حادث سير .. ساخر


سألت عن صديق لي .. جاءني الخبر انو صاحبك مدعوس ونايم بالمستشفى .. اتضايقت وتأسفت كثير .. وعند السؤال عن كيفيه وقوع الحادث وخاصة انو هذا الشب صاحبي بعرفوا حريص وحذر بقطع الشارع .. يعني كنت اشوفو قبل ما يقطع الشارع كانت السيارات تطلع يمين وشمال قبل ما يدعسوا .. وعند اشاره قف كل السيارات اتكون ماشيه الا هو واقف تحت ( قارمة قف ) ..
قلي ناقل الخبر لا والله صاحبك انعس وهو ( نايم ) ببيتو وعلى فرشتو كمان .. فكرت الزلمه بمزح معي .. كيف واحد بندعس هو نايم بغرفة نومو .. شغله ما بتدخل المخ ...
- زي ما بقولك .. هذا اللي صار
- قول وغير .. هههه .. يا زلمه الزلمه نايم بالمستشفى وانت بتتمسخر عليه حرام عليك .. والله قلي كيف اندعس او صار الحادث .
- والله العظيم زي ما بقولك .
- لا حول ولا قوة الا بالله العظيم .. يا سيدي امنا .. ماشي .. لاحق العيار على باب الدار .. كيف اندعس هو نايم طيب .
- هذا الزلمه انت بتعرف بيتو .. ساكن بالطابق الارضي .. وقدام بيتو شارع رئيسي .
- مظبوط.
- هور ( بكب ديانا ) وهو نازل الشارع الرئيسي وراح داخل بحيط بيت الزلمه .
- ايوه .
- وهذا الحيط كان احد حيطان غرفة نومو.
- يا ساتر استر. .. ايوه .
- ربك حميد انهدت كمن طوبه على جنب .. بس بوز البكب والعجال الاماميه صارت جوا الغرفه ووصلت لعند فرشتو وهو نايم وطلعت على رجلو اليمين .
- ههههههههه ... وي وي وي وي .. اغليها .. وخفف سكر .. جاييك ..يا حبيبي .. هذا الشغل المظبوط .. هذا الحكي اللي بطعمي خبز .. يعني الزلمه وهو نايم ببيتو وعلى فرشتو اندعس .. يا زلمه هاي بشوفها بمجلات ( بلاي بوي ) .. معقول لهالدرجه .
- مهو هذا المستغرب .. بتجيك المصايب لعندك حتى وانت نايم بحالك ببالك.
- يا زلمه هذا الزلمه مسخم .. معثر .. الله اكبر .. والله اشي بضحك... وهسه كيف وضعوا .
- نايم بالمستشفى مكسوره رجلو .. اللي اعرفتوا من اخو انو اليوم بطلع .
- والله بدو زياره ...

وبعد اجراء اتصالات هاتفيه متعدده رد علي بالتلفون ... هنيتو بسلامتو واخذت منو موعد للزياره ...
- حمد الله عالسلامه .
- الله يسلمك .
- ههههههه .. شو مالك يا زلمه .. والله شغلتك مش بضحك بس كمان مستغربه .. اندعست يا مشحر وانت ببيتك .. لاحقينك لهون .
- شوف عينك .. كنت نايم .. وما سمعت الا صوت خبط وانفجار اتقول قنبله .. فكرت حالي بحلم .. لكن القصه طلعت جد .. وما فتحت عيني الا وقدامي بوز بكب يا زلمه .. والشوفير بكامل هيئتو نزل لعندي بالغرف .. يا زلمه بغرفة نومي دخل .. امنيح اللي كانت المره ( حردانه ) ولا وقع المحظور وانكشفنا وانفضحنا وبانت ( سوئتنا ) .. بس ؤبك ستر وكنت لحالي .ز الادهى والامر نزل الشفير من البكب وهو مطبوش نزل يطن علي واول كلمه قالها اللي ( طمني عنك .. صار فيك اشي .. قلتلو يا حج بس قيك العجل عن رجلي بالاول بعدين بنحكي .. وانا على صراخ منالوجع والالم .. وبالعافيه الشوفير واحاب الخير وولاد الجيران والحاره كلها والمسعفيين خلصو رجلي من تحت البكب ... وصارت غرفة نومي شوربا .. شفت واحد وهم بحملوا في قاعد على ( التواليت ) بدخن وبتفقد (مكياجات المره ) وبرش عطر ..
- يا زلمه لتكون بتحلم .. او كنت تحلم .
- وهذا اللي قدامك من شو ؟ .. من لعبة فطبل يعني ..مع اني فكرت هيك بالاول .. بس لما شفت ( الكروكا ).. ورجلي المكسوره .. قلت يا ولد الشغله علم مش حلم.
- مهو الحق عليك بصراحه .
- شووووووووووو.
- يا زلمة حد بنام بغرفة نومو ؟
- لعاد وين انام .
- يا زلمه .. مش عندك ( سده ).. نام فيها .. او نام عند واحد من قرايبك .. او نام بالشارع ما فرقت كثير انا هيك شايف ..
- وهذا اللي راح يصير .. ايدي وايدك خننقل الفرشه بنص الشارع .. لا تنام بين القبور ولا تحلم احلام مزعجه .
ملاحظه : بصير يا اخوان الواحد يقدم طلب للجهات المعنيه ( بعمل مطب ) جوا غرف النوم ؟ .
اذا الجواب بنعم .. صوتولي على الارقام الظاهره اسفل الشاشه.
والسلام عليكم
---(هذه قصه حقيقيه) ----
Burhan_jazi@yahoo.com



تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات