قام احد الاشخاص بزيارتي بوقت غير مرغوب فيه .. وحقيقة معرفتي به بعيده وسطحيه.. بصراحه احكي .. لكني كنت مضطرا لاستقباله .. مراهنا على ( لعلى وعسى ) ان تكون زيارته صغيره لطيفه مقتصره قصيره .. لكن الاخ الكريم ساق فيها .. فنجان قهوه .. كاسه شاي .. عصير .. سنددويشة زيت زعتر .. قرفه .. ينسون .. حتى العبنا خمسات .. مفيش فايده .. جاي الزلمه معتبرني (الملهم ) لحل مشاكله ومكان لتنفيس همومه .. مع العلم بأني مررت الو معلومه بطريقه غير مباشره انو ( فاقد الشيء لا يعطيه ) .. وهاي ذان من طين وهاي ذان من عجين .. الزلمه جاي مستقصد .. متسلط .. ابدا.. حديث ورا حديث .. قصه ورا قصه .. مع العلم نص قصصه واحاديثه مش مركز فيها بتاتا .. وكليا .. راسي وجعني وشعرت بالملل وضيق بالتنفس .. ولكن لم اظهر ذلك .. ما بقدرش .. وظليت اجامل على الكذب والنفاق ومتحمل على نفسي .. وهو يطول ويقصر .. اقوم واقعد .. يقولي مالك .. اقولوا في عرس عنا وكمان اشوي بدي اطلع .. تعلمت الكذب على يد هذا الرجل .. الادهى والامر يقولي مبروك .. الله يتمم على خير .. ثم يعاود ويكمل حديثه .. قصص واحاديث لا يوجد بها حتى عنصر الشوق او المتعه او حتى عنصر المفاجأة او الصدمه او التحليل او التفسير او الدعوه الى التأمل والتفكير .. قصص عاديه ثلاث ارباعها قصص شخصيه مكرره ..
اعاود النهوض والجلوس والتحجج بالتلفون .. ملفت انتباهه اني انتظر مكالمه مهمه وضروريه .. عاد لا في مكالمه ولاحدا بحكي معي اصلا الا ما ندر على التلفون .. لكن لكي يتزحزح عن هالكرسي لا يمكن ( للعلم تخليت عن هذا الكرسي فيما بعد .. بعتو لاقرب محل اثاث مستعمل .. مش لاشي بس لاني اتشائمت منو ) .. لكن تركيبه مخ هذا الزلمه استنتجت انه لا يتأثر بالعوامل الخارجيه .. ولا بعوامل الرطوبه ولا السخونه ولا ردات الفعل ولا البروده .. شقفه وحده .. مسترسل احاديثه بتشعب غريب .. بعيده كل البعد عن الترابط .. انا شخصيا لم اعرف هذا الشخص مباشره و بشكل جيد .. هو ليس صاحبي او صديقي ..هو عباره عن صاحب جار لي عرفني من خلال ابن اختو لبياع الغاز .. تمادى بي الامر اني طلبت منه بعد اذنه ان يسمح لي باحضار المكوى وان اقوم بكوي بنطلوني وقميصي استعدادا لحفلة العرس الوهميه .. لم يمانع .. كويت ملابس امامه وهو يتحدث .. فشلت خطتي .. توقعت ان يعتذر مني ويروح .. مستندا الى انشغالي وتحضيري لحفلة العرس .. لكن وين .. هيهات .. هذا الزلمه مصر .. اي وحدة كوماندوز ما طلعتوا من عندي ... ولا حتى زلزال .. فاستسلمت للامر .. وجلست مقابله استمع اليه قصرا .. اتثاوب بين الفينه والاخرى .. لعله يشعر .. ادعي النعاس .. انظر الى الساعه .. فش فايده .. اقترحت عليه الجلوس بالهواء الطلق على باب البيت لعل وعسى ان ازحزحوا عن الكرسي واخرجه من غرفة الضيوف كخطه اوليه .. تجاوب الاخ الكريم بعد ما قطع شوط جيد بالجلوس والزياره قاربت الساعتين والنص وعشر دقايق.. جلسنا عبى باب البيت وتعمدت ان لا احضر كراسي مشيرا له الى مدى متعه الجلوس على حوض الزريعه .. احضر معه كاسة الشاي وبكيت دخانه .. وجلس غير مهتم .. اي والله لو قلتلو اقعد على ظهر الخزان ليقعد . لم اتخيل يوما انو في بشر بالطريقه هاي .. مع احترامي الشديد له لكن والحق يقال .. ثقافته محدوده نوعا ما .. واحاديثه ممله .. في ناس طبيعتها هيك مش بايدوا .. لكن هناك طرف اخر لا يطيق ذلك وانا واحد منهم .. على ايه حال .. استمرت الجلسه وغلبني النعاس والتشتيت وعدم التركيز ومش عارف عن اش بحكي وشو هو الموضوع .. وفجأه استشهدني بموضوع واراد ان يعرف رأيي ..
هو :: صح ولا لأ .
انا :: والله يا عمي مظبوط .. ما بصير هيك ..
هو :: شو اللي ما بصير هيك .. وشو المضبوط .. يعني انا غلطان ..
انا :: لا .. لا .. انت افهمتني غلط .. انا قصدي انو هذا الحكي ما بصير .. مش مظبوط .
ابتسم .. كان من المفترض ان اشهد معه وليس ضده .. لكني مش فاهم شو الموضوع قمت ايدت الناس اللي متهاوشين معاه ضده .. وهذا الحكي ما بصير .. لو هذا الضيف على غلط حسب روايته لا يجوز ان تقف ضده .. يجب ان تؤيد افعاله واقواله وان تصرفه صحيح وان الحق على فلان وعلان . .. لقد نجيت من هذا المأزق بتداركي الامر ... ومن ثم بقي يسترسل وفجأه اوقعني بنفس المطب ... وكنت بحاله ايضا عدم التركيز والتشتيت ودخلت مرحله التسطيل ...
هو : هذا تصرف انت بترضى عنو .
انا : لا . لا هو غلطان ما بصير الحكي .
هو : يا زلمه اللي بحكيلك عنو زلمه اكويس مش هو الغلطان.
انا : اه .. هسه افهمت والله اتخربطت .. لا يا عمي معاه حق .
انا مش عارف شو الموضوع وشو القصه واتحيرت اقول لأ ولا أه .. مش عارف متى أأؤيد الحكي ومتى انفيه .. بقولو شمال بطلع الجواب لازم اقول يمين .. وان قلت يمين لازم الجواب يطلع شمال .. دايما بكون عكس التيار باتجاهين .. فعلا اطلعت (امعه ) عديم الشخصيه .. ما اليش رأي .. مش ظابطه معي .. مش عارف متى ارضيه.. ان حكيت بزعل .. ان سكتت بزعل .. شو هالزياره هاي .. شو هالمواضيع التافه المطروحه وش هالزياره اللي الها اول ومالهاش اخر ..
بالاخير طفح الكيل في .. قلتلوا يا عمي حياك الله واهلا وسهلا فيك .. احكي مع قرابتك بلكي وصل .. قال ..لأ ... هو قلي بدو يحكي معي .. انا بستنى منو تلفون .. ايوه .. ليلتنا انس .. قلتلوا يا عمي بصراحه انا عندي مشوار ضروري وصرت مأخروا عشانك .. معلش بدك تعذرني .. انا مضطر اروح .. بتحب تستناني لما ارجع استناني .. شوفلك محل هون ولا هون وارجع عادي ... انا مش راح اتأخر.. قال خلص ماشي .. انا كمان بدي اروح الظاهر صاحبنا مش راح يجي ..
اضطرييت البس واسكر البيت واخرج امامه وسلمت عليه وسلم علي وراح .. وامشيت انا من قداموا وقطعت الشارع .. وغبت ربع ساعه وروحت ..
وما ان وصلت البيت وغيرت وقعدت وحمدت الله الا وهو بدق على باب البيت ..
هو : مرحبا
انا : هلا
هو : بشوفك ما اتاخرت
انا : لا والله قضيت مشواري بسرعه وارجعت لاني والله تعبان وبدي انام ..
هو : طيب شوفتو للزلمه هاذ اجا اشي هون
انا : انو زلمه
هو :قرابتي اللي بستناه
انا :لا والله ما اجا ولا حكى.
هو : طيب خليني استناه اشوي هون .. وخلص اذا ما اجا بروح .
هذه القصه حدثت بعام 2001 ... الان هو مقيم ببيتي من ذلك التاريخ لغاية الان واصبحنا من اعز الاصدقاء والاصحاب ونتشارك بكل شيء .. واصبح بحكم العشره له نصيب الاسد بالميراث...
ملاحظه : سؤال ؟ في حدا بعرف مين قرابتوا او صاحبوا لهذا الزلمه ؟ .. قبل ما تقع الراس بالفاس .. انا مش حمل خلفه وواع ويع.

والسلام عليكم
Burhan_jazi@yahoo.com