اليوم رح يبدأ عام دراسي جديد , عشان هيك حبيت تكون اول حصة لغة عربية ( نحو وصرف ) , وحصتنا رح تكون عن كلمة واحدة وهي ( فساد ) , رايحين نشقشق ونشتق هالكلمة ومدلولاتها , وبعض الكلام عن كيفية الفسفدة اللي قعدتنا على ابصر شو اسمه .
فس او فسّ : هما اول حرفين من الكلمة , وهنا تأتي كأن يقال فست الكرة او فسّت ,( يعني ما فيها هوا ) , علما انّا اكلنا هوا لما انفلقنا , حتى اطلق على الشعب الاردني ( الشعب المفسوس) اي الشعب الفاضي .
سف او سّف : - عكس الحرفين السابقين – بمعنى لهط الشيء او اخذ ما ليس له و زوبع .
فسا او فسّا : وهي حالة تصيب اصحاب الكروش نتيجة للتخمة والافراط بحشو البطون , وتستعمل في دورات مياه التاريخ والصرف الصحي الرسمي .
ساد : اي عم وانتشر , وتأتي بمعنى الزعامة ( ساد القوم ) طبه وغصب عن الراضي والزعلان , يعني جوزك وان راد الله ( مثل النواب اللذين اشتهروا برمي الصرامي على بعض) .
دس : دس الشيء بطريقة ملتوية ومخفية , كأن تقوم احداهن بوضع ملفات و اوراق مخالفة مع اوراق صحيحة , وتقدمها لصاحب الشان , واكيد رح تكون مبرطه شعرها , محمرة ومغندرة , وشعرها مدلّى على البريد مع وجود ( عطر الخنفري ) , عندها صاحبنا رح يوقع على الاوراق كلها الصحيحة وغيرها لأنه بلشان يشم ,ويطّلع على اصابع واظافر سكرتيرته .
سد : ما ترك وراه اي اثر حتى ما حدا يكشف ( فسفوداته ) . واغلق الباب وراه.
داس : حط الكل تحت رجليه ودعس عليهم .
اس : اس الشيء اصله ومصدره , ولا تعد وراي كم من مصادرنا اسى عليها الزمن , علما ان جودة اسنا اكثر من كل اسّات جيرانا .
دف : الة موسيقية غير وترية تستعمل من جماعات الفساودة , بعد الانتهاء من كل فسفودة على ظهر الشعب المفسوس .
اسد : حيوان يعيش بالغابة اشبه ما يكون بالحوت في البحر , ولازم تعد وراي كم فيه حوت في بلدنا , رغم قلة الميه ,وكيف عايشه هالحيتان انا مش عارف .
دفس او دفسّ : كأن يقال دفس الشوال يعني حط فيه اكثر من سعته , وحشاه حشيا , والكل بيعرف كيف تم دفس ملياراتنا بالبنوك اللي في دول جوا . والدافس هو من يقوم بعمليه الحشي او الدفس .
فسد : فسد البيض اي عفن وطلعت ريحته .
فساد : كلمة خبيثة , تؤدي الى دمار وخراب البيوت واصحابها .
فسّاد : خبّاص او من ينقل الكلام ويغير فيه لأيقاع الفتنة بين الناس , وهذا ما يفسر الخلافات ما بين الزعامات على كيفية تقسيم التركة ( مثلا ) .
فاس : اداة يستعملها المزارع او الفلاح للنقر حول رؤوس البصل والفجل والبطاطا .
وكل فاس وانتم بألف خير...........