الحمدلله .. الحكومة ريحتني


تميز .......ابداع ....ابتكار ....هذا مايميز حكوماتنا المتتالية
مفلوق لاتوكل
وصامد لاتفلق
وكووووول........ تـــــــــــــــــــــــاتشبع
فرحت كثيراً عندما صدر القرار الحكومي بالبديء بتقديم طلبات شطب السيارات القديمة والتي يزيد عمرها عن عشر سنوات , بسيارات حديثة , فبدأت أضرب اخماس بأسداس وقلت (بقلبي) خلص ياولد رح تغير سيارتك الأوبل المكركعة وتركب هـــــــــــــاي بيرد من الآخر
خلص يابو العبد مش راح تغلب اولادك يدزوا السيارة , ولا تحط حجار تحت لعجال عشان ماتدحل السيارة.
مبرووووك يابو العبد , رح تشيل مروحة السقف اللي مركبها لسيارتك لأنو مافيها مكيف , ورح تبطل توقف كل شوي مشان تمسح (القزاز الامامي) لانو ماتور المساحات خربان وبطلت الشركة تنتج نفس الموديل......من قبل عشرين سنة
ابو العبد غني بعبك...رح تبطل تسوق سيارات تجميع وترقيع...وعمره مارح يسكر الباب عليك وتنحبس مرة جوا السيارة ومرا برا والعالم يلتموا عليك تايطلعوك من الشباك ...
ابو العبــــــــــــــــــــــد الف مليون ترليون مبروووووك...رح تبطل تزور كل مكانيكية البلد وكهربجيتها , ورح تبطل تدور على مييييت واسطة تاتزبط الشرطي حتى يرضى يرخصلك السيارة , وغير هيك رح تبطل دقات قلبك تطير لما تمر من قدام دورية شرطة , لانك راكب سيارة حديثة , ومارح يقدر يخترعلك ولاعيب مشان يخلص الدفتر اللي اعطو اياه الجماعة ,
ابو العبد , احكيلك ...انت رضي والدين ..يازلمة انت ربنا بحبك ....شفت ياحرام زميلك استاذ ( .............) اللي ضل مدبق بسيارته وصار عمرها اكبر من عمره .على امل مايفرط فيها وكان يستنى تصدر الحكومة قرار استبدال وشطب القديم , وبعد خمسة وثلاثين سنة من خدمتها باعها ,,,لأنو فقد الأمل !!!!!
شايف ....شايف يابو العبد مالو نصيب....ماصبر عرزقو.....ياسيدي الله يهنيك ...هسا رح كووووول الناس تتمنى تركب معك بسيارتك الهـــــــــــــــــــــــــاي بيرد ...مش يتركوك لحالك ويطلعو بالفاردة ...او يتعززوا ويحكولك خلص بنمشي مشي , اه ياعمي مهو بخافو تقطعهم بالطريق ويبلشو يدزوا ....
عكل حال يلا ابو العبد , دق الحديد وهو حامي ..........وقلت لحالي : خليني احكي مع صاحب مكتب هالسيارات وأنا رافع (خشومي) اكيد هسا ميييت تايشتري سيارتي لأنها قدييييمة ورح يكسب من ورا شطبها
أنا : ألو ..كيفك يابو محمد ؟
اهلين ابو العبد ....بدك تعذرني يابو العبد مالقيت حدا يشتري سيارتك ونا حكيتلك لاتضل ترن علي ...بس الاقي حدا بدو يوجع راسو ويشتريها ...أنا برن عليك
أنا : شو اللي ابيعها يارجل ...؟؟؟ انت ماسمعت بالقرار الجديد تاع شطب السيارات القديمة والسماح باستبدالها بحديثة
ابو محمد : يارجل هاي الحكومات مابطلع منها خير ...كل هالقرار مشان مسؤوول كبير عندو اكم سيارة بدو يمرقهن عشان يربحلو فيهن قرشين يعني زي لما بدهم يستحدثوا دائرة أو ينقلوا مجمع بحطوه عند أرض واحد من المسؤولين.....بعدين حضرتك بدك تبدل سيارتك ؟ مهو كل الخصم (12.5) بالمية بس , ولا انت بتفكر شطب وتبديل ببلاش ؟؟؟؟
أنا : يعني شو قصدك؟؟
يعني منهو من أصحاب السيارات المكركعة معاه (12) الف تايشتري سيارة هاي بيرد ؟؟؟
أنا : هاه؟؟؟
وسلامت فهمك
أنا : ياسيدي الحمدلله الحكومة ريحتنا من التفكير بنوع السيارة اللي بدي اشتريها ...عكل حال اجاك حدا يشتري سيارتي؟؟
تووووت تووووت .....تووووت
أنا : الو ابو محمد .....توووت...توووت...توووت..ألو؟؟
عفواً إن الهاتف المتنقل المطلوب ...مستحيل يرد عليك...لأنك عجزتو ومالقى حدا يشتري سيارتك ...تووت ...توووت
ألوو..ألوو...ألوووووو



تعليقات القراء

طبوش
مهو الحافظ واللي بعده الطراونه بيفكروا كل العالم زيهم معهم الآف بالبنوك ، ما الواحد تلاقيه تمرمط مية مره تانه دخل بجمعية ووفى القرض واشترى كووووورررررييييييييي. وماله الكوري.
09-07-2012 08:46 AM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات