الكره الارضيه تدور بفراغ .. هو احنا فعليا مثل فقاعه تسبح بالسماء . طايره .. هو فعليا وعلى ارض الواقع اقدامنا وان كانت مثبته بشيء صلب وهو ارضيه الارض من تراب وصخر .. لكن فعليا التراب والصخر والشيء الصلب الذي نرتكز عليه هو اصلا مرتكز على فراغ .. على فضاء منتشر .. معلق بالهواء .. هذه النظريه انا استنتجتها من جديد . وتضاف الى مجموعة نظرياتي السابقه المتعلقه بالارض والكون والمجموعات الشمسيه والمجرات .
بسم الله .. لنبدأ بتحليل رؤيه النجوم بعز الظهر .. اذا تجاوزنا نور الشمس بلا شك سترى النجوم .. لكن بوجود الشمس هل تستطيع رؤيه النجوم والكواكب الاخرى ؟ .. نعم تستطيع ... كيف ؟ .. انا بقولكم ..
لو احضرت شمعه واشعلتها بوسط الظلام .. ماذا ترى ؟ .. سترى الاشياء من حولك بلا شك ؟ .. طيب اذا طفيتها بتشوف اشي ؟ .. بالتاكيد لا .. نستنتج من هذه التجربه .. ان الضوء المنتشر بالمكان تستطيع من خلاله ادراك الزمن .
التجربه السابقه على العكس تماما ما يحصل بين العلاقه القائمه بين الشمس والنجوم .. النجوم كونها مشعه وضاويه ستراها بالظلام .. اما اذا كانت الشمس ظاهره لا تستطيع رؤيه النجوم لان نور الشمس سيطغي على نور النجوم فلا تظهر .. هذه ليست نظريه هذه درس اخذتوه وانا بالصف السادس ابتدائي ايام ما كنت صغير .. كبر جسمي وظل عقلي صغير .. ( هيك الي استنتجتو من الاشياء اللي قاعد بحكي فيها هسه ) .
سيبوكوا مني .. خلينا نرجع لعلم الكون والفلك .. هسه نيجي على موضوع اخر وهو اكثر حساسيه .. اكتشف العلماء حديثا ان الهواء يتكون من ذرات بعرفش شو هي يمكن نيتروجين واكسجين والتي تشكل بدورها عند اصطدامها بالغلاف الجوي للارض ( النيترونات والبروتونات ) انا شخصيا كونو قدراتي محدوده ما بشوفش الاشياء هاي .. هم بشوفوها وعاملينها شغلتهم .. هذول عندهم مواد وادوات ومجاهر ومختبرات وابصر شو .. هم بشتغلوا 500 سنه على هاي الاشياء وانا بوخذها جاهزه من قناة ( جيوغرافيك انترناشونا الوثائقيه ) .. وبقعد زي الهبيله قدام التلفزيون بتابع اخبارهم وقصصهم واكتشافاتهم و(حد الله) اذا بكون فاهم اشي .. بس من باب الفضول بدفعني اشوف هذول العلماء شو اكتشفوا بالفضاء من مجرات ونجوم وحراكاتهم واكتشافات جديده .. بس يا عمي صرت اطلع بنظريات وانا قاعد .. لاني بصير احلل وافسر معهم .. حتى في وقت من الاوقات بشرك اهل بيتي بالتحليل ولأيش اتوصلت من نظريات وببلش اربط الامور ببعضها من بعدها .. انا ما بنكر اني بتعرض للاستهزاء والتجاهل وعدم الاهتمام وبرددوا علي مقولة ( قوم شوفلك شغله تستفيد ونستفيد منها احسلك من هاي الخرابيط ) وحل عنا يا اخي ربنا خلق الكون وهو ادرى فيه وليش شاغل بالك بهالمواضيع هاي .. بنقولهم يا جماعه العلماء قاعدين بشتغلوا على هيك منذ مئات السنين وانتو بتستهتروا فيهم وبعلومهم والله كثير هيك.. بكون جوابهم هذول فاضيين اشغال والله ما في وراهم شغل ..سيبنا منهم ومنك .. حطلنا على قناة ( كوميدي فرفش ) احسللنا من المهاترات هاي ) .
انا هذا الكلام لا (يقعسني) ( يسقعني ) (يعقسني ) ما بعرف هذه مأخوذه من كلمه ( تقاعس ) صيغها بمعرفتك .. عن اطلاق عقلي وتحرره باكتشاف المجهول .
انا حقيقة اطلعت بشوية نظريات عن الكون والارض وما يحصل عليها .. وهناك امور تجذبني مثل الجاذبيه الارضيه التي تجذب الاشياء باتجاهها .. بقولك الكواكب فوق .. فوق بالسما يعني .. ركز معي .. مش عند خزانات المي فوق .. فوق بقولك يعني فوق فوق .. وهاي كمان فوق .. الكواكب تجذب بعضها ايضا فتدور حول بعضها .. طيب بما ان الجاذبيه موجوده على الارض نفسها وبين الكواكب تحت .. فوق . تحت . والله خربطت .. المهم .. بما ان الكواكب تجذب بعضها .. السؤال الكبير الذي يطرح نفسه بقوه خارقه لماذا لا تجذب المجرات بعضها البعض وادور حولين بعضها ؟ .. ولو حصل هذا الشيء احنا وين بنصفي ؟ .. وين بنروح ؟ .. ممكن احنا انصير بعالم ثاني .. انو عالم يابا .. ما راح تفرق كثير لانو راح انظل ضمن الفراغ والفضاء اندور واندور الى ما شاء الله .
تركنا كل اشي بين ايدينا على الارض وبلشنا نحكي عن الفضاء .. مهو بصارحه ما ظل للواحد من منفس من هالاوضاع اللي قاعد بتصير الا انو يترك الارض ومشاكلها ويوخذ نزهه وفسحه الى عالم خارج نطاق الارض .. والله الواحد قرف هالعيشه اللي بنعيشها ومنغصاتها .. اطلق لعقلك العنان واسبح بالفضاء وفكر فيه بترتاح نفسيتك اشوي ومن سولافه خذني اجيتك .. من سولافه اجار البيت من سولافه الانتخابات .. من التنظيرات من وجع الراس .. من روح عبي مي .. خلصت جرة الغاز .. نزل الراتب .. طلع الراتب . الولد ببكي .. ام العيال بدها تلد .. شو طابخين اليوم .. ربيع عربي .. تفجيرات .. هجوم .. دفاع . سياسه ... اقتصاد .. شلفت الطرمبه ... غيار زيت ... ناولني الريموت .. يلعن هيك روتين قرف الواحد عيشتو ...
يا ريت الاقي نجم بالسما فوق فوق .. رجعنا انقول فوق .. اقعد عليه وانصب خيمه مع كوز مي وحصيره واقعد اتفرج على الكواكب الثانيه وانا بوعدكم اني اشيح وجهي عن الارض .. كرهتها .. قرفتها .. فش عنا الا نفس القصص .. ونفس المواضيع .. ونفس الروتين .. اخ .. اخ بس .. على كوكب ثاني اعيش فيه .. وهذا مستحيل ..
بقولو اللي بموت بتطلع روحو للسما .. انشا الله .. بركي على الله اتنفسنا الحياه بعد الموت .
معقول في ناس ثانيه عايشه بكواكب ثانيه ؟ .. واذا فيه .. في عندهم جرار غاز وربيع عربي وانتخابات وطلاق وزواج والولد مريض وجيب معاك فلفل اسمر وانت مروح ؟ .. يا حبيبي .. والله اذا في عندهم من هاي السواليف فعلا الكون تعيس .. اين نجد الفرح .. اين نجد السعاده .. اين نجد راحة البال ؟
اقوم اصلي الظهر احسلي . اجد فيها الاطئنان والراحه .. الدنيا راحه .. وخلي الارض معلقه بالهوا وبالفراغ .. بفكر الواحد واقف على اشي ثابت .. اذا الارض والكواكب نفسها مش واقفه على اشي ثابت .. الكل بدور بفراغ .. فراغ بفراغ .. والله سبحانه وتعالى هو بالنهايه وارث السموات والارض .
والسلام عليكم
Burhan_jazi@yahoo.com