة واخيرا الجريئة ) , وكحمّال الاسية مرر الشعب كل القرارات والممارسات , وعاش سنة من اربع فصول مع اربع حكومات موزعة على كل فصل , لكن حتى الفصول كانت عكس رغبة البشر فشتاء بلا مطر وربيع بلا زهر وخريف بلا ثمر وصيف كله حر .
المفروض في نهاية كل عام , يكون هنالك عملية جرد ومحاسبة لكل ما جرى خلال العام , والحمد لله نما الاقتصاد الاردني , وتم القضاء على جيوب الفقر , وبات الناس مش بحاجة للمصاري كون المونة معبية المطبخ , اما الفساد والمفسدين فكلهم عند خالتهم يقضوا فترة الشتوية , ومش عارف الحكومات اللي رح تجي بالعام الجديد شو رح تزيد للمواطن .
نفط وبترول صار عندنا الحمد لله مسطحات مكشوفة في المنطقة الشرقية , وبطلنا نروح على الكازيات , وبدل المضخة نستعمل اليوم ( الدلو للغرف ) عن جنب الطريق , وكل مواطن تم تأمينه ببيت ومزرعة وخدم وحشم , ولقد تم الاستغناء عن فكرة البيع والشراء وصرنا نتعامل مع الدول عن طريق المقايضة . نعطيهم تنكة نفط طازه ويعطونا محلها ( كورن فليكس ) كون حريمنا لسا ما اخذن دورة في صنعه اما الحلو فكمان القوالب صارت غير وبدل ما نعمل قوالب صرنا ( نوكل قوالب ومقالب ) كل يوم .
شو احكي لك كمان , ولأن كل الاردنيين تعبوا طول حياتهم فلا بد ان يستريحوا بالآخر , عشان هيك رح يزودوا البلد بكل الجنسيات للعمل تحت امرة الاردني , وذلك لكونا مش عارفين كيف نقدر نستهلك كل المواد الغذائية والماء وكل الخيرات الموجودة , فحرام تنكب , خلي حزانى الدول تشاركنا النعمة .
بأختصار وصلنا للأكتفاء الذاتي حتى احيانا نرسل المواد الغذائية للبحر عشان السمك يعيش , اكون اكثر صراحة وصلنا للبطر ذاته , ورايحين نعمل برنامج عشائري , عشان الناس تروح رحلات للقمر , يعني كل فترة تروح عشيرة ما , وبعد ما تخلص العشائر نحول البرنامج لكل مدينة او قرية , و عن قريب رح يكون الشعب الاردني راح للقمر بعد ما لف الدنيا كلها مشان يعيش وينستر ومع ذلك انفضح وسقطت ورقة التوت لا بل سقطت كل اوراق التوت بعد الشجرة ما وقعت كلها .

واخيرا
اللهم استرنا بالعام الجديد ولا تشمت فينا نائب او وزير لا اقل من ذلك ولا اكثر وتمنن علينا يا كريم بما انت اهله لا بما نحن اهله .