طاب ضرب السف طاب ... تعال يا ولد جاي ... هي مطوله معاكوا .. انا مش مجبور كل ما طول ( شعراتكو) اقوم اقدحلي ليرتين ثلاث ليرات للحلاق .. وانا من شو بشكي .. ما شا الله عني .. هيني زي الورده .. تعال يا ولد اقعد هون واوعك تتحرك .. وانت يا مره ناولني هالمقص جاي والمشط .. وابعدي عني ثلاث كيلو متر مربع...
- دخلك دخيل .. وشو بدك بالولد والمقص والمشط .
- يا مره صلي على النبي .. ترا لقرود بتنط قدامي .. بدي احلق للولــــــــد .. افهمتي يا عمري.
- انو ولد .. يا زلمه سيبنا من جنانك .. هذا الظايل .. كل اشوي بتطلعلنا بنهفه ..اعقل يا زلمه .. إكبر.. يخرب بيت هالشغله .. كل ما بنخلص من قردتنك بتطلعنا بقردنه ثانيه .. قول الله يا شيخ .
- شوف .. شوف .. يعني انتي طايبلك اظل ادفع مصاري للحلاق .. مهو مش رحمني .. بعامل الراس الصغير زي الراس الكبير .. يعني برضيكي يا مداااام ادفع على روس لولاد ست ليرات .. ما انا بحلقلهم شو هي صنعه .. وبنوفر اجرة لحلاقه .. احنا اولى فيهم يا بنت الناس .. اعملي زي ما بقولك . هاتي الولد جاي والعده واخزي الشيطان .. يا عمي اقسم بالله اني بعرف ( احلق ) انتي ما بتعرفيني .. ما انتي اصلا اخذتيني على ملا وجهك .. ما بتعرفي مواهبي المدفونه . والله بحلق ... وكنت احلق لاصحابي وانا عزابي وروحي واسألي .
- يا زلمه لتخرط شعر الولد .. مش ناقصنا .. يعني منظر هسه هيك قدام الناس الولد يطلع شعرو خرابيط خرابيط .
- لا حول ولا قوة الا بالله العلي العظيم بس .. وشو رايك اتروحي من وجهي اقسم بالله هسه ها .. اتخليش الواحد يحكي انجليزي .. انا هسه بشرت . انتي عارفه .. ..خلص زي ما بقولك .. هاتي الولد جاي .
- طيب قلي شو بدك اتسوي .
- يا بنت الناس .. بقعد الولد هون على ( كابينة الحمام ) عشان الشعر ما ( يتنثور ) هون ولا هون ..اريحلك للتنظيف .. وبحلق للولد .. وشوفي بعدها انت يا بنت الناس ... يلا شلحي الولد وهاتي العده وتنسيش البشكير.
- امري لألله .. تعال يما اقعد هون .. خلي ابوك يحلقلك .. بس سايق الله عليك لا تخرطلو اياهم خرط .. بشويش .. بس ( تطريف ) (راس الشعره ).
- امرك ..اتوكلي على الله وخلصينا .. تعال يابا اقعد هون تتحركش .. ييـــي .. ما احلا وما ازكا هالامور هاذ .. تعال يابا .. شوف كيف بدي اخليلك شعراتك هيك حلوين ومرتبات .. ماشي يابا ..
وهذا الولد (خذ يا عياط ) .. ولك مالك يا ولد .. اسم الله عليك انت الثاني .. خلص بجبلك سوس .. بجبلك شيبس .. هسه بوديك على الحلاق بعملك اياهم بالماكينه .. لبد الولد وسكت واستسلم .
- ايوه يابا هيك وضعك تمام . هاتي المقص والمشط يا بنت .. ايوه .. بسم الله . كيف وضعك يابا هسه . تمام .
- تمام يابا.. على بركة الله .. افعل ما امرت به يا والدي .
- شو افعل ما امرت به يا والدي .. هو انا بدي اذبحك .
- وما توكلي الا على الله رب العالمين .. وستجدني من الصابرين انشاء الله يا والدي.
- لا اله الا الله .. يا ولد .. وين راح بالك ... فش منو هالحكي هاذ .. شو شايفني من هالأوليا ... بدي احلقلك .. احلق شعراتك بس ..
- بس .
- اه بس ..
وبلشت اقصقص اطراف الشعر .. ثم اتوغلت للامام باتجاه (الغره ) ثم اعاود الكره باسلوب الفر والكر بين المقدمه والقلب .. ثم اتجه يمينا ويسارا .. محاولا جاهدا ان اوازي بين اطوال الشعر .. لكن هيهات .. وكل ما يتحرك الولد ( افغر ) منطقه .. وتطلع ( جوره ) بطول 2سم بعرض 2سم بنص الشعر.. وهاي بصراحه ما عرفت كيف اعالجها .. صرت كل ما افغر منطقه احاول اني اخلي المناطق الاخرى تتساوى معها .. وبلش الشعر بهذه الحاله يتناقص طولا .. والولد مش عارف شو قاعد بصير .. على السريع ( نزعت ) المرايا من امامه نزعا بحجة بلاش تنكسر .. بديش ايقوم علي هسه ويبلش يعيط .. مهمه لازم انجزها .. شعرت حالي متورط .. (والمره ) كل اشوي اطل علي .. اه .. شو صار معك .. انا على السريع اغطي على مناطق الغفر.. انام على راس الولد بحجة اني بحلقولوا حتى ما اتشوف اشي .. اتقولي طيب ابعد هيك اشوي اشوف شو سويت .. اقولها بعدين لا اتعطليني ما انتي شايفيتني ماسك شعر الولد والمقص هسه بتخربطيني .. خليني عارف وين واصل .. خلص روحي من وجهي هسه .. وبعد اشوي بتستلم الولد (محلوقلوا ) جاهز .. يلا .. روحي اعمليلي قهوه .. يلا .. بسرعه ..
وزاد نسبة الفغر .. حتى وصلت ( السوالف ) .. كيف بسوا السوالف انسيت .. (طارو السوالف ) فوق الذان ب 3 سم فش شعر .. يا ولدي شو هالحلاقه هاي .. اشي بخزي .. وين بدي اودي وجهي من هالمره ... ولا الولد .. ولا الجيران ولا القرايب ولا الناس .. اتورطت .. خلصنا من حلاقة ( الولد الاول ) وقلتلو قوم يابا .. واجت ( امو ) ...وشافت هالشوفه .. ودبت الصوت .. فورا انا اخذت الارض .. وحطيت ايدي ورا ظهري بوضع (التكلبش ) .. وقعدت احكيلها بصوت مخنوق .. مش انا .. والله العظيم هو حرك راسوا .. كل اشو بحرك راسو . شو اعملوا ..
- يا وردي عليك يما .. ولك شو هاذ ؟ ..
- خلص يا بنت الناس .. بطول .. بطول .. اسبوع زمان بطول .. استهدي بالله ..
- يكسر ايدك .. يكسر ايدين العدويين .. يما ولك شو هاذ .. الحق علي انا اللي سلمت راس الولد .. ييـــي على حظي .
وانا زي الارنب منبطح على الارض ولا نفس ... بستجدي استجداء ان تصفح عني .. وبلشت .. ان الله غفور رحيم ..لكل جواد كبوه ... غلط الشاطر بالف .
- انت شاطر .. الله اكبر عليك يا شيخ .. انو جواد وانو عرسه قوم يا زلمه قوم .. علي وعلى حظي وعلى نصيبي .. تعال يما .. تعال .
- خلص يا بنت الناس هاي ( الفجوات ) بالراس بنرقعها (بقلم كحله ) بدهنلو اياهم بقلم الكحله اسود .. بتبينش .. على مسؤوليتي ..لا اتعقدي الولد .. خلص .. هاتي الولد الثاني خنخلص انت الثانيه ..رعبتينا .
- انو ولد ثاني .. لا يستر بيتك .. خذو على الحلاق .. وخذ اخو هاذ الثاني خلي يظبط بلاويك .. خلص منشان الله .
- يا بنت الناس .. اه .. بلشنا .. بقولك معيش ادفع للحلاق .. وبدي اكمل حلاقتهم .. ان قلت اه ولا لأ .. واماك خيارين .. حلاقة لولاد امامك .. ودار اهلك خلفك .. ايهما تختارين .
- لا حول ولا قوة الا بالله العلي العظيم .. يا باي شو بكره ايام عطلتك .. ليش ما بخلوك الدوام يوم العطل مش عارف .
- تعال يما اقعد خلي ابوك يحلقلك وخلينا نخلص من هالنهار هاذ اللي مش مبين اولوا من اخرو .
سلمتني الولد الثاني واخذت المدام الولد الاول ( اتحممو) ..
ايوه تعال يابا ... شو اسمك انت يا امور ..
- شو بدك باسمي يابا هسه .. يابا انت بدك اتسوي شعراتي زي اخوي
- لا يابا لا .. فال الله ولا فالك .. انت غير شكل .. هو اخوك هذاك كثير حركه .. اما انت يابا ما شا الله عنك .. اقعد عاقل بتطلع حلاقتك بتجنن .. ماشي يابا ..
- ماشي يابا .. افعل ما امرت به ..
- ما حدا امرني باشي والله يابا .. هذا تطوع مني لألكم لاني بحبكم .. افهمت .
- افهمت .. حسبي الله ونعم الوكيل بس .. يما .. خليك جنبي اتروحيش بعيد .
- هيني يما جنبك .. شو بدي اقول بس .. ما بقول الا يا رب صبرني.
- على بركه الله .. ارفع راسك يابا .. ايوه خليك هيك ..
- وبلشت عملية ( الجزر) .. يلعن ولاياها مش ظابطه معي .. ( فغر بفغر) ... وبلشنا اندرج على راس هالولد .. رايح جاي .. رايح جاي .. مااختلف كثير عن راس اخو .. نسخه طبق الاصل ...
واتكرر المشهد .. صوتت (المره ) دبت الصوت.. وصارت اتزغرد .. ليش ما بعرف .. شو المناسبه وشو هالخربطه تصويت وصراخ وزغرده مع بعض .. ما بعرف .. بتركها لعلماء النفس .....انا على السريع اخذت الارض .. وبلشت ماهو .. ماهو .. حرك راسو .. حرك رجليه .. مفيش فايده .. صراخ ودعاوي وندب على حظها وعلى جيزتها .. ولعنت سلسفين اليوم اللي قعدت فيه على ( الكوشه ) .. وانا بوضع الخائف ... وحاطط ايدي الثنتين على راسي من الخلف ومنبطح على الارض ..بوضع برضو ( التكلبش ) .. وادوات الحلاقه خبيتهم بعبي من الرعبه ... وعلى .. استهدي بالله يا مره .. مش محرزه .. والله انا حلاق بس انت (نقيتي ) علي .. ما هديتي بالي .. فش منو ... انمسح في الارض .. وبعد ما هديت الموجه .. قمت واتسحسلت جهة الصالون وقعدت على الكنبايه اراقب المشهد بحذر .. بحذر شديد .. شديد كثير .. والتفت يمين وشمال .. بلاش فرده هيك ولا هيك طايشه تيجي براس الواحد مش ناقصو ..
اخذت ( ست الحسن ) الولد الثاني ( وحممتو ) ...
ظل في عندي بنت .. هاي كيف بدي احلقلها ... ناديت عليها .. يابا . تعالي يابا .. كيفك يا اموره ..
انتبهت امها علي وعلى السريع ركضت على وحطيت ركبتها ببطني وانتزعت البنت مني انتزاع .. قالت الك دين واللي دين .. اذا بتقرب على هالبنت .. قلتلها يا بنت .. بس تطريف .. هاي بنت مش زي لولاد .. ما راح احلقلها زي لولاد .. بش تطريف الشعر ...
- اسمع .. والله دار اهلي هسه .. هسه شايفهم قدامي .. بوجهي عليهم .. يا اما بتعتق هالبنت يا ويلك يا ويلك اذا بتقرب عليها .. بكفيش خرطت روس لولاد خرط .. يا فضيحتنا بس ..
- لبسيهم طواقي .. بمشي الحال .. شوفي ما احلاهم .. لا تطلعي على الراس الفاضي .. اطلعي على الراس المليان . اطلعي على جهة الشعر .. لا تطلعي على مناطق ( الفغر ) .. يعني من الناحيه المعنويه على الاقل .. عشان لولاد ما اتعقديهم ..
- والله ما عقدتني وما راح يعقد لولاد غيرك .. سيبنا منك يا شيخ .. قال ليش فلانه سممت جوزها .. اكيد حلق لولادو .
استحلفتها بالله اني اكمل مشواري بالحلاقه مع بنتي .. وقلتلها ابدا تحت اشرافك .. ورشه وفتحناها .. خلينا نخلص يا بنت الناس .. وبميت موالاه وبميت ترجايه لما وافقت على ( تطريف شعر البنات ) وتحت اشرافها الدولي .. وظبطنا امور البنت بدون ( فغر) .. اللهم اللهم من باب الامانه او من باب البلديه .. أادور شعر البنت تدوير اتقول قاصو على شكل صحن ميلامين .. بس بدون فغر .. الحمد لله .. وحممت البنت وقعدوا الثلاث اقبالي ما شا الله عنهم .. بصعوبه اتعرفت عليهم .. وين كانو يا حرام وين صاروا يلعن ابو الفقر بس ...
جبتلهم شيبس وسوس وعصير ولعب ب 15 دينارتطيب خاطر .. حتى امرر هالازمه هاي وارضيهم واعوضهم نفسيا ومعنويا .. والمدام قدحناها حبتين اتويكس وبطاقه امنيه وكلمتين حلوين وجاجه 2 كيلو ونص وسطل جميد ... هيك انا على الاقل طلعت كسبان وفرت 6 ليرات اجرة حلاقه .. دقوا على الخشب.
وتعال اسمع تعليقات الناس امامي وخلفي .. وجها لوجه .. وانا غايب ..
- يا زلمه حرام عليك .. كان قلتلي .. انا كان دفعتلك اجرة لحلاقه .. يا زلمه شو جاب الحمير لشم الورد .. ول هاذ راس ولا (خسه ).. اتقي الله .. هذا بدخل من باب العنف الاسري .. والله بتنسجن عليها .. بعينهم الله .. يلا بطول .. الله يعينك على هالجوز .. بدك تتحمليه .. الحق عليكي .. كبي المشط والمقص ولا اتخليهم بالبيت .. .. اوعك اتفكري تحلقيلهم من هون لسنه .. يا زلمه استغفر ربك .. والله لو محلك بروح عند اهلي . لا تسكتيلوا .. شو نصيبك هاذ.. اترديش عليه ... بعوضك الله بهالجوز .. واصبري عليه والك اجر عند ربنا ...وهات يا قصص عن هبل الزوج من هون وهناك .. صرت معيار لهبل وجنان الازواج .... ( وانا قاعد ساكت ) حتى مش قادر ادافع عن نفسي .. بسمع وبس .. شعرت بالخجل والاهانه والتذمر والاحباط .. ما حدا قلي الله يعطيك العافيه ..منها للامام .. اشوي اشوي بتسير .. ولولاد لاقوها فرصه .. حرثو علي حراثه .. على ( جبلنا) جبلنا .. قضيتها سري مري على الدكانه .. استغلوا الوضع .. واعتبروها تكفير عن الذنوب .. وتكفير عن عملتي السوده بحقهم .. حتى بنتي الصغيره قبل ما اتخلص بكيت الشيبس وثمها مليان منو اتأشرلي بأصبعها باتجاه الدكانه .. يعني يلا قوم قرب يخلص الباكيت عشان تلحق اتروح وترجع .. وولادي وان لسه على الباب بدي اروح بلحقني بكلمتين .. جيب معاك بطريقك ( بلونيين ) ... هاي اخرتها .. بلانيين ..بلاوين .. بلالين .ظبطت.
مرت الحادثه بخير وبعد مضي سنه ... طنت ببالي اني احلقلهم .. حملت المشط والمقص ووقفت بالكاردور بالبيت اعاين (اولادي لصغار) من بعيد لبعيد واركز نظري على شعرهم واطلع عليهم واحد واحد .. يا اخي ما بعرف .. (كرتو ) الثلاث بسرعه عند امهم واتخبوا بحضنها .. وزوجتي (فنجرت عينيها ) وهمرت .. سحبت حالي بهدوء وروحت على الحمام وعلى مرايا المغسله (قلمت) شواربي وقعدت اظبطهم .. ولما اطلعت من الحمام صرخت ( المره ) فكرتني حرامي .
ملاحظه : وين الخلل .. بالحلاق .. ولا بالروس .. ولا بالمقص .. ولا بالمشط .. ولا (بالجل ) .. اقولكم .. الظاهر والعلم عند الله انو الخلل ( بالمرايه ) .
والسلام عليكم

Burhan_jazi@yahoo.com