اغلاق

بيان رقم 7 صادر عن مواطن اردني مقهور


- انا مقهور ومسطول ومكيّف على الاخر .. باسم عوض الله وقع بالمصيدة .. يعني رايحين الجماعة يجيبوا خميره ... ويلعنوا تميس اللي خلفوّه ... ويمسحوا بيه الارض ...

- وصلتني معلومة أكيدة .. الملك مع ( وذان الفجر ) طلب يجيبوا له ابن البهلوان لعنده ..شمطه جوز كفوف ولحقهّن (بشلوّت ) على قفاه ...
ولك يا هامل بهدلت البلد وجبتللي الحكي وخليّت اللي بسوا واللي ما بسوا يحكي عليّ وعلى ( رانيا ) .. اقلب وجهك من هون .. روح سلّم حالك للمحكمة قبل ما اعمل من خدودك سلطة شاورما .. سنحك .. وسنح اللي جابك على هالبلد ......

ابو ندهتين ( البسبوس ) ظل مسكر ثمة ورامي راسه بالارض .. وزي الطير راح يركض ركاض على المحكمة .... شايفين العين الحمرا شو بتساوي
انا مبسوط عالاخر وبستنّّى الملك يجيب كل الشلة اللي خربوا بيتنا ولحقوّنا الدار السودا .. انا مش قلتلكو انه الملك انفك سحره وانه مش ممكن يضحي ببلده كرمال شلة حرامية ... والله يا ابو حسين احنا هسا معاك عالموت وابشر .. ترانا قدها وقدود


- وعلى سيرة الملك الله يطوّل عمره تراه طلع مش شايف الضو بعد ما اجتمع قبل يومين برؤسا الحكومات ... انا بعرف طبعه .. لما بطلع بكيت الدخان وبولع سيكارة ..بتكون الامور مقبعة معه .


يخرب صنوجهم ما واحد بيهم يقول كلمة حق قدامه ... جابهم يسمع منهم عن اللي بصير بالبلد .. كل شى تمام وعال العال ياجلالة الملك ..
ول عليكوا شو هشّيته .. هسا البلد عال العال يا... الشاطر بيهم بس بده رضا الملك ... ولكو يا عمي الملك جابكوا يسمع منكو شو الصحيح .. صرتو تغزلوله عالناعم .. اللي بقوله والله احنا بالف خير .. واللي بقوله فكك من اللي بتسمعه هذول عيال زغار مش داريين وين الدنيا رايحة بيهم .. واللي بقوله يا سيدي حطني رئيس وزراء والمشاكل حلها عندي ... واللي حردان ليش الملك ما قبل عنده غدا .. هذول همة اللي كنا مصنمين بيهم ؟؟ على مين بتضحكوا انتو .. ما احنا خابزينكو وعاجنينكو .. العطاءات لولادكو .. الوظايف لبناتكو .. شمات الهوا لنسوانكو .. يم طب لزق صرتو هسا اصحاب شرف .. دخيلكو من وين هالمصاري اللي بتتبغددوا بيهن .. وقصوركو وسياراتكو باين عليكو ورثتوها من جدودكو اللي كان القشب ماكل ايديهم ورجليهم .. تصوروا رؤساء وزارات ما واحد بيهم يقدم للملك دراسة عن مشاكل البلد وشو اللي بصير بيها وكيف يمكن حل مشاكل الناس ..


على ذمة مندوب الاعلام بالديوان الملكي كل رؤساء الحكومات كانوا يسولفوا سواليف حصيدة ... انت يا سيدنا قائد الاصلاح .. انت يا سيدنا رمز الاصلاح .. انت يا سيدنا سبقت الربيع العربي .. احنا يا سيدنا لولاك بنسواش قشرة بصلة وانت يا سيدنا .. وانت يا قايد مسيرتنا ..
مش عرف شلون تحمّل الملك يقعد معهم كل هالوقت ؟؟ .. مليح اللي ما جلطوه .

.. المهم الملك قال ياريتني ما جبتهم ولا شفتهم و لو اني طحت عالسوق وقعدت مع الخضرجية والحلونجية غير يفيدوني احسن منهم .. والكلام على ذمة الراوي ( محمودكو )


بصراحة حاب اوشوش الملك كلمتين بدون ما يسمعوني المخابرات ولا جماعة الديوان ... نظّف يا ابو حسين عن جنب وطرف .. واسمع من اللي بعرفوك وبحبوك مش من اللي عايشين بعشرين وجه .. والله كل الاردنيين مقهورين منهم .. وما بهمهم غير مصالحهم .. اساسا مين قال لك انه الشعب الاردني بحبهم ولا داري عنهم او بكيّل بصاعهم.


..... بصراحة يا ابو حسين بدنا منك هزة .. بدنا زلزال ينفض نفض وما يخللي سرسري ولا حرامي على كرسيه ..

الشعب بده من الملك يشلع الفساد من شروشه.. واحنا معاك يا ابو حسين .. ابشر واحنا رجالك .. بس رد علينا ......



اتبع البوم بدلك عالخراب .. من عشرين سنة واحنا بنقول يا ناس يا عالم .. اتركوكوا من هالولدنة .. بدنا زلام نرتكي عليهم .. ولا حياة لمن تنادي .. كل يوم وجه جديد .. كل يوم زبون جديد .. لحتى صارت البلد مفرخة للفساد .. وهات قضّب حرامية .

:



تعليقات القراء

هاني غنيمات
بالله يا استاذ محمود هذا حلم والا حقيقه
11-01-2012 06:15 PM
ابو رمان
جد انك مش طبيعي مقالاتك بتجنن طبعا هيك احنا السلطية ما بنخاف وبنقول رأينا بصراحة وبصدق

13-01-2012 07:41 AM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات