اغلاق

نصائح ذهبية للأمهات مع بدء دوام المدارس .. لاتحطي مطرة المي مع الكتب وما تكون قزاز !


جراسا -

رصد- نصائح ذهبية تضمنها منشور تم تداوله على مواقع التواصل الاجتماعي على لسان احدى المعلمات، يدعو الامهات الى حزمة من التنبيهات بشأن رفع سوية اهتمامهن بابنائهن الطلبة تزامنا مع بدء العام الدراسي الجديد .
التنبيهات التي حملها المنشور والذي نورده تاليا، جاءت بنكهة لا تخلو من الطرافة، لكنها تحمل بعدا تربويا مهما وعالي المسؤولية :

كل عام واولادنا وبناتنا الطلاب والطالبات بألف خير
رسالة اعجبتني من معلمة إلى الأمهات الكريمات احببت ان أنشرها لربما تكون لصالح الطالب أولا وعونا للمعلمة والاطمئنان للام
عزيزتي الأم....
كلمتين من أختك ٠٠٠

المدرسة بلّشت...كل عام وانتي بخير ياخيتي بعد إذنك...نغلبك معنا شوي تنتبهي لشوية أمور ونحن لك من الشاكرين..


١- تعالي اول يوم مع إبنك وتأكدي من صحة المعلومات التلفون (التلفوووووووووون )يكون صح ..البيانات الخاصة اللي بيحتاجها المعلم بعدين.

٢-اذا عند ابنك مرض لاسمح الله او حالة معينة بلغينا فيها
عشان مصلحة ابنك اولا وآخرا
لنعرف نتعامل معه بشكل سليم

٣-أعطيه مصروف لو شلن لاتبعتيه بدون مصروف ...الأعداد كبيرة وصعب المعلمة تتعهد بالعدد الكبير
كمان سندويشة اي سندويشة..زيت وزعتر ..لبنة...جبنة... مربى ...المتوافر عندك
الطالب بجوع وبدوخ وبحتاجها بعد ساعتين زمن من دوامه

٤- تفقدي شنتة ابنك لما يروح والخبز اليابس اللي ضل بالشنتة بعد إذنك نظفيه
لإنه بوقع كله ع جلبابي وأنا أصلح

٥-لاتحطي مطرة المي مع الكتب وماتكون قزاز
ولا بلاستك قابل للكسر بسهولة
ويكون غطاها بسكر منيح
لانه كل يوم بنشر كتب طلابي ع الشبابيك وبنلحق بالشمس لحوق حتى ينشفوا قبل مايروح ع البيت ويتمزعوا

٦-الدرج الاول مش حكر ع حدا
الدرج الاول للكل مره هون ومره هناك...فيه حالات لازم تضل طول السنة درج اول وكمان فيه طلاب بدهم يرجعوا ورى ويرجعوا بالنص وكمان حقهم يجربوا يقعدوا كمان
يعني الورق الي كل يوم بيوصل المعلمة انه رجاء ابني بالدرج الاول بلا منه جيابنا تعبت ورق...غير انه ابنك إسم الله عليه بشوف باب الدكانة وهو قاعد جوى الصف

٧- اذا ابنك بعاني من التهابات بالمثانة وترسبات عالجيه قبل دوام المدرسة لإنه حيضل يمشور ع الحمام
والصف الأول كل حصة محسوبة عليه

٨-ارجوكي ارجوكي ارجوكي القلم لايجي بدونه ومش غلط قلمين ومبري وتعلميه يبري

٩-وتفقدي زيّه كتبه ودفاتره ومقلمته والشنتة ممزوعة او وسخة
هيبة ابنك من هيبتك ونظافته من نظافتك

١٠- اذا صدف انه ابن سلفك مع ابنك بصفي بلاش حركات كيف فلان ومين اشطر وكيف علاماته

١١-توديش جوزك علي ...تعالي انتي

١٢-انا معلمة وكلهم اولادي مابغاوز مع حدا ولو شديت ع حدا بكون فعلا احتاج انه ينشد عليه
واذا دللته معناها أبدى مجهود بستاهل عليه التعزيز

١٣- مش لما بتشوفي مني شي منيح توشوشيني واذا شفتي مني تقصير بالساحة تفضحيني

١٤-القمل عدوى مش شرط انتي وسخة
لما الاقي ببنتك شي واوشوشها لحالها بدون ماباقي الطالبات ينتبهوا...تيجي تاني يوم ياخيل شدي واركبي وتحكيلي عن لقب عيلتكم دار ابو النظافة
نظفي شعرها وكان الله بالسر عليم
هون حفرنا وهون طمرنا

١٥-تابعي معي درس بدرس وتعاوني معي
ولا شي بالدنيا اهم من ولادك ولا دراستهم

١٦-وصلي ابنك للمدرسة وتعالي روحيه
الدنيا بتخوف
ولو بروح بباص تابعيه وإتأكدي وين بنزله ومن وين بياخده

١٧_ تزنيش انه تاخدي رقم تلفوني
بعد المدرسة لبيتي عندي اربعين طالب يعني مش حشيل التلفون عن اذني

١٨- البوت أكرمكِ الله لاتشتريله ياه برباط
اشتريه بلاصق او توب سايدر عادي
طول وقتنا بنربط ببوات وع الدور الله وكيلك بكونوا صافين
مس اربطيلي بوتي

١٩- انا بشر بغلط وبقصر بس مابظلم
وبشوف ابني بإبنك وبقدرّ خوفك وحرصك عليه

إيدي بإيدك..
منقول



تعليقات القراء

لا يوجد تعليقات


أكتب تعليقا

تنويه :
تتم مراجعة كافة التعليقات ،وتنشر في حال الموافقة عليها فقط.
ويحتفظ موقع وكالة جراسا الاخبارية بحق حذف أي تعليق في أي وقت ،ولأي سبب كان،ولن ينشر أي تعليق يتضمن اساءة أوخروجا عن الموضوع المطروح ،او ان يتضمن اسماء اية شخصيات او يتناول اثارة للنعرات الطائفية والمذهبية او العنصرية آملين التقيد بمستوى راقي بالتعليقات حيث انها تعبر عن مدى تقدم وثقافة زوار موقع وكالة جراسا الاخبارية علما ان التعليقات تعبر عن أصحابها فقط ولا تعبر عن رأي الموقع والقائمين عليه.

- يمكنك تسجيل اسمك المستعار الخاص بك لإستخدامه في تعليقاتك داخل الموقع
الاسم :
البريد الالكتروني :
اظهار البريد الالكتروني
التعليق :
رمز التحقق : تحديث الرمز
أكتب الرمز :

إقرأ أيضاً

رياضة وشباب

محليات