اغلاق

مذكرات اردني طفران



قبل اسبوع طلعت طشه لحالي ... مشيت ... مشيت ... لقيت مغاره ... قلت افوت اشوف شو في جواتها ..
لقيت مصباح نحاس قديم ..فكرته ذهب ..مسكته ... فركته ... فجأه طلعلي مارد ... شبيك لبيك ... إلك طلب واحد ما في غيره ....قلتله طلباتي كثير خليهن اثنين .... قال واحد او برجع عالمصباح ... قلتله طيب اعطيني دقيقتين افكر ... قال فكر وبسرعه ... مرت بذاكرتي كثير من الاماني ... مصاري ... مناصب ...وجاهه .. سيارات ...عمارات ... وانا بحيره من امري ..قال لي يا الله صارلك 3 دقايق ... قلتله ..خلص ..خلص ... بدي ترجع هالواحد .. يرجع يشيل شنتات بالمطار وطبعا وشوشته اسمه ... قال يا زلمه فكرتك بدك تطلب مصاري وسيارات .. شو هالطلب هاظ ... قلتله ..ما هو هاظ اللي من ورا رواتبه ومكافآته وامتيازاته شحدنا الملح ..قال لي طيب ...استناني 10 دقايق ... استنيت عشر دقايق .. ساعه ..ساعتين .. قربت الشمس تغيب وما رجع ... قلت هالمارد chذاب ... وروحت ...
بعد اسبوع ... رجعت عالمغاره ... مسكت المصباح ... فركته فركته فركته ... بدون فايده .... شوي ولا المارد فايت علي بلاهث وعرقان وتعبان ... قلتله .. يا زلمه وين رحت النيه عشر دقايق ... قال يا زلمه شو طلبك هاظ ... لفيت العالم ... رجعت كارتر نجار ... ورجعت رئيس البرازيل بويجي ورجعت تبع فنزويلا سايق باص ... وما خليت رئيس بالعالم الا ورجعته زي ما كان عشان حضرتك ترضى ... قلتله يا زلمه اني هظول شو بدي فيهم .. زلمتنا شو صار بيه ... قال ..صدقني اني رحت ارجعه زي ما طلبت ..ما قدرت ازحزحه ..حتى قلت ما اني اجيت اجيت ...خليني اساوي اشي .... وحاولت اقبع فلان وفلان وفلان وفلانه وفلانه ... (ووشوشني اسمائهم كلهم ) لكن ولا قدرت ازحزح واحد منهم ... بعدين قلت بحالي ما دام الزلمه طلب مني خليني اعمل له اشي .. وع شان هيج لفيت العالم وغيرت وبدلت ...قلتله وبعدين ... قال والله الوضع عندكو بالاردن صعب ..هم 50 واحد بتقلبوا عالمناصب والمكاتب وصعب نغيرهم
قلتله طيب معك عشر ليرات قرضه .. ولا ارجع فاضي ..
قال لا والله .. مبارح استقرضت عشر ليرات ..من مارد بالهند وصرفتهن ..
مصدق حالي انه المارد بده يرجعلي فلان حمال شنتات ..وهو مستقرض عشر ليرات ....




تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات