اغلاق

دوده من عوده


دوده من عوده يعني سوس القمح من وبيه .. \\\ و الله سلامات دولة ابو غيث .. زمان الك بهالبلد .. مش معقول يازلمة .. والله اشتقنالك \\\.. من يوم ما ترشحت لمجلس النواب .. حطيّنا ايديّنا ورجليّنا بميّة باردة ...وقلنا والله ياهلا برئيس مجلس البصيمة\\ .. عمي ابو غيث ترى الكراسي بتصّدي مع طول الزمن .. \\ بس الزلام الملاح شرواك مش لازم بتغيروا .. \\ سايق عليك الله تعد الصحيح .. عاجبك وضع هالبلد بالله . ؟؟؟. يا ابن الحلال احكيلك كلمة حق .. اعملها مرة وحدة بس .. وقول للاعور ... انت اعور بعينه ... \\ .. يا زلمة ما انت شيخ و ابن شيخ .. وعمر المصاري ما عملت ازلام \\\ .. ابو غيث ترى بكرة القرعة رايحة تقوم على ام قرون .. ورايح يسجل التاريخ كل شي .. اللي الك .. واللي عليك.. . يازلمة الدولة كلها بتتحزم ببني صخر??? ..


لما بتبرد الدولة بتدوّر عليكو .. وعلى السلطيّة وعلى عبّاد وبني حسن وعلى الطفايلة والمعانية والكركية والشمالات منشان يدفوّها ويغطوّها .. ولما بتزبط امورها بتطوّط اللنا والكو ... \\\ والله يا ابو غيث اذا اجيت للصحيح الامور خربانة .. بدي اسألك سؤال .. وبالله عليك تجاوبني عليه بصراحة .. منو اللي اطلع خالد شاهين لبرة .. ؟؟؟ ومنو اللي وصّله للمطار ؟؟.... اذا بتعرف وبتخاف تقول تراها مش مليحة منك .. واذا مش عارف منوه اللي اطلعه .. نصيحتي الك تترك هالكرسي وتروّح ترى ابشكلك.. .وملعون هيك لهيك لكل المناصب \\ بعدين شي قصة هالكازينو اللي عملتوها حبل من مسد .. وتركتوا الف سولافة اهم منها .... \\\\ .. اخوي يا ابو غيث ترى البلد مليانة ازلام خرده وكلهم صاروا هون مسؤولين عني وعنك ... منين اجو ؟؟ والله انت اعرف .. وبصراحة انا عتبان عليك كثير شو بدك بهالبشت حتى تدافع عنه .. خايف اقول مهو الخل اخو الخردل .. لا والله انت زلمة حشم وغانم وابن شيوخ كمان ..بس والله يا خوي شايفينك خرج سلامات وتحيات ومباركات وتهاني .. يا زلمة حّمر عينك مرة وحده .. خليّ الجماعة يعرفوا انك ابن هالبلد بحق وحقيق وانه ابوك وجدودك عمرّوها قبلهم ... وين المرجلة ؟؟ لحد وانا ابوك ياعبد ... ؟؟؟ سنح الردي ولحم الجدي .... والقرد قرد حتى لو كان بعين امه غزال ؟؟؟؟
اشي بضهد .... وبغث البال .. أي هو ناقصنا عقب تالي هالعمر .. صامد لا توكل .. ومفلعّ لا توكل ..وكل حتى تنسطح.... والله ما انا داري



من وين اجتنا هالولدنة .. \\\ ابو غيث الحبيب ترى حبيبك اللي بزعلك مش اللي بضحّكك .. وانا حبيبك .. الاردنيين مش عاجبهم شغلك بالمجلس .. ورايح تطلع منه مثلك مثل غيرك من الدنيا بلا دين .. و اذا انت ما بدك تقول للفاسد يلعن اضلاع اللي خلفوك ... منو بده يقوله .. لا يروح انك مركن عليّ انا ؟؟ مهو لو يلعبوا براسك الزباين اللي خبرك بيهم بيجوز يخلّوك تجرجرني عالمحاكم على سواليفي هاي بس انا عارف مع مين بحكي ولمين بهرج .... اخوي ابو غيث ترى السوس اكل جدوع الشجرة .. والدود نخرها نخر .. لو سألتني شو السبب ؟؟ بقول لك قلة عناية مع شوية ذبذبة مع عرقين قلة حيا .. وحط لك فوقيهن صبة زيت فقدان كرامة مع رشة ملح انجليزي وكباّية كبايتين انا شو دخلني .. وانته شو خصّك ... وكمشة ان سلم راسي ما يظل ولا راس ... واللي بوخذ امي هو عمي ... وحط راسك بين الرووس وقول يا قطاعين الروس

عرفت ليش يا ابن الاجاويد خربت البلد

ما احنا صرنا مثل شجرة داشرة بهالبطين فاردة جنحانها لمراقيّن الطريق .. الكل بهبش ... والكل بتناوش من عنده .. \\ حتى الغنم صارت تتطاول على اغصان الشجرة توكل وتحش ... ابو غيث صدقّ وامن بألله انه الشجرة بتالي عمرها وبعدين غير انا وانت نتندم ونقول ياريتنا قصقصنا هل أكم جدع مسوس وهل كمّن غصن يابس ...وياريتنا بحشنا حواليها واسقيناها شوية محبة ونتيفة اخلاص ... اما اذ ا بدك تستنى الهمل يديروا بالهم عليها بتكون متوهم .. مهذول يابو غيث حرامية وسرسرية ..
عمرك شفت حرامي سراق .. عنده شرف ...

ملعون ابو شرفهم اللي سرقوا هالبلد ونهبوها .... والمشكلة كلهم ( ملعونين الوالدين) ثقاّلة .... ابو غيث انت كبير وابن عشيرة كبيرة القدر .. صدّق وامن بالله الجماعة اللي معك خبرهم ما بيجوا الا بالخوف .. ترانا احنا وانتو اصحاب الارض واهل الشجرة .. ومن كرمنا وكرامتنا قلنالهم احنا والشجرة والارض والمية والفدان والمال والولاد فدا كنادركو ...وهمّه ما صدقوها من الله ...خلونا نصير عندهم قطاريز ونوبتتشية .. نحميهم ونحمي الحرامية اللي جابوهم معهم .. الشجرة يا ابو غيث بلشّت تخرب \\\ يا ابو غيث اخ منك تعالوا احنا واياكو خلينا نشوف شلون ندير بالنا عليها .. ترى المسألة واضحة مثل عين الشمس بدهاش روحة عالقاضي .. احنا اهل البلاد واحنا ناسها وحجارها واحنا شجرها ونارها .. واحنا بواريدها المعمرة للمرجلة .. واحنا اللي ما نرتضي الضيم .. وان سكتنا تراه سكوت الصقور ساقطة يم الفريسة .. هذي يابو غيث ماهي هرجتي وحدي .. هذي هرجة كل اردني بغار على بلده اللي هي روحه واللي هي عرضه وبقول للي مش عاجبه شو بقول..والله لو ما بظل بالبلد غير النسوان لتظل الشجرة خضرا ومطعمة .. وخلاف هيك ما بنسكت ولو بصير الدم للركب .. وزغرتن ياسلطيات .. زغرتن يا اردنيات والله طول ما هالخشوم بتشم الهوا وطول ما العيون بتشوف الفضا ما بنرضى بالدنية .. وحياك الله يالمنية ....

M.KATISHAT@YAHOO.COM



تعليقات القراء

ابو سهل
الاخ ابو العبد في ريحة عنصرية في مقاللك
11-07-2011 11:26 PM
راعي انسرقن غنماته
ينصر دينك يا ابو قطيش بس بدي أقولك شغله
لقد أسمعت لو ناديت حيا..... ولكن لا حياة لمن تنادي
12-07-2011 01:20 AM
هههههههههههههه
حتى انت يا بروتس ههههههههههههه
12-07-2011 08:16 AM
مشان الله
نعتذر.........
12-07-2011 09:01 AM
عاطف المناصير
مقال رائع جدا واسلوب اردني من القاع سلمت ايدك
12-07-2011 09:45 AM
ابو صعب
نعتذر....
12-07-2011 09:45 AM
ريالات
أرجو من الاستاذ محمود توثيق المصطلحات المستخدمة في المقال من حيث المعنى ، أماكن (مواضع) الاستخدام،متى تستخدم، لماذا تستخدم كل مقولة منها ...... من باب الحرص على أمثالنا وحكمنا المتوارثة والتي جاءت من حكمائنا من آباء وأجداد ولازلنا نستخدمها كونها بتشفي غليلنا والله يعطيك العافية.
12-07-2011 12:59 PM
الكاتب
الى رقم واحد اقسم برب العزة انني احتقر كل دعاة الاقليمية والعنصرية .. وضايقني جدا ان يشم اخي المحترم هذه الرائحة .. التي اعتبرها نتنة ... حين اقول الاردنيين اعتبر كل ابناء هذا الوطن اردنيين ... واخجل من الدخول في التفاصيل .. .. ومصطلح الاصول والمنابت .. اكرهه ... كلنا اسرة واحدة واهل ... كلنا فلسطينيون ما دامت فلسطين نحت الاحتلال .. وكلنا اردنيون من اجل الاردن هذه الشجرة المثمرة .. وهذه الخيمة التي نستظل تحتها .. ولعنة الله على كل دعاة العنصرية ..
12-07-2011 01:02 PM
رائع
رائع طقع
12-07-2011 09:39 PM

أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات