الرجل الألي


قرأت كثيرا وسمعت وشاهدت مدى اهتمام العالم بصناعة وتطوير ( الرجل الألي ) ليقوم بمهام عده تشبه الى حد كبير بمكوناته وشكله وافكاره طريقة عمل الانسان .... نحن مع الابداع والفكر والتألق والتفنن بالاختراعات وتسخير العلم لخدمة الانسان .. لكن السؤال .. شو بدهم بهذا الرجل الالي .. غلبه على الفاضي .. ومكلف .. ما يجيبوا موظف محلوا او عامل انسان بني ادم مش احسن وما بكلفش اشي .. يعني الراتب اللي بدك تعطي اياه للموظف الانسان لا يساوي شيء مقارنة مع ثمن الرجل الالي اولا بالاضافة الى تكلفة وتعب اجراء صيانه عليه من ( تشحيم وتزييت ) وشد براغي .. وفلتت سمونه .. وانقطع سلك .. وتغيير ( جعمكه ) وعمل له (امبلنص) اذا سوكج .. واذا خربطت برمجتو ايقوم يسب ويغلط وتعال قطبها وارجع نزل سوفت وير عليه جديد وعايرو .
بس انا بشوف ما بعرف يمكن نظرة الاجانب لاستخدام رجل الي حسب نظرهم هم انا بحكي الاجانب انو الرجل الالي استخدامو ولو كان مكلف لكن على المدى البعيد ثمنه يعادل اجور رواتب يمكن ثلاث موظفين هذا اولا بالاضافه الى قدرته على القيام بالاعمال بأتقان بدون تذمر او (جك حكي ) او يعيفك حالك بالبلاده والاستغابه والنميمه والتهرب من الاعمال والتململ ...
فهو لا يأخذ اجازات .. وما بنطلك كل اشوي بدي مغادره او اجازه .. ابني مريض .. مرتي بدي اوديها عند دار اهلها ... بدي اروح ادفع فاتورة مي ولا كهربا .. بدي ارخص السياره .. بطني بجعني .. ممغوص .. معي اسهال ..معي امساك ... بدي زيادة راتب .. على الاقل ما ( بضربش ولا بعتصم ) .. وين فلان راح يتوضا ( بغيب ساعه ) .. وين فلان راح يصلي ( بغيب ساعتين ) اتقول رايح يحج ولا يأدي عمره .. والعمل متراكم .. وما بتحجج علىالطالعه والنازله بأشياء ما الها طعم .. رايح اوصي على قهوه .. بروح ما برجع .. او ما بستخدم سخانات كهربا لعمل قهوه او شاي داخل المؤسسه .. ما ببرد .. ما بشوب .. لا بدو مروحه ولا صوبا .. ما بتترجا رجاوي عشان يناولك ورقه .. او يجبلك ملف .. ما بدب كلمه قدام زائر عندك فيها ثقاله دم او احراج ...
الرجل الالي ..بكبسة زر بتقعدوا .. بكبسة زر بتقوموا .. اذا بعصبك ( بتشفوا )كف على صباحو الالكتروني ما بنطق كلمه .. بس بضوي ..ما بردلك الكف كفين ... بتسب عليه وبتعصب عليه بظل محترم .. ما بهدد .. ما برفع ايدوا .. ما بعرط.. ما بخرط .. ما بسطلك بريحة دخانو ورجليه.. ما بعوفك حالك من قصصو المعته على حساب صحتك ومزاجك ووقت العمل .. ما بشتري اصوات في الانتخابات .. ما بظل ليل ونهار يغني على ( الربابه ) مصطلح الحوار .. زلمه على قد ايدك ... على الاقل مش بظلوا ( سري مري ) على الحمام .. رجل الي محترم .. ملتزم .. صادق .. بحكي بهدوء تعال بيجي .. روح بروح .. زلمه بطيع اوامر وبس ..كل راس مالو حط هالفيش بالكهربا واشحنوا ساعه وبعدها احرث عليه سنه .. او عبيه تنكة ديزل وانسى امرو .. مع علبة زيت واشوية شحمه بصير ينط قدامك زي الغزال على .. اامرني .. اش بدك بس.
الرجل الالي بالنسبة للاجانب حقيقة ما راحوا يستفيدوا منو مثل العرب .. بالنسبة للعرب لو جبنا كمن رجل الي يا باي شو راح نحرث عليه بجميع اوجه استخداماتو .. بالعمل .. بالبيت ... احنا راح انوفر على حالنا اشياء وامور كثيره ... بس حسب توقعي راح هذا الزلمه ( الرجل الالي ) .. انا بقول عنو زلمه على اعتبار انو ( ذكر ) ما بعرف اذا عاملين الاجانب منو نسخه ( انثى ) .. يعني رجل الي او امرأه اليه .. على فكره ليش دايما بطلقوا عليه لفظ رجل الي مش امرأه او بنت او صبيه او فتاه اليه .. نترك هذا السؤال اما لبياعين الخرده .. او لجماعة حماية الاسره وتحديد وتنظيم النسل ..
اذا صدف وانتشر الرجل الالي بالعالم ورخص ثمنو مثلا واستوردناه احنا العرب .. انا بتوقع انو يطفش ويشرت من ثاني يوم .. راح نركب على ظهروا ونعملوا سياره .. راح نستخدموا يشطف للولاد ويلبسهم فوط .. وراح دايما يزمر على اللون الاحمر بحالات كثيره منها .. اذا طلبت منو يعمل ( مجدره ) مهو ست البيت ما راح يرتاح بالها الا اذا حرثت عليه حراثه وبمفهومها انو هذا الزلمه الرجل الالي بعمل كل اشي .. حتى مخلل لفت وزهره ومكدوس .. اقراص عجه .. اصابع زينب .. وراح اتخليه يكبس زيتون .. ويحشي كوسا .. ويعمل ( حجب ) حتى .ويعمل ( حجامه ) كمان ... ومش بعيده تطلب منو ينقللها اخبار الجارات الحارات والاهل اي اخبار ( داسوس ) يعني...
اما الرجل صاحب البيت ما راح استبعد انو يطلب منو يغير ( فتيلة الصوبا ) او يشغل ( صوبة البواري ) .. ويتفقد خزانات المي كمان .. يومها راح الرجل الالي ( يحط ثوبو بثمو ويهرب راجعا الى شركتو قائلا .. Tanep.. Tanep .. على ولياكم فكفكوني وبعوني خرده .. عرب لأ .. عرب لأ .. عرب .. لأ .. أهئ . أهئ.أهئ.. أهؤ .أهؤ .. بكاء مرير .. يا حرام ... مع انو مش مبرمج يبكي .. بس راح انخليه يبكي ويلطم كمان .. لعاد.
العرب حقيقة سيكونون السبب بأنشاء ( جمعية حقوق الرجل الالي ) أٍسوة بجمعية حقوق الانسان وجمعية الرفق بالحيوان .
استخدام الرجل الالي سيعمل على انتشار البطاله بس بتوخذ عمل سنه بيوم .. لكن سنة الحياة هو الاعتماد على الانسان بالدرجه الاولى من باب ان هناك امور لا يستطيع الرجل الالي القيام بها .. مثل الطلاق .. العنف الاسري .... المداقره .. المجاقمه .. الكشره .. تشغيل المسجل بأعلى صوت مسببا ازعاج .. النميمه .. الاستغابه .. نقل الكلام .. النفاق ... الكذب .. التسيب .. عدم تحمل المسؤوليه ... طولة اللسان .. الثرثره .. النمرده ... التعجب .. الخبث .. ايقاع الفتنه .. الجهل .. التنظير .. الزنا ... مسح الجوخ . النقد على الرايحه والجاي .. المفاخره .. والتفاخر .... العنف بجميع اشكاله .. حط العصا بالدولاب .. الجبن .. الاستحمام .. هذه جميعها تدخل من باب الجانب السيء الموجود بالانسان اما بعض الجوانب الحسنه الذي لا يستطيع القيام به الرجل الالي الميت اصلا .. هو الموت.. ثم الحساب.
طبعا ( مش الكل ) .. في ناس طيبه وما عندها سيئات الا ما نذر .. الناس اجمالا مجبوله على الخير والشر .. بس الاغلبيه العظمى عندها سيئات كثيره والشر والعصبيه والجهل ماخذه حيز ممتاز منها .. وانا اولكم ..حقيقة بدون زعل .. لازم ودائما اكتب هذه الجمله لان العرب سبحان الله ما بتحملوا النقد البناء ولا قول الحق ولا الاشاره الى بواطن ضعفهم ولا الاشارة الى سيئاتهم وعيوبهم لان هيك احنا ( حساسين ) ليش الحكي ( حساسين ) .. حساسين كثير .. يما .... بنفكر حالنا ملائكه .. بنحب دائما المدح والنفخ على الفاضي والمليان .. اي بدون مجاملات اي اقسم بالله العظيم انو ( اغلبيه) العرب بدهم اعاده تأهيل فكريا وعقليا وجسديا وروحيا ونفسيا واجتماعيا وسياسيا واقتصاديا وادبيا وكل شيء ... ليش الحكي وانا اولكم لا اتفكرو يعني.. اللي شاعر حالو انو خارج هذه الاغلبيه عربيا وعالميا .. نيالو...
الرجل الالي اهم مميزاتو انو مش حساس .. وفاقد لمشاعره .. لاطه .. لا من ثمو ولا كمو .. دندول .. امعه .. طرطور .. على تعال تعال .. روح روح .. فاقد لشخصيته .. كل اشي عندو ماشي .. بنفع للانظمة الديكتاتوريه .. لدفع الضرائب .. لرفع الاسعار ..
بس بالفتره الاخيره تعمل الشركات الان على انتاج رجل الي يشعر ويحس وشبيه لصفات الانسان .. الله يستر .. والله اذا نجحوا بهذا الاختراع والتقدم بهذه النقله النوعيه ما راح حدا يشتريه .. لانو الواحد مش ناقصوا بكره الرجل الالي يوقفلنا على كل كبيره وصغيره وعلى كل كلمه انقولها ويبلش ينتقد ويتذمر ويعارض ويعاند ويحرد كمان .. لا .. لهون الاختراع ممتاز .. خليه جامد .. هذا الزمن بصراحه ما بنفع معنا انزيد اشياء من حوالينا اتزيد من القال والقيل والنمرده مش ناقصنا مشاعر جياشه واراء واطروحات ونزاعات واقتراحات وافكار.. العالم بطل يتحمل .. في عنا كثير من هذه الانواع بالعكس صرنا نتبادل الخبرات بهذا المجال.

ملاحظه : ( الرجل الالي ) المصنع للدول العربيه زي اللي افهمتو من الشركات المصنعه قايمين منو كلمة ( Error ) .. لأنو مش من منطق الشركه انو الرجل الالي يقضيها على كل امر يحكي (Error) .
والسلام عليكم
Burhan_jazi@yahoo.com



تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات