القلم


(معاك قلم ).. (لو سمحت بلاقي معك قلم ).. عباره تتكرر بأي تجمع لانجاز اي نوع من المعاملات او حتى غير معاملات .. حكوميه .. خاصه .. رسميه .. طبيه .. صناعيه .. جمركيه .. كتب كتاب .. عقد ايجار .. مشاجره .. صلح .. اي حتى اذا واحد بتعرف على وحده بالشارع سرعان ما بسأل عن قلم .. عشان يسجلوا ارقام تلفونات بعض .. هذا الموقف انا وقعت فيه مليون مره وكل العالم يعاني من ازمه هذه العباره ( معك قلم ) .. ( بلاقي معك قلم ) ..( حجي .. ابو الشباب .. والله يا اختي .. معك قلم ... بس دقيقتين اعبي هالطلب ..


بدي اسجل هالشغله ... لوسمحت ) ... وقع بأيدي اشكال وانواع مختلفه وغريبه وتصاميم عجيبه من الاقلام المستعاره .. وكانت اتهف نفسي باوقات كثيره انو الطش القلم .. وكثير وقعت بمطبات اني اعطي القلم للملهوفين في اتمام معاملاتهم او انجاز مهمتهم انو الزلمه او البنت اللي يوخذوا قلمي يغيب اويتغيب عن انظاري .. افقدوا ما الاقيه .. انسى معاملتي واقوم واقعد ادورعلى اللي اخذ قلمي ... كنت بالدوائر الحكوميه والغير حكوميه زي الملطوش مثل الرادار .. اراقب بعيني كل الناس احاول بس اشوف واتذكر شكل اللي اخذ قلمي ..


الناس كانت تتطلع علي واتقول شو مالو هالزلمه بتفحص فينا .. مالو زي اللي مضيع حجابوا ... يا حرام جننوا بهالمعامله .. ايحطو الحق على الدائره او المؤسسه وعلى موظفينها او على الاجراءات الروتينيه بعرفوش انو المسأله بعيده كل البعد عن هذه الظنون وانو المسأله باختصار اني بدور على اللي اخذ القلم ... وياما راحت علي .. وطار القلم ... اللهم من باب الامانه كان يظل معي ( غطا القلم ) .. انا لو لقيت الزلمه هاذ او البنت مش لاشي .. بديش القلم بس كنت ناوي اعطي ( الغطا ) حتى تكتمل دائرة ( طيران او اختفاء او اختطاف القلم ) . حتى اكمل معروفي ... شو بدي بالغطا ؟ ... راح الجمل بدنا نطلع على ذيلو .


ببعض الاحيان وباوقات كثيره في حالة طلبي قلم من الناس كنت اسمع الاعتذارات من هؤلاء الاشخاص الذين يملكون الاقلام .. لا والله القلم (بكتبش ) .. ( مشحط ) ( فاضي ) ( خربان ) ( هذا قلم قداحه ) (او هذا قلم ضو ) ( او ميداليه ) الظاهر والعلم عند الله انو مقروص كثير وياما وياما يمكن انلطش منو القلم او طنشوا او غيب الشخص المستعير للقلم ... واوقات كثيره استعير قلم وبنص تعباية المعامله يجي صاحب القلم مستعجل ويوخذ القلم بحجه انو نادو على اسمو او بدو يتابع معاملتو ارد واستعير قلم اخر تطلع الله وكيلك معاملتي بخمس الوان حسب درجات لون القلم المستعار .. اتقول لوحه تشكيليه .. وحتى اكون اكثرصدقا كنت بحالة الانتهاء من القلم المستعار ارجع القلم لشخص اخر .. كان يلتبس علي شكل الزلمه او البنت اللي اخذت منو القلم .. في بعض منهم محترمين يقولي عفوا مش قلمي هاذ وانا الشخص الغير المطلوب .. وفي منهم كان ينظرلي بنص عين ثم يمد ايدو باستحياء وياخذ القلم وسرعا ن ما يختفي .. وبعض لحظات يأتي صاحب القلم الاصلي ويطلب قلمو ..


وأقع بموقف محرج ومخزي ومرتبك وابلش اقول ( ماهو .. ماهو ) ... واصير اطلع حولي على اللي اخذ القلم اتسلبط واعتباط وتخويث وحرمنه .. ولكن هيهات .. ما انا روحت للحرامي برجلي وسلمتو القلم .. بالنسبه الو فرصه .. وين بدي الاقيه هسه .. هذا اذا اتذكرت شكلوا كمان .. مهو كمان بلاش يشتبه علي شخص ونتهم الناس وندخل بسين وجيم ويمكن ينولنا ( بكسين ) وشلوت من ورا هالقصه .. طيب هسه كيف بدنا نطلع من هالورطه .. بنشرح للزلمه شو صار معي وانو التبس علي الامر وانو قلمك يا ابو الحبان اخذوا واحد ثاني ..


ما راح يصدق هذا اولا .. انا بنظرو حرامي وسراق وبدي اتسلبط عليه بالقلم .. بعرض عليه ثمن القلم برفض .. بعرض عليه اشتريلوا واحد جديد برفض .. شو هالورطه هاي .. كلو من ورا هالقلم .. وببلش يتأفأف ويشرحلي قصه هالقلم .. ( والله هالقلم غالي علي ) ( اجاني هديه بعيد ميلادي .. عليم الله هو اصلا ناسي تاريخ ميلاده .. بس على دوري صار للاخ او للاخت الكريمه عيد ميلاد .. او والله اجاني بمناسبه نجاحي او ترقيتي بالعمل او من زوجتي عربون محبه او من صاحبتي بعيد حبنا .. او من ستي الحجه الله يرحمها ذكرى عزيزه ومن ريحه المرحومه او المرحوم .. او من مسؤول كبير بعزو وبعزني او جبتو معي من بلاد برا ... او والله ما في منو بالعالم الا ثلاث اقلام واحد مع رئيس دوله ( الكونغو ) بافريقيا الشماليه وواحد مع المناظل الثوري المرحوم ( جيفارا ) والثالث الله وكيلك معي اللي حضرتك لطشتوا ..


شو هالمطب هاذ .. وشو الله جابرني اسمع هالموشحات والاساطير هاي التي نسجت حول هذا ( القلم السحري ) اي والله بشلن ما بشتريه وثانيا اي لو لاقيتو بالشارع ما طولتو .. اي والله لو هداني اياه واحد لاعتبرها منقصه بحقي لانو ما عليه القيمه .. بس شو بدك اتسوي .. من حكم بمالو ما ظلم .. وتعال دبرها معاه .. بطريقه او باخرى بتسمع كلمتين انظاف بسمو البدن هذا اولا وبعدين بتروح مضطر تشتري قلم من النوع الغالي اشوي من مكتبه مجاوره حتى ترضيه وتسكر هالطابق ... وما بعجبوا .. لكن بالنهايه الموضوع بنتهي بعد نشفان ريق وبعد ما اتسب على حالك وعلى هبلك .


في دوائر كثيره بتكون ( رابطه ) القلم بخيط .. بحبل .. بزنبرك .. بأي اشي عشان المراجعين يوقعوا معامله او يعبوا اشي معين على الكاونتر لكن للاسف الشديد بتشوف قاعدة القلم والحبل او الخيط او الزنبرك بس ما بتلاقي القلم .. مين ( ماعطو ) من محلو وداسو بجيبتو عينك عينك ما بتعرف .. ولما اتقول للموظف او الموظفه القاعده خلف الكاونتر لو سمحتي ما في قلم هون .. ضايع او ماخذينوا .. بتبلش تتأفأف واتمتم وكمن لسان حالها يقول الله اكبر لطشو القلم عينك عينك .. شو هالمسخره هاي .. وتضطر تعطيني قلمها واتعطل شغلها حتى اوقع او اعبي الطلب ... ومرات اتقولي دبر حالك .


مع انو باوقات كثيره كنت اضطر اشتري قلم بس لمجرد اعبي معامله او ورقه فقط ..و بعدها افقدوا او انساه هنا او هناك او يسقط مني او ارميه بجارور مكتبي او باحدى جوارير هالبيت .. ودايما ( انسى ) اخذ معي قلم بحالة انو بدي اروح انجز معامله ...


انا متأكد انو فش بيت او شخص لا يملك كميات كبيره ووفيره من الاقلام .. لكن بوقت الحاجه ما بتلاقيه او بتنسى توخذ قلم .. الواحد ما بنسى يوخذ ( خلويه ) او ( باكيت دخانه ) او ( مفاتيح سيارتو ) .. انا ما عندي سياره بستعيض عنهم بمفاتيح البيت او مفتاح خزان المي.. او(مفتاح انجليزي ) ... لكن قلم ..هيهات اني احمل قلم ..

قررت بعد معانه شديده من هذه المواقف البايخه انو اصير احمل قلم معي باستمرار .. وفعلا اشتريت قلم مرتب متواضع نوع (روكو ) وحطيتو بهالجيبه .. صيف شتا .. انلطش منو (10) اقلام .. سقط منو بحدود (7) اقلام .. استحلاه بني ادم عدد (6) ... استحوذ عليه خجلا (3 ) اقلام .. هديه او رشوه مبطنه لتاجيل دين مستحق علي مثل الدكنجي وبياع الجاج وصاحب البيت عدد (11) ... بلشت بقلم وانتهى بي الامر انو اشتريت من هذه الانواع من الاقلام بحدود (50 ) قلم اتوزعت كما وردت سابقا ...


اخر قلم حمدت الله انو ثبت معي .. لكن للاسف الشديد .. جيبة القميص اتحول لونها من اللون (الابيض ) الى اللون ( الازرق ) .. فار القلم ... ما هو يا ( طار القلم ) او ( فار القلم ) ... حلفت يمين بعدها ما احمل واحد .. وعدت من جديد لطبيعتي الانسانيه اشحد او استعير قلم .. الظاهر انو هاي الشغله بدمي ... كتبه مكتوبه علي .. يا باي شو مرتاح هسه .. هيك انا طبيعي ميه بالميه بدون الوان صناعيه.
ملاحظه : (معاك قلم .. لوسمحت .. بدي اكمل هالمقال ).. طيب اسأل اللي جنبك.



تعليقات القراء

فنيخر
الكاتب الكريم

الاستاذ:برهان جازي

انا من المتابعين لمقالاتك



ولكن صديقك



من يصدقك القول



دعني اهمس في اذنك



مقالاتك



وليس شخصك الكريم



في تراجع



مع عظيم مودتي

25-01-2012 10:22 AM
عنبوط
...
رد من المحرر:
نعتذر
25-01-2012 02:09 PM
محمد بدر
أيّام قضيتها متفرّغا لمتابعة مقالات
السّادة الكُتّاب في العديد من المواقع وبعدها قرّرتُ أن أكتب
مقالة بعنوان
أيّها (الكُتّاب ) ارحموا ( القُرّاء )
بدأتُ في الكتابة ... ثُمّ
تراجعت !!!
مع الشّكر للفاضل فنيخر
قائلا له ..أضنيتني ...
فأنت تسبقني دائما
وكلّ الشّكر لجراسا
وللمحرّر المحترم
رد من المحرر:
العفو
25-01-2012 03:43 PM
معروف أبو رنة
دخلك يا رب،شو ...ل؟
25-01-2012 06:56 PM
فنيخر
الفاضل و المبجل

الاستاذ محمد بدر

تحيه طيبه و بعد

"فأنت تسبقني دائما"

تصدقش حالك

كل القصه و ما فيها اني انا نحيل و اسرع

مع عظيم مودتي
26-01-2012 02:18 PM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات